Փաստ ինֆո

ԱԺ արտահերթ նստաշրջանը մեկնարկեց։ Օրակարգում 14 հարց է։ 

ԱԺ «Լուսավոր Հայաստան» խմբակցության քարտուղար Գևորգ Գորգիսյանն ասաց, որ այդքան էլ հասկանալի չէ այս նախագծերի հրատապությունը. ««Իմ քայլը» խմբակցության մի մասը վարակակիր է, մյուս մասը կոնտակտավոր է ու այդպես էլ ըստ պարետի որոշման՝ 14 օր չի ինքնամեկուսացել։ Հիմա բոլորով հավաքվել ենք՝ քննարկելու նախագծեր, որոնց հրատապությունն այդքան էլ հասկանալի չէ։ Ինչո՞վ է պայմանավորված այս նախաձեռնությունը, որովհետև նախագծերի առնվազն 90 տոկոսը կարելի էր սեպտեմբերին նորմալ քննարկել՝ վստահ լինելով, որ այլևս վարակակիր չունենք»,-ասաց Գևորգ Գորգիսյանը։

ԱԺ «Իմ քայլը» խմբակցության պատգամավոր Սիսակ Գաբրիելյանն էլ նկատեց՝ կան նախագծեր, որոնց անհրաժեշտ է անդրադառնալ. «Եթե տեղեկություն ունեք, որ որևէ մեկն այստեղ նստած է և պարետի որոշմամբ պետք է ինքնամեկուսացվեր, բայց չի ինքնամեկուսացվել, կխնդրեմ այս պահին բարձրաձայնեք։ Գուցե այդ հայտարարությունից հետո ԱԺ նախագահն այլ քայլեր ձեռնարկի»,-ասաց Սիսակ Գաբրիելյանը։

Գևորգ Գորգիսյանն էլ ասաց, որ առնվազն տեսնում է պատգամավորներ, ում մասին հայտարարվել էր, որ կորոնավիրուսով հիվանդացել է և 14 օրը չի լրացել. «Օրինակ էստեղ մեծ փաթեթներ կան, որ ոչ միայն 24-ժամյա ռեժիմի հետ խնդիր ունեն, այլ ընդհանրապես ավելի լայն քննարկման կարիք ունեին, և այսպես հրատապ ռեժիմով մտցնել ու այս իրավիճակում ընդունել, իրոք չեմ հասկանում»,-ասաց Գևորգ Գորգիսյանը։

ԱԺ նախագահ Արարատ Միրզոյանն էլ ասաց, որ բոլոր այն պատգամավորները, որոնք մեկուսանալու և ինքնամեկուսանալու ցուցում ունեն, մեկուսացած և ինքնամեկուսացած են. «Այն պատգամավորները, որոնք նախկինում եղել են կորոնավիրուսով հիվանդ, կոնկրետ տիկին Պողոսյանի դեպքում արդեն 16 օր է լրացել և բացասական թեստի արդյունքներով կազդուրված է»,-ասաց ԱԺ նախագահը։

Աղբյուր` Փաստինֆո