Փաստ ինֆո

Ազգային օպերատոր հասկացությունը մեր օրենսդրությամբ, ոչ մի փաստաթղթով նախատեսված չէ։ «Փաստինֆո»-ի հետ զրույցում այս մասին ասաց «Ինտերնետ հանրություն» ՀԿ ղեկավար Գրիգոր Սաղյանը։ Նշենք, որ որպես ազգային օպերատոր են ներկայացնում Ալեքսանդր եւ Հայկ Եսայանները՝ իրենց նորաստեղծ  ընկերությունը։

Գ.Սաղյանն ընդգծեց՝ գոյություն ունեն ավանդական և մրցակից օպերատորներ, իսկ ազգային օպերատոր հասկացությունը սահմանված չէ։ Մեզ մոտ ազգային օպերատորն Արմենթելն է, որը հանդիսանում է ենթակառուցվածքների իրավատերը։ Ընդ որում՝ օրենքը պարտադրում է, որ վերջինս մրցակիցներին ապահովի իր ենթակառուցվածքների օգտագործմամբ, իհարկե, վճարովի սկզբունքներով։

Դիտարկմանը, որ Արմենթելը գնելու դեպքում Հայկ Եսայանի հիմնած Team Telecome ընկերությանը կփոխանցվեն նաև այդ ենթակառուցվածքները, արդյոք դա մենաշնորհի փոխանցում չէ, ըստ էության, Գրիգոր Սաղյանը նկատեց՝ մենաշնորհ չէ, բայց մենաշնորհի դեմ պայքարելու ժամանակակից միջոցներն ունենք. «Մենաշնորհի դեմ կարող են պայքարել էլեկտրասնուցման ցանցերը, նրանք ևս հսկայական ենթակառուցվածքներ ունեն, քաղաքապետարանը, որն ունի հենասյուներ։ Այսինքն՝ սա արդեն օրենսդրական կարգավորման հարց է»,-ասաց փորձագետը։

Բաժնետոմսերի այս առքուվաճառքի փոփոխությունն այն է՝ լինելու, որ Հայկ Եսայանի նոր ընկերությունը բաժնետոմսերը գնելու դեպքում լինելու է ենթակառուցվածքների տերը և ինչ որոշի, դա էլ կանի։ Գրիգոր Սաղյանը նկատեց՝ Հայկ Եսայանն ասել է, որ 5G ցանց պետք չէ։ Հարցին՝ այդ դեպքում ինչպես պետք է օգտագործվեն այդ ենթակառուցվածքները, Գրիգոր Սաղյանը նշեց՝ չենք կարող գուշակել՝ նոր տեխնոլոգիաների ներդրման հետևանքով ինչ ծառայություններ կարող են առաջանալ. «Օրինակ Yandex և GG տաքսիները չէին կարող աշխատել այնպես, ինչպես հիմա են աշխատում առանց 3G ցանցի և GPS համակարգի։ Ինչ վերաբերում է 5G-ին, ապա այն կարելի է կիրառել գյուղատնտեսության զարգացման ոլորտում։ Որքան էլ զարմանալի թվա, Հայաստանում արդեն իսկ օգտագործվում է ինտերնետի միջոցով գյուղատնտեսական մթերք աճեցնելը, իսկ եթե լինի 5G, ապա այն կդառնա ստանդարտ տեխնոլոգիա։ Ծրագիրը հավաքում է ջերմաստիճանի և խոնավության հետ կապված տեղեկատվությունը, հաշվարկներ անում և համապատասխան ջուր ուղարկում այն վայրեր, որտեղ անհրաժեշտ է ավելացնել խոնավությունը։ Ծրագիրը հաշվարկում ու կառավարում է ոռոգման ջրի բացթողումը»,-ասաց Գրիգոր Սաղյանը։

Վերջինս նկատեց՝ միգուցե Հայկ Եսայանը զգուշության համար է ասում, որ 5G ցանց չեն կառուցում, քանի որ ըստ նրա՝ այստեղ կա մի խնդիր, որը ստիպում է զուսպ լինել. «Դա այն փաստն է, որ 5G սարքավորում արտադրողները քիչ են։ Արտադրողները Չինաստանի Huawei-ն է, ԱՄՆ-ում, Եվրոպայում։ Մենք եվրոպական գոտում ենք, այնպես որ մեզ եվրոպական ստանդարտներն ավելի են հետաքրքիր։ ԱՄՆ-ն Huawei-ի դեմ պայքար է սկսել, որտեղ կարողանում են արգելել են նրանց սարքավորումների օգտագործումը։ Հնարավոր է նաև այդ հայտարարությունները դրա հետ կապված լինեն, որ ավելի շատ ուշադրություն չգրավեն։ Հակառակ պարագայում, եթե 5G են սարքում, միանգամից հարց է առաջանում ամերիկացիների մոտ՝ բա ում սարքավորումն են անում։ Միգուցե սա է պատճառը»,-ասաց Գրիգոր Սաղյանը։

Վերջինս ընդգծեց՝ 5G-ն վտանգավոր չէ։ Մարդուն կարող է վնաս տալ այն ռադիոհաճախականությունները, որոնք գտնվում են ուլտրամանուշակագույն տիրույթից ավելի դեպի կարճ ալիք. «Այդ դեպքում ոչ մի վտանգ չկա։ Վտանգ կլինի, եթե հզորությունը մեծացնեն և դարձնեն օրինակ միկրոալիքային վառարանի նույն հաճախականությունը, բայց մեր հեռախոսների հզորությունը սահմանափակված է 2 վտ-ով»,-հավելեց Գրիգոր Սաղյանը, ում համար բավական հեռանկարային է Team Telecome-ի կողմից Արմենթելը գնելը։

Ինչպես հայտնել ենք Team Telecome ընկերությունը հիմնել են Ալեքսանդր և Հայկ Եսայանները եւ հունիսի 8-ին հայտարարել, որ ընթանում են բանակցություններ Հայաստանում Beeline ապրանքանիշի ներկայացուցիչ՝ «ՎԷՈՆ Արմենիա» ընկերությունը գնելու վերաբերյալ։ Գործարքի մանրամասներն ու ֆինանսական աղբյուրները հայտնի չեն։

Նշենք, որ օրերս թեմային անդրադարձել էր նաեւ ֆիքսված/շարժական կապի ու ցանցերի ճարտարապետության փորձագետ Սիմոն Ալպետյանը՝ նշելով, որ հեղափոխությունով ոգեշնչված 2018թ. ապրիլ-մայիս ամիսներին եկել է Հայաստան և ՀՀ Կառավարությանը ներկայացրել Ազգային Օպերատորի Հայեցակարգ, որը ենթադրում էր ընկերության մեկնարկ, որտեղ մաժորիտար բաժնետեր կհանդիսանար ՀՀ Կառավարությունը, իսկ մինորիտար բաժնետերերը՝ մասնավոր անձինք:

«Օպերատորը ենթադրվում էր կառուցել զրոյից, վենդորի կողմից տրամադրվող վարկային տարբերակով: Հայեցակարգը նաև (ու նորից Հայկ Եսայանի հնչեցրած ձևակերպումներին համահունչ) նկարագրում էր նման նախագծի բոլոր առավելությունները. եկամուտների արտահոսքը բացառելը, ժողովրդի մասնակցությունը տնտեսական կյանքում և այլն:Սակայն այդ հայեցակարգը 2019 թվականի ապրիլին մերժվել է՝ հետևյալ ձևակերպումով՝ ռադիոհաճախականությունների տիրույթը բաշխված է շարժական կապի երեք օպերատորների հաշվարկով, և նոր օպերատորի համար ռադիոհաճախականությունների ռեսուրս նախատեսված չէ»,- ֆեյսբուքում գրել էր նա՝ նկատելով, որ թեեւ իրենց մերժվել է, բայց մեկ տարի անց մեկ այլ ընկերության տրվել է լիցենզիա։

Ավելին՝ փորձագետն արձանագրել է «մտքերի անհնարին ու ֆանտաստիկ ներդաշնակություն»՝ իրենց կողմից ներկայացված եւ կառավարության կողմից 2019 թվականին մերժված հայեցակարգի եւ 2020 թվականին Եսայանների կողմից ներկայացվող մոտեցումների միջեւ։

Աղբյուր` Փաստինֆո