Փաստ ինֆո

6 ամսական փոքրիկին գիրկը՝ 24-ամյա Լաուրայի մասին «Փաստինֆո»-ի տեսանյութը մեծ արձագանք ստացավ։Շատերը պատրաստակամություն հայտնեցին ֆինանսական աջակցություն ցուցաբերել, եղան նաև մարդիկ,ովքեր պատրաստ էին ոչ միայն տանիք տալ, այլ նաև երեխային պահել է մինչև մայրը կաշխատեր։ Հենց այս նպատակն էր հետապնդում մեր ռեպորտաժը՝ պաշտպանել երեխայի լավագույն շահը, փոքրիկին դուրս հանել փողոցից, ուր հայտնվել էր ոչ իր կամքով, օգնել նրա համար կյանքի ավելի բարենպաստ պայմանների ապահովմանը։

Սակայն պարզվեց երիտասարդ մայրը մուրացկանությունը նախընտրում է աշխատանքից՝ իր շուրջ ստեղծելով ստի մի ամբողջ կծիկ, որը բացահայտվեց մեր առաջին ռեպորտաժից հետո։

Մասնավորապես՝ կինը մեզ ասել էր, որ մայրը մահացած է, ամուսին չունի և ապրում է 15-րդ թաղամասում։ Իրականությունը պարզվեց այլ է։

Լաուրան ունի մայր և քույր, նաև ենթադրյալ ամուսին, որի հետ ապրում է Մալաթիա-Սեբաստիա համայնքում, ունի երկու բալիկ։ Կնոջ ֆեյսբուքյան էջը մեզ ուղարկեցին հարևանները, որոնք պնդում էին, որ կինը բացահայտ ստում է։ Մեզ գրեց նաև մայրը՝ հավատացնելով, որ աղջիկն անգիտակցաբար է գնացել այդ քայլին։ Դրան հաջորդեց նաև Լաուրայի այցը մեր խմբագրություն։

Հուլիսի 30-ին ականատես եղանք, որ փոքրիկը նորից փողոցում է, մայրը նրան կրկին օգտագործելով փող էր մուրում։

Լաուրան ասում էր, թե աշխատանքի համար շատ տեղեր է դիմել, բայց 6 ամսական երեխային չգիտի ում մոտ թողնել, հենց այս պատճառաբանությամբ մերժել էր աշխատանքի բազմաթիվ առաջարկներ։ Իսկ ում խնամքին է մյուս մանկահասակ փոքրիկը, ով է նրան խնամում, երբ մայրը մի քանի ամսականի հետ դուրս է գալիս մուրացկանության, ինչու չի օգտվում առաջարկվող օգնությունից ու խնամատար բազմաթիվ ծառայություններից։ Հարցեր, որոնց պատասխանը թերեւս միայն Լաուրան գիտի ու պիտի հետաքրքրի նաեւ իրավասու մարմիններին։

Աշխատանքի և սոցիալական հարցերի նախարարության մամուլի խոսնակ Սոնա Մարտիրոսյանը մեզ հետ զրույցում ասաց, որ իրենք ժամանակին աղջկան օգնելու համար դիմել են ու մերժում ստացել։ Իսկ թե ինչու է Լաուրան մերժում աշխատանքի առաջարկները՝ հստակ պարզաբանում գոյություն չունի։

«Մենք հասկանում ենք, որ շատ աշխատավարձի համար պետք են որոշակի հմտություններ, գիտելիքներ։ Տարօրինակ է չէ, որ բժշկական քոլեջում սովորած մարդը այսօր մուրացկանությամբ է զբաղվում։ Դա նշանակում է որ մարդու համար գուցե առավել նախընտրելի գումար վաստակելու ձևն է։ Մենք մաքսիմումը որ կարող ենք անել երեխայի համար դա տարածքի սոց աշխատողներին կարող ենք ուղարկել իրենց տուն, որպեսզի հասկանանք, արդյոք երեխաների համար վտանգավոր չէ այս կնոջ հետ բնակությունը։ Վստահ եմ, որ ոստիկանությունը դիմել է սոց աշխատողներին։

Եթե գնան ու տեսնեն, որ երեխայի բնակության համար ռիսկային պայմաններ են կենսաբանական ընտանիքում այդ ժամանակ հոգաբարձության և խնամակալության հանձնաժողովը համայնքի պետք է որոշում կայացնի արդյո՞ք արժե թողնել երեխաներին այդ ծնողների մոտ, թե հանձնել պետության խնամքին՝ թեկուզ որոշակի ժամանակի համար։ Ըստ էության, եթե երեխան սեփական ծնողների կողմից ենթարկվում է հարկադիր մուրացկանությամբ, իսկ դա այդպես է, դա նշանակում է, որ երեխայի համար կենսաբանական ընտանիքը ռիսկային է։ Մենք, իհարկե, ամեն ինչ անում ենք, որ երեխաները մնան ընտանիքում, բայց դա չպետք է լինի երեխայի շահի հաշվին և ինքնանպատակ։ Ես գիտեմ, որ նախարարը խոսել է ոստիկանության հետ»։

Կան տարբեր ծրագրեր, աջակցել ցանկացողներ, որոնց համադրման արդյունքում կարելի է խուսափել փոքրիկին մուրացկանության մեջ ներգրավելուց, բայց մեր կատարած փոքրիկ հետազոտությունից եզրակացրեցինք, որ կինը չի ուզում կամ չի կարողանում դուրս գալ փողոցից, այլ խոսքով կամ ինքն է թրաֆիքինգի զոհ, կամ դա դարձել է գումար աշխատելու ավելի հեշտ միջոց։ Երկու դեպքում էլ տուժում է անմեղ երեխան, ինչի վրա էլ հրավիրում ենք պատկան մարմինների ուշադրությունը։

Մանրամասները՝ տեսանյութում։

Աղբյուր` Փաստինֆո