Փաստ ինֆո

Արդեն երկու օր է Ռուսաստանի տարբեր քաղաքների և մասնավորապես, Մոսկվայի գյուղմթերքների շուկայում առաջացել էր բավականին լուրջ խնդիր. Ռուսաստանի ադրբեջանական մաֆիան ամեն կերպ խոչընդոտում էր և թույլ չէր տալիս, որպեսզի մեր հայրենակիցները Ռուսաստան տեղափոխած գյուղմթերքը կարողանային իրացնել ռուսաստանյան շուկաներում: Այս մասին Facebook-ի իր էջում գրել է ԲՀԿ խմբակցության պատգամավոր Նաիրա Զոհրաբյանը:

Նա, մասնավորապես, նշել է. «Ամենամեծ խնդիրն առաջացել էր Մոսկվայի «Ֆուդ սիթի» մեծածախ առևտրի շուկայում, որի կայանատեղիում երկու օր է կայանած էին հայաստանյան պետհամարանիշերով բեռնատարներ ՝ բեռնված գյուղատնտեսական մթերքներով և մասնավորապես՝ ծիրանով: Եվ երեկ, երբ շատերս կոչով դիմեցինք Ռուսաստանում ապրող մեր հայրենակիցներին՝ հորդորելով օգնել, գնալ և հենց բեռնատարներից գնել հայկական գյուղմթերքը, սիրելիներս, տեղի ունեցավ իսկապես ֆանտաստիկ մի բան. Ռուսաստանում ապրող մեր հայրենակիցները, որոնք իրազեկվեցին, որ նման խնդիր կա, հարյուրավոր կիլոմետրեր հատելով շարժվեցին դեպի տարբեր քաղաքների՝ Մոսկվա, Սանկտ Պետերբուրգ, Կրասնոդար, Վորոնեժ եւ այլ քաղաքների գյուղատնտեսական շուկաներ, որտեղ, ադրբեջանցիները, ձեռք բերելով շուկաների սեփականատերերի հետ համաձայնություններ, տարբեր արհեստական խոչընդոտներ ստեղծելով թույլ չէին տալիս մեր բեռնատարների մուտքը շուկաների տարածք և ժամերի ընթացքում Ռուսաստանի մեր հայրենակիցները գնեցին Հայաստանից տարված ծիրանն ու գյուղատնտեսական այլ մթերքներ»:

Ռուսաստանում ապրող մեր հայրենակիցները մեկ մարդու պես միավորվեցին և հատելով անգամ Մոսկվայից 100-200 կիլոմետր, հասան «Ֆուդ սիթի» շուկա և օգնեցին հայաստանցի իրենց հայրենակիցներին:

«Սա ևս պատերազմ էր և էս պատերազմում ևս մենք հաղթեցինք»,- գրել է Նաիրա Զոհրաբյանը։

Պատգամավորը նաև տեղեկացել է, որ թե՛ ՌԴ-ում Հայաստանի դեսպանը, թե՛ Ռուսաստանի հայերի միությունը կապ են հաստատել Մոսկվայի «Ֆուդ սիթի» շուկայի սեփականատերերի հետ, ընթացել են բանակցություններ և հույս ունենանք, որ խնդիրը վերջնականապես կկարգավորվի:

Ներկայացնում ենք նաև հայերի՝ Ծիրանի վաճառքի հայտարարությունը, վայրը և ժամը.

«Մոսկվայի բնակիչներ ջան~

«Ֆուդ Սիթիից» դուսր հանված հայկական ծիրանը կարելի է գնել հետևյալ հասցեներով՝

ԱԿ «Բուխտա», 165 Դմիտրովսկոյե մայրուղի, 1-ին կորպ. 06:00-ից 19:00-ն

ԱԿ «Շելկովի Պուտ», Մոսկվա, ՄԿԱԴ, 32-րդ կմ (արտաքին հատված)՝ ժ, 09:00-ից 22:00-ն:

Ծիրանի 1 կգ արժեքը 100-150 ռուբլի է»։

Աղբյուր` Փաստինֆո