Փաստ ինֆո

Որևէ առարկություն չունեմ, որ դատավորներն իրենց իրավունքները պաշտպանեն, հակառակը՝ դա ցույց է տալիս իշխանության կամքը, որ այս ժամանակահատվածում՝ մեր իշխանության օրոք, դատավորները որևէ խնդիր չունեն վիճարկելու իրենց ենթադրյալ խախտված իրավունքները և վիճարկելով հասնել ՄԻԵԴ։ Այս մասին լրագրողների հետ զրույցում ասաց ԱԺ «Իմ քայլը» խմբակցության պատգամավոր Նիկոլայ Բաղդասարյանը։

Անդրադառնալով ՍԴ նախագահի ժամանակավոր պաշտոնակատար Աշոտ Խաչատրյանի հայտարարությանը, որ ինքը չի կարող համարվել ՍԴ նախագահի պարտականությունները կատարող, Բաղդասարյանն ասաց, որ այլ մարդ չէր կարող համարվել ՍԴ նախագահի պաշտոնակատար, քանի որ նշված է՝ տարիքով ամենամեծ դատավորը պետք է համարվի պաշտոնակատար, մինչև նախագահի ընտրությունը։

Նրա խոսքով՝ Սահմանադրությամբ ամրագրվել է, որ ՍԴ դատավորներից երեքի պաշտոնավարման ժամկետները սպառվել են և Սահմանադրության փոփոխությունների հիմնավորմամբ ամեն բան ներկայացված է և իրենք՝ որպես պատգամավորներ արձանագրել են, որ դատավորների լիազորությունները դադարում են։ Նա գտնում է, որ առանձին իրավական ակտ չի կարող լինել, որը կֆիքսի, որ տվյալ դատավորների լիազորությունները դադարել են։ Դիտարկմանը, որ ՍԴ նախագահ Հրայր Թովմասյանը գտնվում է արձակուրդում, Բաղդասարյանն արձագանքեց՝ նշելով, որ նրա լիազորությունները որպես ՍԴ նախագահի դադարում են։ Ինչ վերաբերում է Վենետիկի հանձնաժողովի նախագահի նամակին՝ ուղղված ՍԴ նախագահ Հրայր Թովմասյանին, որում Ջաննի Բուքիքիոն նշել էր, որ ՀՀ խորհրդարանն ամբողջությամբ չի ընդունում հանձնաժողովի առաջարկությունները, Բաղդասարյանը նշեց, որ ԶԼՄ-ները սխալ էին թարգմանել Բուքիքիոյի նամակը։

«Նա ասել էր, որ իրենց առաջարկություններն ամբողջությամբ չեն ընդունվել, իսկ մամուլում նշված էր՝ իրենց հանձնարարությունները չեն ընդունվել։ Տվյալ կառույցը խորհրդատվական բնույթ ունի, և բազմաթիվ պետություններ ամբողջությամբ չեն ընդունում Վենետիկի հանձնաժողովի առաջարկությունները»,- ասաց նա։

Բաղդասարյանի պնդմամբ՝ Վենետիկի հանձնաժողովի առաջարկում նշված է եղել, որ մինչև նոր դատավորների նշանակումը լիազորությունները կորցրած դատավորները շարունակեն պաշտոնավարել։

«Սակայն այդ խնդիրը բացարձակ չկար, քանի որ այս ընթացքում ՍԴ կայունությունը չի խաթարվում։ ՍԴ-ն շարունակում է գործել՝ ունենալով վեց դատավոր։ Այդ առումով տեսել ենք, որ հանձնաժողովի առաջարկը տրամաբանական չէ։ Եվ դատարանի վարույթում եղած գործերն էլ ուղղակի կվերամակագրվեն այլ դատավորի վրա։ Այստեղ որևէ խնդիր ՍԴ-ն չուներ»,- նշեց Նիկոլայ Բաղդասարյանը։

Աղբյուր` Փաստինֆո