Փաստ ինֆո

ՍԴ դատավոր Ալվինա Գյուլումյանը քիչ առաջ եկավ Սահմանադրական դատարան և ասաց, որ եկել է աշխատելու։

Հարցին՝ մտավախություն չունի, որ կարող են ուժով հեռացնել և ինչպես է կարգավորվելու այս հարցը, Ալվինա Գյուլումյանն ասաց. «Հարցը կարգավորվում է որոշակիորեն սահմանված կարգով։ Ոչ մեկը դեռևս չի արձանագրել, որ իմ լիազորություններն ավարտված են։ Սահմանադրական նորմն ընդունվել է, բայց գոյություն ունի Սահմանադրական դատարանի մասին օրենք, որով կարգավորվում է ՍԴ կազմակերպումը և գործունեությունը, և այս պարագայում օրենքի ուժով մենք դեռևս շարունակում ենք աշխատել։ Դատարանում, երբ որևէ մեկի լիազորությունները դադարել են, այդ մասին դատարանի նիստի արձանագրային որոշում է ընդունվել, որով հաստատվել է տվյալ անձի լիազորությունների դադարման փաստը, առայժմ այդպիսի փաստաթուղթ չկա։ Հայտարարությունները ոչ իմ և ոչ էլ ձեր աշխատանքից ազատվելու հիմք չեն»,-ասաց Ալվինա Գյուլումյանը։

Դիտարկմանը, որ ՍԴ դատավոր Վահե Գրիգորյանն իրենց արդեն անվանում է նախկին գործընկերներ, Ալվինա Գյուլումյանն ասաց, որ դա էլ Վահե Գրիգորյանի կարծիքն է. «Մինչև չկոնկրետացվեն, մինչև օրենքի մեջ իրենց արտացոլումը չգտնեն, բնականաբար մենք շարունակում ենք աշխատել։ Իսկ իմ և մյուսների պարագայում պետք է լինի ինչ-որ իրավական հիմք, որը կասի, որ այո՛, սա վերաբերում է տիկին Գյուլումյանին»,-ասաց Ալվինա Գյուլումյան։

Հարցին՝ ինչով էր պայմանավորված ՍԴ նախագահ Հրայր Թովմասյանի և դատավոր Արևիկ Պետրոսյանի արձակուրդ գնալը, Ալվինա Գյուլումյանը նկատեց՝ իրենց հերթական արձակուրդի ժամանակն էր և գնացին. «Ես ոչինչ չեմ կարող ասել։ Սովորաբար երբ ՍԴ նախագահն արձակուրդ է գնում, օրենքի հիման վրա փոխարինում է տեղակալը»,-հավելեց Ալվինա Գյուլումյանը։

Աղբյուր` Փաստինֆո