Փաստ ինֆո

Այն, որ պետության ղեկին պատահաբար հայտնվածները սիրո և համերաշխության, բաց ձեռքերի թավշյա դիմակի տակ եկան իշխանության, արդեն շատ քչերի մոտ է կասկածներ թողնում: 

Քանի որ սիրուն շատ արագ փոխարինեց ատելությունը, համերաշխությանը՝ ազգը՝ բաժանարար գծերի՝ սևի ու սպիտակի բաժանելը:

Ինչ վերաբերվում է ,,թավշյա, բաց ձեռքերի հեղափոխություն,, բնորոշումներին, ապա դրանք նույնպես կարճ ժամանակ անց ձևախեղվեցին, երբ դրսից իմպերատիվ հրահանգներ իջան, թե՝ թավիշը արդեն պիտի մոռանալ և փոխարինել այն կոշտ մեթոդներով: Կոշտ մեթոդների առաջին կիրառումը մեծ հաշվով, սկսվեց դատաիրավական համակարգի դեմ վեթթինգի վարչապետական հրահանգով: Սա առաջին փուլն էր, սակայն այն կոնկրետ շերտի է վերաբերվում, իսկ ավելի ուշ, կորոնավիրուսի դեմ պայքարի համատեքստում թավշյա մեթոդաբանությունն իսպառ մոռացվեց և դրան տոտալ կերպով փոխարինելու եկավ բռնի, կոշտուկոպիտ գործողությունների մեթոդիկան:

Այդ մեթոդներից զերծ չմնացին ոչ խորհրդարանական, ոչ էլ՝ արտախորհրդարանական ուժերը, ո՛չ լրատվամիջոցների ներկայացուցիչները, ո՛չ էլ ՀՀ շարքային քաղաքացիները:

Ընդ որում, հետաքրքիր է, որ եթե համավարակից առաջ միայն ուժայինների՝ օպերատիվ գործողություններ իրականացնող աշխատակիցներն էին դիմակավորված, ապա հիմա ՀՀ բոլոր քաղաքացիների դիմաց կարող է կանգնել բարեփոխված, իմա՝ իշխամության կամոք բռնի մեթոդների դիմելու մեծ արտոնություններով օժտված ոստիկանության ներկայացուցիչը, որն այսօր իրականում՝ հանուն իշխանության ուժի ցուցադրանքի, սակայն՝ թաքնվելով կորոնավիրուսի դեմ պայքարի դիմակի տակ՝ կարող է անարգել հարձակվել փողոցում, կամ՝ ավտոմեքենայում գտնվող մարդկանց վրա և նրանց հանդեպ բռնի ուժ գործադրել՝ դիմակ չկրելու պատրվակն օգտագործելով, բնականաբար, իրենց տրված մեծ արտոնությունների շրջանակում էլ տուգանելով սոցիալ-տնտեսական բեռան տակ կքած ՀՀ քաղաքացուն:

Ընդ որում, ոստիկանության այս նոր տիպի համար առավել քան միևնույն է, թե՝ իր դիմաց կանգնած է պատկառելի տարիք և բազմաթիվ հիվանդություններ ունեցող մարդ, որն իր մի հարվածից կարող է ընդհուպ հրաժեշտ տալ կյանքին՝ ինֆարկտից կամ ճնշման բարձրացումից:

Այսօրինակ մի դրվագ, որը տեղի էր ունեցել Ստեփանավան քաղաքում, այսօր տարածվում է համացանցում: Ոստիկանները հարձակվել և քաշքշում էին քաղաքացիներևին, թե՝ նրանց մեջ հայտնաբերվել է մեկը, որը դիմակ չի կրում: Որպես արդյունք, ոստիկանները դիմակ չկրելու ,,պատժի,, իրենց իսկ հորինած տուգանքից այդ մարդուն հերոսաբար հասցրեցին իշխանազանցության:

Այսինքն, սա կոչվում է համավարակի դեմ արդյունավետ պայքար, քանի որ այն այսօր ամբողջովին տեղավորված է հնարավորինս շատ տույժ-տուգանք ծրագրի հաջող իրականացումն ապահովելու մեջ:

Կորանայի դեմ պայքարի դիմակներն ամբողջովին դիմակազերծ են անում ներկաներին:

Մեկ-մեկ ընկնում են թավիշը դիմակ դարձրածների դիմակները:

Հեղինակ՝ Մ. Մինասյան

Աղբյուր` Փաստինֆո