Փաստ ինֆո

ԿԳՄՍ «բարեփոխումների» առաջին հարվածը դեռ անցյալ տարի են ստացել մեր բուհերը, երբ մեկ էլ պարզվեց, որ բուհական ծրագրերում կատարված թավշյա փոփոխությունների արդյունքում տուժել են բացառապես հայագիտական առարկաները, ի մասնավորի՝ կրճատվել են հայոց լեզվի, գրականության, հայոց պատմության դասաժամերը: Ոտքի վրա մոտիվ մոգոնվեց՝ հայագիտական առարկաները դպրոցներում ենք ամրապնդելու:

Բայց այն, ինչ այս տարի տեղի է ունենում հանրակրթության ոլորտում և դպրոցական ծրագրերում ուղղակի խելքից, մտքից դուրս է: Տպավորությունն այնպիսին է, թե Հայաստանը փորձադաշտի են վերածել ինչ-որ գլոբալ ուժերը, որոնց միտք բանին հայկականությունը վերացնելն է: Այլ կերպ ինչպե՞ս կարելի է ընկալել, երբ Մաշտոցից հետո՝ ծրագրից հանում են հայ գրականության ոսկեդարը՝ Խորենացի, Բուզանդ, Եղիշե, Փարպեցի, այսինքն, պատմիչներ, որոնք հայոց թագավորությունների հաղթանակները և փառքն են գովերգել, մեր նախարարական տները, պատմական Հայաստանի գավառները… Կարծու՞մ եք պատահակա՞ն է, որ մեկ էլ ԿԳՄՍ-ն որոշում է, թե՝ պատմիչներին պատմության ծրագրում կանցնեն: Իսկ այն, ինչ անցնում են հայ հին ու միջնադարյան գրականության ծրագրով, պատմության ծրագիրը չի ներառում: Ի դեպ, ոսկեդարի ամենաշքեղ գործերից մեկն է Աստվածաշնչի հայերեն թարգմանությունը, որն օտար գիտնականներն անվանել են «Թագուհի թարգմանութեանց»:

Կամ՝ ի՞նչ ասել է՝ ծրագրերում «Հայ գրականության» փոխարեն ունենք «գրականություն» առարկա: Ձեռք ե՞ք առել ձեզ: Երբևէ կարո՞ղ եք պատկերացնել, որ ասենք Մեծ Բրիտանիայի հիմնական կամ ավագ դպրոցներում «English literature»-ի փոխարեն անցնեն ուղղակի գրականություն, քանի որ համաշխարհային գրականություն է ներառվելու նաև տվյալ գրքերում: Ազգային պատկանելության, արժանապատվության հետ խնդի՞ր ունեն ոմանք:

Եվ այս դեպքում կարո՞ղ եք ասել՝ դուք ինչո՞վ եք տարբերվում մեր ճակատագրորեն հարևան ադրբեջանցիներից, որոնք քարտեզներ են գծում, ուր Հայաստան չկա, և այսօր աշխարհի թանգարաններկամ այդ քարտեզներն են շրջանառվում: Բացում ես Լոնդոնում վերջերս հրատարակված «A world history of art» աշխատությունը և պարզում, որ «Ազրբայջան» անունով անտիկ պետություն գոյություն ունի, իսկ Հայաստան չկա: Հայաստանի փոխարեն «Ազրբայջան» կոչվող հնարովի ազգ-պետությունն է Վանա լճի մերձակա տարածքների տեր-տիրականը եղել: Մենք որպես ազգ ու պետություն ընդհանրապես անտիկ աշխարհում բացակա ենք:

Եթե սխալվում եմ, ինձ ուղղեք՝ այսօր Հայաստանի ԿԳՄՍ քայլերը այս նույն՝ համատեքստում չե՞ն: Այս նույն ուժերը չե՞ն, որ շարժում են իրենց դրածոներին:

Եզրակացությունը մեկն է՝ այս և նման քայլերը, միտված են Հայաստանն ու հայկականը, հայությունը վերացնելուն:

Հեղինակ՝ Ա.Եսայան

Աղբյուր` Փաստինֆո