Փաստ ինֆո

ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը միջնորդություն ներկայացրեց՝ դատակոչի ցուցակը լրացնելու մասին։ Նա հստակեցրեց, որ այդ միջնորդությունը ներկայացված էր դեռևս դատավոր Դավիթ Գրիգորյանին, ուստի՝ որոշակի ձևակերպումներ դատավարության այս փուլին չեն վերաբերում՝ հասկանալի պատճառներով։

Ալումյանը նշեց, որ, եթե դատարանը կայացնի դատական քննություն նշանակելու մասին որոշում, ապա միջնորդում են դատական նիստին կանչման ենթակա անձանց ցուցակում ընդգրկել հետևյալ անձանց՝ 2008թ մարտի 8-ին ՀՀ ՍԴ նախագահի պաշտոնը զբաղեցրած Գագիկ Հարությունյանին, ինչպես նաև՝ դատավորներ Հրանտ Նազարյանին, Կիմ Բալայանին, Վլադիմիր Հովհաննիսյանին, Ֆելիքս Թոխյանին։ Նրա խոսքով՝ այս անձինք մասնակցել են նախագահի թեկնածուներ Լևոն Տեր-Պետրոսյանի և Տիգրան Կարապետյանի դիմումների հիման վրա՝ ՀՀ նախագահ ընտրվելու մասին որոշումը վիճարկելու վերաբերյալ գործի քննությանը և կարող են գործի համար կարևոր նշանակություն ունեցող տվյալներ հայտնել՝ ՍԴ դատավորների նկատմամբ ճնշում գործադրելու մասին, ընդ որում՝ Հրանտ Նազարյանն այդ գործով եղել է զեկուցող։ Հայկ Ալումյանը միջնորդեց նաև Սամվել Մայրապետյանին ներառել դատակոչի ցուցակում, քանի որ գտնում է, որ վերջինս կարող է կարևոր նշանակություն ունեցող տեղեկություններ հայտնել ՀՀ ՔՕ 311-րդ հոդվածով Ռոբերտ Քոչարյանին առաջադրված մեղադրանքի առնչությամբ։ Ըստ միջնորդության՝ դատակոչի ցուցակում պետք է ներառվի նաև ՀՀ ՊՆ նախկին նախարար Միքայել Հարությանյանը, ով ստորագրել է ՀՀ ՔՕ 300.1-րդ հոդվածով առաջադրված մեղադրանքում հանգուցային նշանակություն ունեցող ԹԻՎ «0038» հրամանը և կարող է հրամանի վերաբերյալ կարևոր տեղեկատվություն ներկայացնել։

Ալումյանն ընդգծեց, որ իր միջնորդության քննության համար դատարանը պետք է համոզվի հետևյալում՝ այս անձանց ցուցմունքները կարող են նշանակություն ունենալ գործի համար։ Յուրի Խաչատուրովի պաշտպան Միհրան Պողոսյանն էլ ասաց, որ ընտրել են պաշտպանվելու այն եղանակը, որ ցանկանում են որպես վկա դատարան հրավիրել և հարցաքննել ենթադրյալ դեպքի անմիջական ականատեսներին և քրեական գործով մեղադրանքի որոշման մեջ նշված որոշակի գործողություններ կատարած ենթադրյալ անձանց, մասնավորապես՝ Գևորգ Կոստանյանին, Մանվել Գրիգորյանին, Տիգրան Կարապետյանին, Վահագն Հարությունյանին և Արմեն Հակոբյանին։ Պողոսյանն ընդգծեց, որ քննիչը ևս նախաքննության ընթացքում գիտակցել է դրա անհրաժեշտությունը և Մանվել Գրիգորյանին, Արմեն Գևորգյանին, Գևորգ Կոստանյանին և որոշներին հարցաքննել է, իսկ մյուսներին՝ որպես վկա հարցաքննելու ծանուցում է ուղարկել, բայց, Պողոսյանի խոսքով, քննիչը դիմել է ինչ-որ հնարքի և այս անձանց դատակոչի ցուցակում չի ընդգրկել։

«Այսինքն՝ այս անձինք կարևոր տեղեկություններ կարող են հայտնել քրեական գործի վերաբերյալ, մինչդեռ՝ քննիչը մեղադրական եզրակացության հավելվածում՝ դատակոչի ցուցակում տվյալ անձանց տվյալները չի ընդգրկել»,- ասաց Միհրան Պողոսյանը։

Սեյրան Օհանյանի պաշտպան Կարեն Մեժլումյանը ևս ներկայացրեց դատակոչի ցուցակը լրացնելու մասին միջնորդություն։ Նա նշեց, որ ՔՕ 300-րդ հոդվածի իրավական որոշակիության վերաբերյալ միջնորդության ընթացքում մեջբերել էր Հովիկ Աբրահամյանի հրամանը և նրա հրամանով աշխատանքային խումբ էր ստեղծվել՝ Դավիթ Հարությունյան, Արմեն Ռուստամյան, Ավետ Ադոնց և Արծրունի Աղաջանյան կազմով, ինչպես նաև, մեջբերել էր ԱԺ նիստի սղագրումից նրանց դիրքորոշումները։ Պաշտպան Կարեն Մեժլումյանը միջնորդեց՝ Հովիկ Աբրահամյանին, Դավիթ Հարությունյանին, Արմեն Ռուստամյանին, Ավետ Ադոնցին և Արծրուն Աղաջանյանին՝ սույն գործով որպես վկա հրավիրելու և հարցաքննելու համար, պարզելու ՝ կապված էին ՞ ՔՕ փոփոխությունը 300-րդ հոդվածի իրավական որոշակիություն չունենալու հետ և այս նոր փոփոխությամբ ինչպես են պատկերացնում «Յոթի» գործով անձանց ազատ արձակումը։

Պաշտպանական կողմը միացավ ներկայացված միջնորդություններին։ Պաշտպան Խուդոյանն էլ ասաց, որ առ այսօր օբյեկտիվ հնարավորություն չի եղել հասկանալու, թե ովքեր կարող են այս գործով որպես վկա հարցաքննվել։ Խուդոյանն ընդգծեց, որ դատարան են ուղարկվել մեղադրանքն ապացուցող ապացույցները և նյութերի մի մասը դեռևս հասանելի չէ պաշտպանական կողմին։ Դատական նիստը հետաձգվեց՝ աշխատանքային օրվա ավարտի կապակցությամբ։ Հաջորդ դատական նիստը տեղի կունենա հուլիսի 21-ին՝ ժամը 13։00-ին։

Սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։ Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Ինչպես ավելի վաղ հայտնել ենք՝ հունիսի 18-ին Վերաքննիչ քրեական դատարանը՝ նախագահությամբ դատավոր Արսեն Նիկողոսյանի, ՀՀ երկրորդ նախագահ Ռոբերտ Քոչարյանի նկատմամբ խափանման միջոց է կիրառվել գրավը՝ 2 մլրդ ՀՀ դրամի չափով։ Դատարանի դեպոզիտ հաշվին գրավի գումարը փոխանցելուց հետո Ռոբերտ Քոչարյանն ազատ է արձակվել։

Հեղինակ՝ Իզաբել Սահակյան

Աղբյուր` Փաստինֆո