Փաստ ինֆո

Պաշտպանական կողմն ամենաշատն է շահագրգռված՝ ապացույցների հետազոտման փուլ անցնելուն: Այս մասին ՀՀ երկրորդ նախագահ Ռոբերտ Քոչարյանի և մյուսների գործով դատական նիստին ասել է ՀՀ նախկին փոխվարչապետ Արմեն Գևորգյանի պաշտպան Էրիկ Ալեքսանյանը՝ անդրադառնալով մեղադրող դատախազների ներկայացրած միջնորդությանը: Նշենք, որ մեղադրող դատախազները միջնորդել են դատարանին՝ ճանաչել ամբաստանյալների պաշտպանների գործողություններում միջնորդություններ ներկայացնելու դատավարական իրավունքի չարաշահումը և սահմանափակել դատական նիստի նախապատրաստական մասի ենթափուլն ու դրանում միջնորդություններ ներկայացնելու հնարավորությունն, անցնել դատաքննության՝ հնարավորություն տալով իրենց հրապարակել մեղադրական եզրակացության եզրափակիչ մասը: 

Ալեքսանյանն ընդգծեց, որ տվյալ դեպքում պաշտպանները գործել են իրենց օրենքով վերապահված իրավունքների շրջանակներում, այն էլ բարեխղճության և ողջամտության սահմաններում, հակառակ դեպքում այն բազմաթիվ միջնորդությունները, որոնք ներկայացվել են և որոնք ըստ դատախազների, եղել են նույնաբովանդակ և կրկնվող, դատարանի կողմից կթողնվեին առանց քննության, սակայն ինչպես հայտնի է, դատարանը նման որոշում երբեք չի կայացրել, ինչը փաստացի հերքում է դատախազների այն պնդումը, որ պաշտպանների միջնորդությունները եղել են նույնաբովանդակ և կրկնվող:

Ինչ վերաբերում է դատախազների այն պնդմանը, որ պաշտպանների անբարեխիղճ վարքագծի պատճառով խախտվում են նաև տուժողների արդար դատական քննության իրավունքն, ապա Ալեքսանյանը նշեց, որ սույն քրեական գործով տուժողի դատավարական կարգավիճակ որևէ անձ չի կարող ունենալ, հետևաբար և առարկայազուրկ են համարում նշված փաստարկին խորապես անդրադառնալու, իսկ եթե նույնիսկ պայմանականորեն ընդունելի համարվի սույն գործով որպես տուժող ճանաչված անձանց կարգավիճակն, ապա միևնույն է պաշտպանների կողմից իրենց իրավունքների իրացումը չի հանգեցրել նրան, որ տվյալ անձինք հայտնվել են պաշտպանության կողմի համեմատ ավելի անբարենպաստ պայմաններում: Պաշտպանն անդրադարձավ նաև դատախազների այն պնդմանը, թե դատախազներին բացարկի միջնորդություն են ներկայացրել միայն այն բանի համար, որ նրանք մեղադրանքի, այլ ոչ թե՝ պաշտպանության կողմում են, ինչը դատախազների պնդմամբ զավեշտալի է: Մինչդեռ, ըստ փաստաբանի, զավեշտն այն է, որ դատախազները, ովքեր պետք է իրականացնեն իրավունքի պաշտպանություն, ներկայումս պաշտպանում են մի մեղադրանք, որը որևէ աղերս չունի իրավունքի և առհասարակ իրավաբանության հետ

Բացի այդ՝ Ալեքսանյանը հիշեցրեց նաև դատախազ Կարեն Բիշարյանի նախկինում հնչեցրած դիրքորոշումը, որը մինչ տվյալ գործով քրեական հետապնդում հարուցվելը, ՀՀ Ազգային ժողովի ամբիոնից փաստացի ընդունել է, որ սույն քրեական գործով քրեական հետապնդում հարուցելու և իրականացնելու տարրեր առկա չեն, սակայն ներկայումս պաշտպանում է մեղադրանքը: «Զավեշտն այն է, որ սույն գործով անխտիր բոլոր դատախազներն առանց ողջամիտ հիմնավորման հրաժարվել են ՀՀ ՔՕ 300,1-րդ հոդվածի հետադարձ ուժի վերաբերյալ՝ տևական ժամանակ անփոփոխ մնացած պետական դիրքորոշումից, իսկ զավեշտի կլասիկան այն է, որ մեղադրողները պաշտպանների կողմից իրավունքի չարաշահման վերաբերյալ միջնորդությունը ներկայացրել են այն ժամանակ, երբ դրա մասին մամուլում հանդես է եկել իշխող ուժի ներկայացուցիչ, ՀՀ ԱԺ պատգամավոր Անդրանիկ Քոչարյանը, ինչը հերթական անգամ ընդգծում է այն հանգամանքը, որ դատախազությունը սույն քրեական գործով կայացվելիք որոշումներում և կատարվելիք գործողություններում բառի իրական բովանդակությունից ՝ ինքնուրույն և անկախ չեն»,- ասաց փաստաբանը։

Ինչպես ավելի վաղ հայտնել ենք՝ հունիսի 18-ին Վերաքննիչ քրեական դատարանը՝ նախագահությամբ դատավոր Արսեն Նիկողոսյանի, ՀՀ երկրորդ նախագահ Ռոբերտ Քոչարյանի նկատմամբ խափանման միջոց է կիրառվել գրավը՝ 2 մլրդ ՀՀ դրամի չափով։ Դատարանի դեպոզիտ հաշվին գրավի գումարը փոխանցելուց հետո Ռոբերտ Քոչարյանն ազատ է արձակվել։

Սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Հեղինակ՝ Իզաբել Սահակյան

Աղբյուր` Փաստինֆո