Փաստ ինֆո

«Հայոց եկեղեցու պատմություն» առարկայի հարցում պետք է կարևորենք մի շարք հարցեր և վերանայենք մոտեցումը, վերանայենք ու շտկենք, այլ ոչ թե ուղղակի հանենք, ինչպես նախկինում ընդունեցին՝ առանց շատ հարցեր քննարկելու։ Այս մասին «Փաստինֆո»-ի հետ զրույցում ասաց ԱԺ «Իմ քայլը» խմբակցության պատգամավոր Սոֆյա Հովսեփյանը։ 

Պատգամավորը նկատեց՝ «Հայոց եկեղեցու պատմություն» առարկայի դասավանդման այն ձևը, որն ընտրված է և դասավանդվում է, խնդրահարույց է, որովհետև ամբողջությամբ անտեսվում է կրոնի ազատության մասին օրենքը.

«Դասարաններում լինում են երեխաներ, որոնք ունեն լրիվ այլ հավատամք, այլ արժեքներ և ստիպված են լինում պարտադիր աղոթել։ Սրանք իհարկե շտկվող հարցեր են։ Սա շատ հուզական թեմա է և վստահ եմ, որ եկեղեցին պատրաստ է քննարկումների, կոմպրոմիսներ գտնել, պարզապես քննարկման կարիքը կա, բայց քննարկումը չի լինում»,-ասաց Սոֆյա Հովսեփյանը։

Թե ինչու մասնագիտական համայնքի հետ քննարկում չի լինում, պատգամավորը նկատեց՝ ճիշտ կլինի ԿԳՄՍ նախարարությունից հարցնենք, թե ինչու են առանց քննարկումների միանգամից նման կտրուկ որոշումների գնում.

«Իրենք ասացին, որ քննարկում եղել է, ուրեմն պատշաճ քննարկում չի եղել, ինչի արդյունքում էլ եկեղեցին, մասնագետները, ծնողներն անընդհատ խոսում են, որ քննարկված չէ։ Ինքս ամբողջ չափորոշիչների հետ կապված առաջարկներ եմ արել, կհանդիպենք ու կհասկանանք՝ առաջարկներից որոնք են ընդունվել, որոնք՝ ոչ։ Հայոց եկեղեցու պատմություն առարկան էլ պատրաստվում ենք հանձնաժողովով քննարկել»,-նշեց պատգամավորը։

Հարցին՝ չափորոշիչների մեջ իրեն անհանգստացնող կետեր կա՞ն, Սոֆյա Հովսեփյանն ասաց, որ կան որոշակի կետեր, որոնք լղոզված են գրված և չգիտի, թե դրա տակ ինչ են ասել. «Ակնկալում եմ, որ իրենք պետք է բացատրեն, ինչից հետո պետք է հասկանամ օրինակ առանձնահատկություն ասելը որն է կամ ինչու ենք երեխաների հետ կանանց և տղամարդկանց իրավունքների մասին խոսելու, երբ մենք պետք է խոսենք մարդու իրավունքների մասին»,-ասաց Սոֆյա Հովսեփյանը։

Անդրադառնալով լուրերին, համաձայն որի՝ դպրոցներում հայոց լեզու և գրականություն առարկայի դասաժամերը կրճատվելու են, պատգամավորն ասաց, որ ժամաքանակի հարցով դիմել է ԿԳՄՍ փոխնախարարին և վերջինս ասել է, որ դասաժամի կրճատում կամ նմանատիպ ինչ-որ բան չկա. «Սպասում եմ, որ բացատրություններ տան։ Այսինքն այնտեղ ուղղակի հասկանալի չէ։ Այն, ինչ ինքը բանավոր բացատրեց, այլ բան էր, այն, ինչը խոսեց, եթե ճիշտ եմ հիշում համաժողովի ժամանակ, այդ ժամանակ հարցեր առաջացան»,-նշեց պատգամավորը։

Ինչ վերաբերում է նախնական զինվորական պատրաստվածություն առարկան դպրոցական ծրագրից հանելու վերաբերյալ տեղեկություններին, Սոֆյա Հովսեփյանն ընդգծեց՝ բացառվում է այդ առարկան հանեն. «Եթե այն հանեն, նշանակում է՝ մենք չափորոշիչ չենք փոխելու։ Հավատացնում եմ, որ ՆԶՊ-ն այսօր հայոց լեզվին հավասար առարկա է մեր երկրի համար։ Ավելին, ոչ թե պետք է հանվի, այլ հզորացվի, ուժեղացվի, որ վերջապես պատահականությունների զոհ տղաներ այլևս չունենանք։ Ոչ թե անպատրաստվածության կամ անփորձության զոհ լինեն, այլ պատրաստված, պատերազմում հաղթող լինեն»,-ընդգծեց Սոֆյա Հովսեփյանը՝ հավելելով, որ թյուրընկալումները քիչ հաղորդակցման, քիչ քննարկվածության արդյունքն են։

Հեղինակ՝ Հասմիկ Կոշկարյան

Աղբյուր` Փաստինֆո