Փաստ ինֆո

Ամբողջ աշխարհում ավիացիայի ոլորտը կանգնած վիճակում է։ Ավիացիոն ոլորտի փորձագետ Նավիկ Խաչատրյանի խոսքով՝ աշխարհի պետությունների 95 տոկոսն այս ոլորտն առաջնահերթություն է համարում, իսկ մենք՝ ոչ։ 

«Փաստինֆո»-ի հետ զրույցում փորձագետն ասաց՝ կոպիտ սխալ է, որ ուշադրություն չենք դարձնում ավիացիային և այն ստրատեգիական չենք համարում։ Իհարկե, այժմ կորոնավիրուսի համավարակի պատճառով օդային սահմանները փակ են և միայն չարտերային չվերթներ են իրականացվում, սակայն ի՞նչ կլինի այն ժամանակ, երբ սահմանները բացվեն՝ հաշվի առնելով, որ ԵՄ թռիչքների անվտանգության թարմացված ցանկում հայտնվել ենք այսպես կոչված «սև ցուցակում»։

«Երկու ամիս առաջ ԱԺ-ում Տիգրան Ավինյանն այս թեմային անդրադարձավ ու ասաց, որ ընդամենը մեկ չվերթ էինք անում դեպի Լիոն, թող դա էլ չանենք, ինչ կլինի, մեր վրա չի ազդելու։ Իրականում ողբալի վիճակ է, որ երկրի իշխանությունները մատների արանքով են նայում ավիացիոն ոլորտին, որն անդունդի եզրին է կանգնած։ Քաղավիացիայի կոմիտեի նախագահն իր վերջին օնլայն զրույցի ժամանակ, անդրադառնալով աուդիտը չանցնելուն, ասաց, որ վարչապետը երկշաբաթյա ժամկետ է տվել, որ ներկայացնեն քայլերի հաջորդականություն, թե ինչպես պետք է վերականգնեն EASA-ի աուդիտը չանցնելը, բայց դրան ոչ մի բան չհետևեց։ Դա մնաց որպես խոսք»,-ասաց Նավիկ Խաչատրյանը։

Վերջինս կարծում է՝ Եվրոպան մեզ կանդրադառնա 2022թ.-ի նոյեմբերից հետո։ Փորձագետը ենթադրում է, որ 2023թ.-ին նոր կհայտնեն նոր աուդիտ անցկացնելու մասին, ինչը նշանակում է, որ երեք տարի դեպի Եվրոպա չենք կարող թռչել։
Անդրադառնալով ոլորտի խնդիրներին՝ փորձագետը նկատեց՝ Եվրոպայի խոշոր երկրները, այդ թվում Գերմանիան, Ֆրանսիան, Հոլանդիան, Ավստրիան իրենց դրոշակակիր փոխադրողներին մեծաքանակ գումարներ, սուբսիդիաներ են տալիս, ինչը բացակայում է Հայաստանում.

«Մեր ավիաընկերությունները ֆինանսական լուրջ խնդիրներ ունեին դեռևս անցած տարի։ Հիմա պատկերացրեք՝ ինչ վիճակ է այնտեղ։ Որևէ մեկն այս պահին թռչելու ռիսկ չի անի։ Ինչպե՞ս պետք է աշխատավարձ տան անհրաժեշտ անձնակազմին, որը պետք է ապահովի չվերթը։

Չես կարող Երևանից Մոսկվա թռչել ու տոմսի գինը 1000 դոլար դնել։ Չափանիշներ կան»,-ասաց փորձագետը։

Նա կարծում է՝ ավիացիոն փորձ ունեցող մասնագետները պետք է համախմբվեն, մտածեն, խելք-խելքի տան, հաշվի առնեն բոլոր ժամանակակից տենդենցները, ավիացիայի զարգացումները և ինչ-որ լուծում առաջարկեն, իսկ պետական այրերը պետք է վստահեն այդ խմբին. «Ավիացիայի ոլորտը մեզ մոտ նույնպես պետք է ստրատեգիական ոլորտ ճանաչվի»,-ամփոփեց Նավիկ Խաչատրյանը։

Հեղինակ՝ Հասմիկ Կոշկարյան

Աղբյուր` Փաստինֆո