Փաստ ինֆո

«Թեև մեզ ասել էին, որ Հայոց պատմություն և Հասարակագիտություն առարկանների նոր չափորոշիչները պետք է քննարկվեն մեզ հետ, մեկ էլ մի օր տեսնում ենք, որ ԿԳՄՍ նախարարությունն իր կայքում հրապարակել է խայտառակ նոր հայեցակարգերը, որոնց առնչությամբ մենք արդեն հայտնել ենք մեր դիրքորոշումը։ Մասնագիտական բոլոր իրավասու մարմինների կողմից խիստ բացասական կարծիքներ են հայտնվել, դրանք նույնիսկ խմբագրման ենթակա չեն, այլ պետք է ամբողջապես վերացվեն և կազմվեն նորերը - լրագրողների հետ հանդիպման ընթացքում ասել է ԵՊՀ Հայոց պատմության ամբիոնի վարիչ, պ.գ.դ., պրոֆեսոր Արտակ Մովսիսյանը՝ խոսելով Հանրակրթական դպրոցի պատմության ծրագրերի նախագծերի հետևում կանգնած ուժերի գործունեության մասին։

Նրա փոխանցմամբ՝ գաղտնիության փաստն, ինքնին շատ կասկածելի էր, բայց կասկածելի մեկ այլ հանգամանք էլ կար՝ ընդհանուր հաշվարկով 20 դասագրքի չափորոշիչների կազմումը տրվում է կազմելու մեկ անձնավորության՝ Լիլիթ Մկրտչյանին։
«Մենք սկզբում կարծում էինք, որ նա ԵՊՀ «Ռեստարտ» կազմակերպության անդամ է և, քանի որ մեր իշխանություններն, այսպես ասած, սիրո և համերաշխության հեղափոխություն անելուց հետո հների և նորերի, սևերի ու սպիտակների բաժանումներն անընդհատ դնում են, ապա նրա միանձնա ընտրության հանգամանքը կարող է պայմանավորված լինել դրանով։ Բացի այդ, Լիլիթ Մկրտչյանը նաև ԿԳՄՍ նախկին փոխնախարար Արևիկ Անափիոսյանի մտերիմն է։ Բայց պարզվեց, որ մեր երիտասարդ կոլեգաներից մեկը, համացանցում փնտրելով դուրս էր եկել մի խայտառակ իրողության վրա, ըստ որի, «Պատմություն» կոչվող մի թուրքական ՀԿ կա, որի հետ մեր կողմից ակտիվ համագործակցում է «Երիտասարդ պատմագետների ասոցացիա»- ն, որի նախագահը նույն ինքը՝ Լիլիթ Մկրտչյանն է։ Ի՞նչն է ամենահետաքրքիրը՝ իրենց կայքում այս մասին ոչ մի խոսք չկա, այսինքն, այդ համագործակցությունը խիստ գաղտնի է պահվել։ Հիմա, եթե դու գիտես, որ լավ բան ես անում՝ հանուն խաղաղության և, իբր հաշտեցման, ապա ինչո՞ւ ես խիստ գաղտնի պահում այդ լավ բանը...»,- ասաց նա։
Անդրադառնալով Հայոց պատմության առարկայի նոր չափորոշիչներում տեղ գտած ամենացցուն աղավաղումների թեմային, Արտակ Մովսիսյանը հարկ է համարում անդրադառնալ նախ “History Education in Schools in Turkey and Armenia. A Critique and Alternatives” («Պատմության ուսուցումը Թուրքիայի և Հայաստանի դպրոցներում. քննադատություն և այլընտրանքներ») գրքի հեղինակներին, որ արվել է թուրքական կողմի հետ համատեղ. «Պարզվում է այս աշխատության մեջ ներգրավված է 13 մարդ, որից միայն 7-ն են հայ, իսկ այդ 7-ից միայն 2-ն են պատմաբան։ Մնացյալ 5 հեղինակներից երկուսը ԱԺ «Իմ քայլը» խմբակցության պատգամավորներ են՝ Մարիա Կարապետյանն ու Սոս Ավետիսյանը, ովքեր, պարզվում է՝ եվրոպական լեզուների մասնագետ են և իրենց իրավունք են վերապահել թուրքական կողմի հետ միասին, քննարկել, քննադատել, կանխորոշել այն սկզբունքները, որոնցով պայմանավորած Հայոց պատմության դասագրքի չափորոշիչները պետք է փոխվեն։ Հեղինակների ցանկում բավական էկզոտիկ իրավիճակ ենք հայտնաբերում ՝ ակադեմիական կոնսուլտանտի դերում հանդես է եկել Միգրացիոն ծառայության պետ Արմեն Գասպարյանը, որ միջազգայնագետ է և ոչ մի կապ չունի պատմաբանության հետ։

Հաջորդ հեղինակը՝ ֆեմինիստ և սոցդեմոկրատ մասնագիտություններով ներկայացող, ՅՈՒՆԻՍԵՖ-ի գրասենյակի աշխատակից Նվարդ Մանասյանն է։ Հաջորդ հեղինակը պոլսահայ երիտասարդ Արարատ Շեկերյանն է, որ, ի՞նչ եք կարծում, ի՞նչ մասնագետ կարող է լինել...

Ռուսաց լեզվի և գրականության մասնագետ է, որը սովորել է Ստամբուլի և Պուկինի անվան համալսարաններում։ Հեղինակներից հաջորդը Կարինե Փալանջյանն է՝ Արիզոնայից, ով քաղաքագիտությամբ է զբաղվում», - ասում է ԵՊՀ Հայոց պատմության ամբիոնի վարիչ, պ.գ.դ., պրոֆեսոր Արտակ Մովսիսյանը։

Աղբյուր` Փաստինֆո