Փաստ ինֆո

Հուլիսի 27-ին` ժամը 22:00-ի սահմաններում, բախումներ տեղի ունեցան Ամուլսարի հանք տանող երկրորդ պահակակետի մոտ: Ոստիկանները բերման ենթարկեցին Ջերմուկի 9 բնակչի: Բախումների ժամանակ բնապահպան, Ջերմուկի բնակիչ Շիրակ Բունիաթյանը սոցցանցի միջոցով հայտարարեց, որ երկու օր առաջ 6 բանվոր մտել են Ամուլսարի տարածք, ինչ-որ աշխատանքներ արել և այն բանից հետո, երբ իմացել են, որ իրենց մասին բնակիչները գիտեն, դուրս չեն գալիս հանքի տարածքից։ Ամուլսարում տիրող վիճակի մասին «Փաստինֆո»-ի հարցերին է պատասխանում Լիդիան Արմենիայի իրավաբանական գծով ղեկավար Խորեն Նասիբյանը։

-Այս պահին Ամուլսարի տարածքում աշխատանքները վերսկսվե՞լ են, թե ոչ: Բնապահպանները հայտարարել են, որ 6 աշխատակիցներ մուտք են գործել հանքի տարածք ու աշխատանքներ են իրականացնում։

-Ինչպես արդեն հայտնել էինք, Ամուլսարի տարածքում այս պահին տեղի են ունենում գույքագրման աշխատանքներ, որի վերջնական արդյունքների ամփոփումից հետո Ընկերությունը մտադիր է հաղորդում ներկայացնել ոստիկանություն, որովհետև արդեն իսկ առկա են առերևույթ գողության հանցանշաններ: Բացի դրանից, հաշվի առնելով, որ երկու տարի շարունակ տարածքը գտնվել է բարձիթողի վիճակում, այս պահին նաև տեղացի կապալառուների 10-15 հոգանոց խումբը արդեն մի քանի օր զբաղված է աշխատակիցների համար նախատեսված ճամբարի վերանորոգման աշխատանքներով: Տարածքում իրականացվում են նաև մաքրման աշխատանքներ:

-Այս պահին կարծես թե կա լուռ համաձայնություն աշխատանքներ չիրականացնել, քանի դեռ կառավարությունը չի որոշել իր հետագա գործողությունները, հետեւապես ինչու են աշխատակիցները մուտք գործել։

-Նման բան չկա: Ավելին, ուզում եմ մի բան արձանագրենք: Միակ պատճառը, որ ընկերությունը այս ողջ ընթացքում չի իրականացրել աշխատանքներ Ամուլսարի տարածքում, եղել է ճանապարհների ապօրինի շրջափակումը՝ պատկան մարմինների անգործության պայմաններում: «Լիդիան Արմենիայի» օրինական գործունեությունը ոչ մի օրենքով կամ ՀՀ օրենսդրությամբ սահմանված որևէ այլ կարգով չի սահմանափակվել: «Լիդիան Արմենիան» գործել և գործում է օրենքի տառին համապատասխան և տիրապերում է Ամուլսարի տարածքում օրենքով թույլատրված գործունեություն իրականացնելու բոլոր իրավունքներին, ինչը չենք կարող ասել տևական ապօրինություն իրականացնող մի խումբ անձանց մասին։

-Բնապահպանների հայտարարության համաձայն՝ աշխատակիցները վախենում են դուրս գալ տարածքից, թեեւ երաշխավորվել է նրանց անվտանգությունը։ Փաստացի քանի՞ օր է, որ նրանք գտնվում են այնտեղ, ինչպե՞ս է կարգավորվում նրանց սնունդի հարցը։

-Գիտեք, վերջին օրերին բնապահպանի անվան տակ ապօրինություն իրականացնող այդ մի խումբ անձինք հանդես են եկել տարբեր մանիպուլատիվ հայտարարություններով ու կեղծ ահազանգերով: Ուստի նպատակահարմար չեմ գտնում անդրադառնալ հերթական ապատեղեկատվությանը: Միայն կասեմ, որ ցանկացած անձի, այդ թվում նաև «Լիդիան Արմենիայի» յուրաքանչյուր աշխատակցի օրենքով սահմանված իրավունքների իրացման և անվտանգության ապահովման երաշխավորը պետք է լինի ՀՀ ոստիկանությունը: Այո, տարածքում կան Ջերմուկ համայնքից աշխատակիցներ, որոնք իրացնելով իրենց սահմանադրական իրավունքը՝ օրինական աշխատանքով վաստակում են իրենց ապրուստի միջոցը: Ընկերությունը ապահովում է իր աշխատակիցների համար սնունդը և բոլոր անհրաժեշտ որակյալ պայմանները, թեև ցուցարարները պարբերաբար խոչընդոտում են աղբահանության, սննդի մատակարարման և այլ կենսական նշանակություն ունեցող ծառայությունների իրականացմանը Ամուլսարի տարածքում, ինչի մասին ընկերությունը տեղեկացրել է ՀՀ ոստիկանությանը, նաև՝ ՀՀ մարդու իրավունքների պաշտպանին:

-Արդյո՞ք այսօր վտանգված է այդ աշխատակիցների առողջությունն ու կյանքը։

-Այս հարցի պատասխանը կարծում եմ կգտնեք երեկվա տեսագրություններում և այս երկու տարվա ընթացքում Ամուլսարի շրջակա համայնքներում տիրող վախի, ապօրինության և ամենաթողության մասին աղաղակող բազմաթիվ փաստերում: Իհարկե, ցանկացած անիշախնության իրավիճակ, երբ օրինախախտներն իրենց ամենակարող են զգում, վտանագավոր է այլ օրինահարգ անձանց համար։ Հենց դրա համար էլ գոյություն ունեն իրավապահ մարմիններ, որոնք հասարակության այլ անդամների վճարած հարկերի հաշվին վարձատրվում են հասարակական կարգը պահպանելու համար։ Երբ ապօրինությունը ամիսներ շարունակ չի կանխվում, դրա հետևանքը չի կարող վտնագավոր չլինել հանրության համար։

-Բնապահպանը նշում էր, որ «6 հոգով ոչ կարող են մեծ ծավալի շինարարական աշխատանքներ անել, ոչ հանք բացել, նրանց նպատակը իրենց ներկայությամբ սադրելն է»։ Ինչպե՞ս կմեկնաբանեք այս հայտարարությունը։

-Ինչպես արդեն ասացի՝ չեմ պատրաստվում մեկնաբանել բնապահպանի անվան տակ ապօրինություններ իրականացնող անձանց հայտարարությունները: Այդուհանդերձ, այո, փոքր խումբը հանք շահագործել չի կարող և ոչ էլ որևէ մեծ ծավալի գործունեություն կարող է իրականացնել, ուրեմն ո՞վ է սադրում՝ թույլ չտալով, որ այդ խումբը կատարի ընկերությանը պատկանող գույքի հաշվառում, ի՞նչ բնապահպանական հարց են իրենք այսօր լուծում այդ մարդկանց աշխատանքը խոչընդոտելով։ Եվ հենց իրենց դիտարկումը ապացուցում է, թե ով է սադրում, ում է պետք յուրաքանչյուր առիթով մեծ աղմուկ բարձրացնել և դրանով իսկ մեծացնել իրենց կատարած ապօրինի գործողության արժեքը։

Աղբյուր` Փաստինֆո