Փաստ ինֆո

Ազգային ժողովում կորոնավիրուսով վարակակիրներ գրանցվեցին նաև իշխանական խմբակցությունում։ Այսօր պարզ դարձավ, որ ԱԺ «Իմ քայլը» խմբակցության մի քանի պատգամավորի մոտ կորոնավիրուս է հաստատվել, իսկ ԼՀԿ պատգամավոր Գեւորգ Գորգիսյանը հայտարարեց ինքնամեկուսանալու մասին։ Ավելի վաղ կորոնավիրուս էր ախտորոշվել նաև ԱԺ փոխխոսնակ, ԲՀԿ անդամ Վահե Էնֆիաջյանի մոտ ։ Նշենք, որ նախքան վարակված լինելու մասին իմանալը պատգամավորները մասնակցել են խորհրդարանի աշխատանքներին, այդ թվում նաև արտահերթ նիստերին։

«Փաստինֆո»-ն զրուցեց համաճարակաբանի հետ՝ հասկանալու համար, թե որքան է մեծ հավանականությունը, որ նույնիսկ հակահամաճարակային պայմանները պահելու դեպքում մյուս պատգամավորները ևս վարակվեն։

Համաճարակաբան Ռուբեն Հովհաննիսյանը նշեց, որ դա կախված է նրանից, թե ինչ աստիճանի սերտ շփում են ունեցել մեկը մյուսի հետ. «Մարդը կարող է մեծ խմբում լինել, բայց եթե սերտ շփվում է 4-5 հոգու հետ, ապա հավանաբար հենց նրանք էլ վարակվում են։ Իհարկե, բացառված չէ նաև, որ ավելի շատ մարդ կարող է վարակվել, բայց սա արդեն հավանականությունների խնդիր է»,-ասաց համաճարակաբանը։

Վերջինս նկատեց՝ եթե մարդը վարակված է, ապա առնվազն 7 օր հետո միայն թեստը կարող է ցույց տալ դա։ Դիտարկմանը, որ այդ ընթացքում պատգամավորները գնացել են ԱԺ, ելույթ ունեցել, դիպչել ամբիոնին, միկրոֆոնին որքանով է հավանական, որ վարակը կփոխանցվի նաև այսկերպ, Ռուբեն Հովհաննիսյանը նկատեց՝ հաշվի առնելով այդ առանձնահատկությունը, որ միկրոֆոնի գործոնն իսկապես կարող է որոշակի դեր խաղալ, այնուամենայնիվ պրակտիկ տեսանկյունից վարակումը տեղի է ունենում հենց օդակաթիլային ճանապարհով, այլ ոչ թե կոնտակտային. «Եզակի դեպքեր կարող են լինել, որ թարմ թքի կաթիլը, որն արտազատվում է հիվանդի կողմից, անցնում է մեկ ուրիշի ձեռքի մաշկին և այդ ձեռքի մաշկից էլ անցնում է իր լորձաթաղանթին, այդ դեպքում նոր վարակվում է։ Այսինքն էնպես չի, որ ձեռքին կպավ, ապա մարդը վարակվում է։ Իսկ հիմա շատերն ալկոգելեր ունեն և հաճախ են օգտագործում, այնպես որ այդ ճանապարհն այդքան չէի առանձնացնի՝ չբացառելով իհարկե»,-ասաց Ռուբեն Հովհաննիսյանը։

Անդրադառնալով այն ուսումնասիրություններին, որոնց համաձայն երբ վարակակիրը հազում կամ փռշտում է հարուցիչները մնում են օդում, այս դեպքում որքանով է հավանական վարակի նման տարբերակը Ռուբեն Հովհաննիսյանը նկատեց՝ նույնիսկ փակ տարածքում, եթե օդի շարժ կա, այդ հարուցիչները պարզ է՝ տվյալ վայրում օդի մեջ կախված երկար չեն մնում. «Դա կախված է նաև այդ կաթիլային մասնիկների մեծությունից։ Այսինքն` եթե օդի շարժ կա, ամեն դեպքում այդ օդը նոսրանում է, նույնիսկ վարակված օդը նոսրանում է։ Հավանականությունների խնդիր է, միանշանակ պնդել, որ բոլորը կվարակվեն կամ չեն վարակվի, չենք կարող, քանի որ ոչինչ բացառված չէ»,-ասաց Ռուբեն Հովհաննիսյանը։

Հարցին՝ արդյոք ԱԺ վարակակիր պատգամավորների բոլոր կոնտակտավորներին թեստավորելու կարիք տեսնում է՝ հաշվի առնելով այն հանգամանքը, որ վարակակիրների մեծ մասն առանց ախտանիշների է հիվանդությունը տանում, Ռուբեն Հովհաննիսյանը նշեց, եթե առաջնորդվեինք դասական մեթոդաբանությամբ, ապա պետք է բոլոր կոնտակտավորները առնվազն 14 օր մեկուսացվեն, սակայն համաճարակի նման գեներալիզացիայի պայմաններում, երբ այն լայնորեն տարածվում է հասարակության մեջ, համաճարակաբանը կարծում է՝ գործնականում դա իրականանալի չէ. «Շատ բարդ է դա իրականացնելը, վերահսկելը և պահանջելը, որ մարդն ամբողջ 14 օր մեկուսացված մնա։

Մյուս կողմից էլ այլ ինֆորմացիա կա, որ հենց սիմպտոմատիկ դեպքերն են վարակիչ, իսկ ասիմպտոմատիկ անձինք վարակի աղբյուր, որպես այդպիսին, չեն հանդիսանում։ Կան տարբեր հետազոտություններ, որ նման տվյալներ են ցույց տալիս։ Այժմ դժվարանում եմ ասել, շատերս ենք խճճվել այս ինֆորմացիայի տարափի մեջ»,-ասաց համաճարակաբանը՝ նկատելով, որ այդ նպատակով երկրում պետք է գործի հատուկ, գիտագործնական ուղղվածությամբ աշխատող խումբ, որը կկարողանա արդեն իսկ վարակվածների բոլոր տվյալներն ուսումնասիրել, հետազոտել, պարզել նրանց կոնտակտների շրջանակը, հասկանալ և, ըստ այդմ, գնահատել՝ ասիմպտոմ ձևերը վարակի աղբյուր հանդիսանում են և այդ դեպքում վարակելիության աստիճանը բարձր է, թե ոչ. «Ամեն երկիր, եթե ունի գիտական պոտենցիալ, պետք է օգտագործի, որ նախևառաջ իր բնակչության շրջանակներում դա գնահատի, ինչը մեզ մոտ դեռ չեմ տեսնում։ ՁԻԱՀ-ի կենտրոնի համաճարակաբանների խումբը քանիցս տարբեր մակարդակներով առաջարկել է մեր ներգրավվածությունը, որպեսզի թույլ տան այդ ինֆորմացիան վերլուծել օպերատիվ կերպով, որ արձագանքները լինեին ճիշտ, գործողություններն էլ՝ ավելի նպատակային, սակայն մեր բոլոր դիմումները պրակտիկորեն անպատասխան մնացին»,-հավելեց Ռուբեն Հովհաննիսյանը։

Աղբյուր` Փաստինֆո