Փաստ ինֆո

Ամառ, արև, լողավազան, ծովափ, նոր հետաքրքրություններ, պատահական ծանոթություններ…Ամենը կարծես բարենպաստ միջավայր է ստեղծում նոր հարաբերությունների ստեղծման համար: Սակայն, անկախ գայթակղություններից պետք է կազմակերպել գրագետ և անվտանգ հանգիստ:

Պատահական ծանոթությունները շատ դեպքերում ավարտվում են չպաշտպանված սեռական հարաբերություններով, որոնց հետևանքերը սկսում են ի հայտ գալ ավելի ուշ: Հետևաբար, անցանկալի հետևանքներից խուսափելու համար անհրաժեշտ է օգտագործել պահպանակ: Պահպանակների արդյունավետ օգտագործման համար անրաժեշտ է հետևել պահպանման և օգտագործման կանոններին. ստուգել պիտանելիության ժամկետը, պահել արևի ուղիղ ճառագայթներից հեռու, զգուշորեն բացել տուփը և իհարկե խուսափել պահպանակով ճամփորդելուց, քանի որ այդ ընթացքում ենթարկվում են մեխանիկական վնասման և կորցնում արդյունավետությունը:

Հանգստի ժամանակ հաճախ չեն հետևում ինտիմ հիգիենային: Թաց լողազգեստները, խոնավությունը բարենպաստ միջավայր են մանրէների զարգացման համար: Մեծամասամբ՝ լողազգեստները չեն փոխարինվում ներքնազգեստներով, որի հետևանքը լինում է սեռական օրգանների բորբոքային և/կամ սնկային հիվանդությունների զարգացումը: Հետևաբար, լողազգեստը պետք է կրել միայն լողալու ժամանակ:

Պետք է օգտագործել անձնական օգտագործման սրբիչներ և հիգիենայի պարագաներ:

Միջավայրի փոփոխությունը, առօրյայից կտրվելը և տրվելը նոր գայթակղություններին ուժեղացնում են սեքսուալ ֆանտազիաները. ջրի մեջ սեռական հարաբերություն ունենալը բարձրացնում է սեռավարակներով հիվանդանալու հավանականությունը, քանի որ կամ չեն օգտագործում պահպանակ, կամ էլ օգտագործման դեպքում դրանք կարող են դուրս սահել:

Հանգստի պայմաններում պետք էլ հետևել սնվելու կանոններին և սննդակարգին, քանի որ հակառակ դեպքում հանգստից հետո սկսում են պայքարել ավելորդ քաշից ազատվելու համար: Իսկ ավելորդ քաշը մեծ վտանգ է ինչպես ընդհանուր առողջության, այնպես էլ սեռական առողջության համար:

Հաշվի առնելով ամենը, ցանկալի է հանգիստը կազմակերպել գրագետ, առանց «վտանգների» ՝ չմոռանալով պահպանել սեռական առողջությունը:

Լուսինե Ստեփանյան

Սեքսոլոգների Հայկական Ասոցիացիայի անդամ
բժիշկ-սեքսոլոգ 

Աղբյուր` Փաստինֆո