Փաստ ինֆո

Մենք հույս ունեինք, որ որպես խորհրդարանական ընդդիմադիր խմբակցություն, մեր իրավունքը կվերականգնվի: Այս մասին ԱԺ-ում լրագրողների հետ զրույցում նշեց «Լուսավոր Հայաստան» խմբակցության պատգամավոր Անի Սամսոնյանը՝ անդրադառնալով «Լուսավոր Հայաստան» խմբակցության մեկ մանդատը վերականգնելու հարցով ԿԸՀ ներկայացված դիմումին։ «Փաստինֆո»-ն արդեն տեղեկացրել է, որ հուլիսի 8-ին տեղի ունեցած նիստում ԿԸՀ-ն մերժել է խմբակցության դիմումը։ 

«Մենք խնդիր ենք տեսնում, որ մեր խմբակցության մանդատով կարող են իրականացնել այլ քաղաքական գործունեություն, ստեղծել այլ քաղաքական նախաձեռնություն, «Լուսավոր Հայաստան»-ի նկատմամբ իրականացնել հակաքարոզչություն Մենք կդիմենք բողոքարկման ընթացակարգերին»,-ասաց նա՝ հավելելով, որ այս պահին չի կարող ասել, թե որոնք են լինելու իրենց հաջորդ քայլերն այս ուղղությամբ:
Անի Սամսոնյանը նշեց, որ այսպիսի հարցերին օրենսդրական կարգավորման անհրաժեշտություն կլինի թե Սահմանադրության մակարդակով, թե օրենքների: Նա ընդգծեց, թե 2015-ից ի վեր պառլամենտական սուբյեկտ է միայն խմբակցությունը, անկախ պատգամավորի սուբյեկտ չկա, չունի որևէ իրավունք:

«Մենք չենք կարող թույլ տալ, որ Պառլամենտում լինեն սուբյեկտներ, որոնք իրավունքներ չունեն, այն պարագայում, երբ այդ սուբյեկտները ԱԺ են մտել «Լուսավոր Հայաստան» քաղաքական ուժի շնորհիվ, կրում են այդ ուժի մանդատը, բայց հակաքարոզչություն են անում այդ ուժի դեմ եւ ստեղծում են քաղաքական նախաձեռնություն: Դա չպետք է արվի մեր մանդատով»,-նշեց ԼՀԿ պատգամավորը:

«Արման Բաբաջանյանն իրեն համարում էր «Լուսավոր Հայաստանի» համակիր, բայց պարզվեց, որ դա շղարշ էր մեր միջոցով խորհրդարան մտնելու այլ նպատակներ իրականացնելու համար, որը մեզ համար անընդունելի է: Ես այն պատգամավորներից եմ, որը ներողություն է խնդրել, որ Արման Բաբաջանյանն այսօր պառլամենտում է»:

Դիտարկմանը, թե Բաբաջանյանը պնդում է, որ մանդատը ոչ թե «Լուսավոր Հայաստան»-ինն է, այլ ժողովրդինը, Սամսոնյանն ընդգծեց, որ Բաբաջանյանն ընտրվել է համամասնական, ոչ թե ռեյտինգային ցուցակով, 300-ից մի քիչ ավելի ձայներով, ամենաքիչ ձայներ ստացած պատգամավորն է:

Ինչ վերաբերում է նրան, որ Արման Բաբաջանյանը նշում է նաև, թե ԼՀԿ-ն ընդդիմություն չէ, և դրա համար է դուրս գալիս, Սամսոնյանն արձագանքեց. «Դավաճանությանը հակված մարդիկ միշտ փնտրում են մեղավորներ: Դա հոգեբանական անհրաժեշտ բաղադրիչ է բոլոր դավաճանների համար»:

Դիտարկմանը՝ եթե Բաբաջանյանը զրկվի մանդատից, հնարավո՞ր է՝ նրա՝ մինչ այդ կատարած քվեարկությունները համարվեն առոչինչ, Սամսոնյանն արձագանքեց. «Ես համարում եմ, որ Արման Բաբաջանյանը իշխանության 89-րդ պատգամավորն է, և իրենք թող մտածեն նրա քվեարկությունների մասին»,-ասաց նա՝ նշելով, թե երբ ԼՀԿ-ն դիմեց ԿԸՀ, «Իմ քայլը» պաշտպանում էր իր 89-րդ մանդատը»։

Անի Սամսոնյանը հավելեց, թե այն, որ Արման Բաբաջանյանին թողեցին ակցիան անել, ևս մեկ անգամ վկայում է, որ նա ունի իշխանության թույլտվությունը, եւ Ոստիկանությունը կարող է նրան չմոտենալ. «Երբ ակցիա անողները պատկանում են իշխանության համակիրների՝ «սպիտակների» դաշտին, իրենց չի կարելի բերման ենթարկել, եթե «սպիտակների» դաշտում չեն, կարելի է: Մոտեցումը եղել է ընտրողաբար: Ոստիկանությունը ենթակա է ՀՀ վարչապետին, հետևաբար կատարում է այն հրահանգները, որոնք իրեն տրված են: Եթե ոստիկանությանը հրահանգում են հեռացնել այն իրավապաշտպանին, որը համարվում է «սև», նրան կհեռացնեն, եթե Ոստիկանությանը չի տրվում հրահանգ որեւէ տարածքից հեռացնել ԱԺ իշխանության 89-րդ պատգամավորին, չի հեռացնի»,-ասաց Անի Սամսոնյանը:

Աղբյուր` Փաստինֆո