Փաստ ինֆո

ՀՀ ԱԺ «Լուսավոր Հայաստան» խմբակցությունը դեռ չի քննարկել ՍԴ դատավորի թափուր տեղի համար ՀՀ կառավարության ներկայացրած թեկնածուի Վահրամ Ավետիսյանի հետ հանդիպման հարցը։ Սակայն, ինչպես «Փաստինֆո»-ի հետ զրույցում ասաց ԼՀԿ խմբակցության պատգամավորը, որեւէ խոչընդոտ չկա դատավորի թկենածուի հետ կարող են հանդիպել։

«Փաստինֆո»-ի այն դիտարկմանը, որը կառավարությունը հայտարարել է իր թեկնածուի անունը առանց հանձնաժողովի կողմից նրա բաեվարքությունը ստուգելու, այսինքն՝ առանց գործարկելու իր իսկ կողմից այդքան կարեւորված գործիքակազմը՝ Տարոն Սիմոնյանն արձագանքեց. «Եթե չեմ սխալվում պետք է դիմեին հանձնաժողովին, որ հանձնաժողովը պետք է սկսեր ստուգման գործընթաց։ Նման դիմում չի եղել կառավարությունից»։

Ինչպես արդեն տեղեկացրել ենք՝ ՍԴ մասին օրենքով դատավորի թեկնածուների բարեվարքության ուսումնասիրություն նախատեսված չէ, սակայն կոռուպցիայի կանխարգելման հանձնաժողովի մասին օրենքով հանձնաժողովի վրա դրվել է նման պարտավորություն։ Ասել է թե՝ այս հարցում եւս իշխանությունները կատարել են «փնթի» փոփոխություններ, առկա է օրենսդրական բաց, այդուհանդերձ, պատգամավորը գտնում է, որ ՍԴ դատավորի թեկնածուի բարեվարքությունը պետք է ստուգվի։

«Իհարկե եթե մի օրենքով գրվում է, ընթացակարգը սահմանվում է, որ պետք է լինի ստուգման պրոցես, մյուսով նման բան չի նախատեսվում, այդտեղ որոշակի բացի խնդիր է լինելու։ Տեսական կարող եմ ասել, որ եթե կա անհամապատասխանություն, ապա պետք է վերացվի։ Ամեն դեպքում հանձնաժողովը իրավասու է գործը սկսել, երբ որ դիմեն իրեն, բայց կառավարությունը չի դիմել՝ չեն սկսել»,- ասաց պատգամավոր Տարոն Սիմոնյանը։

Պատգամավորն ասում է, որ իրավաբանական համայնքը ճանաչում է թեկնածուին՝ որպես շատ լավ պրոֆեսիոնալ մասնագետ, բայց բարեվարքությունը միանշանակ պետք է ստուգի հանձնաժողովը։

«Եթե կառավարությունը հարկ չի համարել դիմել, ԱԺ-ում կարող ենք հարցնել կառավարությանը՝ ինչո՞ւ հարկ չեք համարել դիմել։ Բայց հիմա կառավարության իրավունքն է եղել, փաստորեն այդպես է՝ մի կողմից կառավարությունը իր մասնակցությամբ է ստեղծել հանձնաժողով, բայց այս դեպքում նպատակահարմար չեն գտել»,- արձանագրեց Տ.Սիմոնյանը։

Աղբյուր` Փաստինֆո