Փաստ ինֆո

ՍԴ նիստերը որպես այդպիսին, կատարվում են գրավոր ընթացակարգով։ Ինձ հայտնի չէ, որ վաղը բանավոր ընթացակարգով նիստ նշանակված լինի, ինչը ենթադրում է, որ դասական ընկալման իմաստով նիստ չի լինի, հետևաբար՝ պլանավորում եմ նիստին ներկա չգտնվել։ Այս մասին «Փաստինֆո»-ի հետ զրույցում ասաց ՀՀ երկրորդ նախագահ Ռոբերտ Քոչարյանի պաշտպանական խմբի անդամ Արամ Օրբելյանը։

Նշենք, որ վաղը՝ հուլիսի 7-ին նշանակված է ՍԴ նիստ, որի օրակարգում են նաև ՀՀ երկրորդ նախագահ Ռոբերտ Քոչարյանի գործի վերաբերյալ դիմումները։ Ինչպես տեղեկացրել ենք՝ Ռոբերտ Քոչարյանը միջնորդություն է ներկայացրել դիմումից հրաժարվելու մասին, սակայն այն քննարկման առարկա չի դարձվել, քանի որ ՍԴ-ն չի կարողացել ապահովել քվորումը։ Կանխատեսվում է, որ հուլիսի 7-ին նշանակված ՍԴ նիստը ևս չի կայանա՝ կրկին քվորումի բացակայության հիմքով։

Ներկայացված դիմումների ճակատագրին անդրադառնալով՝ Օրբելյանն ասաց, որ մոտ մեկ տարի է, ինչ խոսվում է ճգնաժամ ունենալու մասին, բայց ճգնաժամ, ըստ պաշտպանի, նոր սկսեցինք ունենալ։

«Հիմա ինչ կլինի, այս պահին չեմ ցանկանում կանխատեսել, մեզանից հասնող ամեն ինչ արեցինք, որ գործընթացները մեզ հետ չկապեն։ Ամեն դեպքում՝ ունենք գործընթաց, ունենք դիմում, ունենք դիմումը ետ վերցնելու դիմում, ոչ մեկով, ոչ մյուսով որոշում չի կարող կայացվել՝ առանց քվորումի, ընդ որում՝ մեր դիմումի հիման վրա վերադարձնելու մասին ընթացակարգ՝ առանց նիստի, չկա։ Ինչ-որ մի պահի պետք է այդ խնդիրը լուծվի և որոշում կայացվի և ես հույս ունեմ, որ դա լինելու է օրինական կազմով »,- ասաց Օրբելյանը՝ նշելով, որ, եթե նույնիսկ օրինական կազմով չլինի, ապա դատապաշտպանության գործընթացներում կքննարկվեն գործողությունները։

Նրա խոսքով՝ փաստը մնում է փաստ, որ այս պահին կան ներկայացված դիմումներ և ակնկալում են այդ դիմումներով պատասխան։ Ավելին՝ Օրբելյանն ընդգծեց, որ Ռոբերտ Քոչարյանի հիմնական դիմումները շուրջ մեկ տարի է, ինչ ՍԴ-ում է, վարույթը շատ երկար ժամանակ կասեցված է եղել, քանի որ սպասվում էր ՄԻԵԴ և Վենետիկի հանձնաժողովի կարծիքները։

«Այդ կարծիքները ստացվել են, որից հետո ՍԴ-ն որոշել է նիստ գումարել, ինչին և հաջորդել է Սահմանադրության հապճեպ փոփոխությունը։ Իսկ թե ինչ զարգացում կունենա, չեմ ցանկանում կանխատեսել, որովհետև հիմա անիմաստ է։ Զարգացմանը համարժեք, համապատասխան իրավական պաշտպանության գործընթաց, գործիքակազմ կկիրառենք պարոն Քոչարյանի իրավունքների պաշտպանության համար»,- ասաց Օրբելյանը։

Ճշգրտող հարցին, թե արդյո՞ք՝ օրինական կազմ ասելով պաշտպանը նկատի ուներ, որ նոր նշանակված դատավորներով ՍԴ կազմը կլինի ոչ օրինական, Օրբելյանը պատասխանեց.«Ես չասացի՝ նոր կամ հին, ես ասացի, որ հույս ունեմ, որ օրինական կազմով, օրինական դատարանի կողմից կկայացվի որոշումը։ Որը կլինի օրինական, հիմա գործընթացների զարգացումից կտեսնենք, այսինքն՝ ես կոնկրետ անձանցով չեմ պայմանավորում դատարանի օրինական կամ ոչ օրինական լինելը, բայց մի շարք հիմքեր կան ենթադրելու, որ այս պահին կրիզիսի որոշ լուծումներ կարող է բերել ոչ օրինական կազմի, բայց դա չի նշանակում նորը կամ հինը։ Ես պարզապես ասացի, որ օրինական կազմով կստանանք դատարանի որոշում՝ կլինի դա հետ վերադարձնելու, թե կլինի, ըստ էության, գործի քննության, դատարանը կորոշի»։

Օրբելյանը նշեց, որ հարցի վերաբերյալ ունի դիրքորոշում, չի ցանկանում որակումներ տալ, բայց քանի որ այժմ քննարկվում է Ռոբերտ Քոչարյանի գործի վերաբերյալ, ապա էական է 6-րդ հոդվածի՝ գործն օրինական դատարանի կողմից քննելու հանգամանքը և դատարանի կազմի փոփոխությունը՝ գործով պատասխանողի կողմից կամայականորեն՝ 1/3-րդ-ով առնվազն, ապա կարող է քննարկվել օրինական դատարանի սկզբունքի խախտման տեսանկյունից, իսկ ԱԺ-ն այդ գործով պատասխանող է։

«Իմ գնահատմամբ՝ դատարանի կազմի փոփոխությունը գործի ընթացքում, որը նախատեսված չի եղել օրենքով և հիմք է փոփոխության և դա արվել է պատասխանողի կողմից՝ ի հավելումն ամեն ինչի, կարող է դիտվել 6-րդ հոդվածի խախտում»,- ասաց փաստաբանը՝ նշելով, որ նմանատիպ դեպքեր արդեն քննվել են ՄԻԵԴ-ում։

Հեղինակ՝ Իզաբել Սահակյան

Աղբյուր` Փաստինֆո