Փաստ ինֆո

Հայաստանյայց Առաքելական Սուրբ Եկեղեցուն օրենսդրությամբ տրվել է դասական կրոնական կազմակերպության կարգավիճակ, որը գրանցվել է 1998թ, երկու ֆիզիկական անձի կողմից: Այսինքն` հայ եկեղեցին կարող է լուծարվել, ինքնալուծարվե՞լ, - ՀՀ Սահմանադրության ընդունման 25-ամյակին նվիրված միջոցմանը հայտարարել է իրավաբանական գիտությունների դոկտոր, պրոֆեսոր Արթուր Ղամբարյանը:

Նշենք, որ Սահմանադրության օրվա կապակցությամբ «Իրավական ուղի» կազմակերպությունը այսօր Գոշավանքում հրավիրել է խորհրդաժողով` «ՀՀ Սահմանադրություն․ կարմիր և կանաչ գծեր» խորագրով:

Ա.Ղամբարյանը, խոսելով հայ եկեղեցու իրավական կարգավիճակի մասին, նշեց, որ ՀՀ-ն ճանաչում է Հայ Առաքելական Սուրբ Եկեղեցին որպես ազգային եկեղեցի և նրա բացառիկ առաքելությունը հայ ժողովրդի հոգևոր կյանքում, նրա ազգային մշակույթի զարգացման և ազգային ինքնության պահպանման գործում, բայց օրենսդրությամբ շարունակում է համարել դասական կրոնական կազմակերպություն: «ՀԱՍԵ-ն որպես մասնավոր իրավունքի իրավաբանական անձ (դասական կրոնական կազմակերպություն) համարելու դեպքում նրա իրավասուբյեկտությունը կախվածության մեջ է դրված պետական գրանցումից», - նշել է Ա.Ղամբարյանը` ավելացնելով, որ այն որպես կրոնական կազմակերպություն հետևյալ անվանումով` «Հայաստանյայց Առաքելական Սուրբ Եկեղեցի» Կրոնական կազմակերպություն, գրանցվել է 1998թ-ին` Հակոբ Գևորգյանի և Ներսիսյան Գարեգին Բ-ի կողմից, ինչը հակապատմական փաստ է:

«Քաղաքացիական իրավունքի ընդհանուր կարգավորումների համաձայն՝ կրոնական կազմակերպության գործունեությունը կարող է դադարեցվել ինքնալուծարքի հետևանքով: Այս համատեքստում հնարավոր է, որ հիպոթետիկ Հայ եկեղեցին որոշում կայացնի ինքնալուծարվել կամ այն կարող է լուծարվե՞լ», - հայտարարեց Ա.Ղամբարյանը` ավելացնելով. «Հակապատմական պետք է համարել երկու հազարամյակ գործող և ազգային համարվող կառույցին սոսկ դասական կրոնական կազմակերպության կարգավիճակ տալը և նրա իրավասուբյեկտությունը մասնավոր իրավական ռեժիմներով սահմանված գործոններից կախվածության մեջ դնելը»:

Բացի այդ` բանախոսը նկատեց, որ Սահմանադրությամբ նախատեսված չէ Եկեղեցու պատմական, հոգևոր, մշակութային և վավերագրական ժառանգությունը, (օրինակ՝ Սուրբ Գեղարդը, Սուրբ Գրիգոր Լուսավորչի աջը, «Հայոց Այբուբեն» և «Ոսկե Խաչ» աշխատանքները), որպես ազգային հարստություն դիտելու և պետության հատուկ պաշտպանության ներքո գտնվելու մասին որևէ դրույթ:
Ըստ նրա` Սահմանադրությամբ անհրաժեշտ է հստակեցնել Ազգային եկեղեցու իրավաբանական կարգավիճակի հիմունքները՝ այն ճանաչելով որպես հանրային իրավունքի իրավաբանական անձ: «Պետության ունի պոզիտիվ պարտականություն՝ Ազգային եկեղեցու հետ համատեղ իրականացնելու այդ ժառանգության պաշտպանությունը»,- ընդգծեց Ա. Ղամբարյանը:

Մանրամասները` տեսանյութում:

Աղբյուր` Փաստինֆո