Փաստ ինֆո

ԼՀԿ-ն ողջունում է, որ Արման Բաբաջանյանը կարող է կուսակցություն, քաղաքական ուժ ստեղծել, բայց դա չպետք է լինի ի հաշիվ ԼՀԿ-ի տրված մանդատի։ ԿԸՀ նիստից հետո հայտարարեց «Լույս» դաշինքի ղեկավար Դավիթ Խաժակյանը։

«Պատգամավորը, որն ընտրվել է մի կուսակցության ցուցակով, հիմա ձևավորել է նոր կուսակցություն և մանդատը, որը ստացել է ԼՀԿ-ի միջոցով ծառայեցնում է բոլորովին այլ կուսակցություն ստեղծելու համար։ Մենք կարծում ենք անընդունելի է, հակասում է ժողովրդի կամարտահայտությանը՝ կուսակցությանը տրված ձայների հարաբերակցությանը, և դա պետք է վերականգնվեր։ Հատկապես հաշվի առնելով, որ Բաբաջանյանը այս խորհրդարանում ամենաքիչ ձայն ստացած պատգամավորն է։ Իրավիճակն այնպիսինն է, որ եթե նա գոնե մեծամասնական ընտրակարգով բավարար քվեներ ստացած լիներ, կասեր, որ նա արժեք ունի, բայց դա չկա»,- ասաց Խաժակյանը։

Ըստ նրա՝ ԼՀԿ-ի խնդիրը ընդդիմադիր խմբակցություների մեկ երրորդի համամասնությունը վերականգնելն էր, դրա լուծումը կարող էր լինել և հավելյալ մանդատ տրամադրման ճանապարհով, կամ այս կամ այն կերպ Բաբաջանյանին պարտադրել վայր դնել մանդատը և ԼՀԿ 18 մանդատը վերականգնել։

«Որպես համամասնական ցուցակով ընտրված պատգամավոր նա գուցե ինչ որ աշխատանք ուներ կատարելու, որը ստացել էր մոտ 300 ձայն վաստակելով, բայց նա որոշեց խմբակցությունից դուրս գալ։ Այս իմաստով մանդատի դնել-չդնելու հարցը պետք է սկզբունքային լիներ իր համար և նա գնար նոր կուսակցություն ձևավորեր՝ ոչ այլ ուժին տրված մանդատի հաշվին»,- ասաց Խաժակյանը։

Նա տեղեկացրեց, որ խմբակցությունը կծանոթանա ԿԸՀ որոշմանը, որից հետո միայն կորոշեն հետագա գործողությունները։

«Առաջին օրը, երբ հայտարարվեց, որ Բաբաջանյանը դուրս է գալիս խմբակցությունից, ԼՀԿ-ն տեսակետ էր հայտարարել, առ այն , որ նա պետք է իր մանդատը վայր դնի, որից հետո նա ասաց պետք է մտածի այդ հարցի շուրջ։ Ժամանակ անցավ նա շարունակեց գործել։ Պարզ դարձավ, որ ընտրողը նրան ձայն է տվել որպես ԼՀԿ մաս, նա ստեղծում է ինչ որ կուսակցություն, որով այլ բանի է ծառայեցնում մանդատը։ Սա բերում է այն խնդրի, երբ ընդդիմության մեկ երրորդը գոյություն չի ուեննա և չի լինի այդ լիազորությունը»։
Խաժակյանը չի բացառում, որ առաջիկայում գործընթացներ լինեն, որոնք էլ ավելի կխորացնեն ճգնաժամը։

«Անգամ ԿԸՀ-ն կարող էր սեփական վարույթը հարուցել, որովհետև իր արձանագրության մեջ մեկ ութերորդը այդ պահին ակնհայտորեն խախտվեց։ Չեմ բացառում, որ առաջիկայում գործընթացներ լինեն, որոնք էլ ավելի կխորացնեն ճգնաժամը։ Պատկերացրեք մարդիկ իշխանությունից դուրս գան և ամբողջությամբ այն երաշխիքները, որոնք սահմանված են սահմանադրական օրենքներով, ոչ իշխանության տեսանկյունից գործի, ոչ ընդդիմության, թեպետ իմքայլական պատգամավորներից մեկը պաշտպանում էր այն թեզը, որ մեր դիմումն ըստ էության հիմնավորված չէր, ինչից ես ենթադրում եմ, որ իշխանությանը հաճո է, որ լինի 88 պլյուս մեկ և սա հիմնավորում է, որ մարդը, որը որպես ընդդիմադիր ընտրվել է, գնա և իշխանությանը հաճո գործողություններ իրականացնի»։

«Ճգնաժամը կառաջանա իշխանության թե ընդդիմության ներսում, էական չէ, սահմանադրական չգնաժամը լավ բանի չի բերում»,- նշեց ասում է Խաժակյանը։

«Հիմա ըստ էության նետվում է առաջին քարը, որ դրվում է հետագա ճգնաժամը զարգացնելու իմաստով։ Հիմա տեսնում ենք այն գործընթացները, որ տեղի են ունենում այդ թվում և Սահմանադրական դատարանի տեսանկյունից, մի օր ի վերջո բերելու են այդպիսի ճգնաժամային իրավիճակների, որի լուծումը խնդիրների նկատմամբ աչք փակելն է»,- ասաց Խաժակյանը։

Վերջում Խաժակյանը նշեց, որ կարծում է քաղաքապետը ուրախությամբ կընդունի այս որոշումը։

Աղբյուր` Փաստինֆո