Փաստ ինֆո

Եթե դատարանը հնարավորություն ունենա ապահովելու սոցիալական հեռավորությունն այնպես, ինչպես մեր կառավարությունն ու պարետատունն է սահմանել, ապա խնդիր չեմ տեսնում, որ պարոն Պողոսյանը, բավականին մեծ հեռավորության վրա գտնվելով, մասնակցի դատավարությանը։ Այս մասին ՀՀ երկրորդ նախագահ Ռոբերտ Քոչարյանի և մյուսների գործով դատական նիստին ասաց պաշտպան Հայկ Ալումյանը։

Նրա խոսքով՝ քանի դեռ դատարանը հնարավորություն չի տվել պահպանելու սոցիալական հեռավորությունը, ապա դատավարության այս կարգն ընդհանրապես հակասում է այն բոլոր հայտարարություններին, որ ամեն օր լսում ենք գործադիր իշխանությունից։

«Իրենք սխալ են ասում, թե այս դատավարությունն է սխալ ընթանում։ Այստեղ է պետք կողմնորոշվել։ Կարծում եմ՝ եթե դատարանը կարողանա ապահովել պատշաճ սոցիալական հեռավորություն, անձամբ ես՝ ինքս ինձ համար, խնդիր չեմ տեսնում »,- ասաց Ալումյանը՝ դատարանի ուշադրությունը հրավիրելով այն հանգամանքի վրա, որ յուրաքանչյուր անձին պետք է առնվազն 9 քառակուսի մետր և, եթե 14 մարդու կարողանան ապահովել նման տարածություն, ուրեմն դահլիճի մակերեսը պետք է լինի 126 ՔՄ։

Պաշտպան Կարեն Մեժլումյանն էլ նշեց, որ սոցիալական հեռավորության և անվտանգության կանոնների վրա պետք է դառնա քննարկման առարկա։ Պաշտպան Արամ Վարդևանյանը, հայտնելով իր դիրքորոշումը, նշեց, որ հետևել է «Սասնա Ծռեր»-ի գործով դատական նիստերին և կարծես թե օգտագործվում է ամբողջ տարածքը։ Բացի այդ՝ Վարդևանյանը բարձրաձայնեց նիստերի դահլիճի ախտահանման և օդափոխության հարցը։ Պաշտպան Էրիկ Ալեքսանյանը ևս միացավ պաշտպանական կողմի դիրքորոշմանը՝ նշելով, որ իր պաշտպանյալը գտնվում է ռիսկային խմբում և հետաքրքրվեց, թե արդյոք համապատասխան միջոցառումներ են իրականացվում։ Նախագահող դատավոր Աննա Դանիբեկյանը հետաքրքրվեց նաև մեղադրող կողմից, թե վերջիններս ինչ դիրքորոշում ունեն, ինչին ի պատասխան էլ մեղադրող դատախազ Գևորգ Բաղդասարյանն ասաց, որ սոցիալական հեռավորության պահպանման համար պայմաններ ստեղծելը վիճելի հարց չէ, սակայն տպավորություն է ստեղծվում, որ գործ ունենք դատական նիստերն անհնարին դարձնելու նոր մոտիվի հետ, որովհետև խոսում ենք դատարանի նիստերի դահլիճի ախտահանման վիճակագրության մասին։ Բաղդասարյանի խոսքով՝ կորոնավիրուսի համավարակի պայմաններում արդեն տևական ժամանակ են աշխատում, բայց նման հարցեր դեռևս չի բարձրացվել։

Դատարանը կողմերին առաջարկեց լուծման տարբերակ, մասնավորապես՝ դատական նիստի համար օգտագործել դահլիճի մյուս հատվածը և դատավարության մասնակիցներից մի քանիսը կտեղափոխվեն դահլիճի մյուս կողմ, սակայն ելույթ ընդունելիս պետք է մոտենան ամբիոնի մոտ։ Մեղադրող կողմը հայտարարեց, որ իրենց համար սա ընդունելի տարբերակ է։ Պաշտպան Հովհաննես Խուդոյանն էլ ասաց, որ ընդհանուր առմամբ ընդունելի լուծում է, սակայն տեխնիկական խնդիրներ կառաջանան արձանագրման հետ կապված։ ՀՀ երկրորդ նախագահ Ռոբերտ Քոչարյանը հայտարարեց, որ համաձայն չէ այդ լուծման հետ և առաջարկեց հայտարարել 30 րոպե ընդմիջում և ախտահանել դահլիճը, ինչին ի պատասխան նախագահող դատավորն ասաց, որ դա տեխնիկապես հնարավոր չէ։ Ռոբերտ Քոչարյանի խոսքով՝ դա ներկա անձանց նկատմամբ անհարգալից վերաբերմունք է։

Ավելի վաղ տեղեկացրել ենք, որ պաշտպան Միհրան Պողոսյանը հայտարարել է, որ շփվել է կորոնավիրուսով վարակված քաղաքացու հետ, այժմ նրա ջերմությունը 36.9 աստիճան է։ Պաշտպանը շահարկումներից խուսափելու և պատճառաբանելու համար ներկայացել է դատական նիստին, սակայն հետաքրքրվել է՝ արդյո՞ք հնարավոր է նման պայմաններում շարունակել դատական նիստը։

Նշենք, որ մեղադրող դատախազները միջնորդություն են ներկայացրել դատարան՝ պահանջելով ճանաչել ամբաստանյալների պաշտպանների գործողություններում միջնորդություններ ներկայացնելու դատավարական իրավունքի չարաշահումը և սահմանափակել դատական նիստի նախապատրաստական մասի ենթափուլն ու դրանում միջնորդություններ ներկայացնելու հնարավորությունն, անցնել դատաքննության՝ հնարավորություն տալով իրենց հրապարակել մեղադրական եզրակացության եզրափակիչ մասը:

Ինչպես ավելի վաղ հայտնել ենք՝ հունիսի 18-ին Վերաքննիչ քրեական դատարանը՝ նախագահությամբ դատավոր Արսեն Նիկողոսյանի, ՀՀ երկրորդ նախագահ Ռոբերտ Քոչարյանի նկատմամբ խափանման միջոց է կիրառվել գրավը՝ 2 մլրդ ՀՀ դրամի չափով։ Դատարանի դեպոզիտ հաշվին գրավի գումարը փոխանցելուց հետո Ռոբերտ Քոչարյանն ազատ է արձակվել։

Սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Հեղինակ՝ Իզաբել Սահակյան

Աղբյուր` Փաստինֆո