Փաստ ինֆո

Կարող ենք Սահմանադրության փոփոխության այս նախագիծն ԱԺ ընդհանուր ձայների մեկ հինգերորդի դեպքում վիճարկել Սահմանադրական դատարանում։ «Փաստինֆո»-ի հետ զրույցում այս մասին ասաց ԱԺ «Բարգավաճ Հայաստան» խմբակցության պատգամավոր Գևորգ Պետրոսյանը։

Պատգամավորն ընդգծեց, որ պետք է այն վիճարկեն, բայց դրա վերաբերյալ խմբակցությունը դեռ որոշում պետք է կայացնի. «Այսօր խմբակցության նիստին չեմ մասնակցել և իրավունք չունեմ միանձնյա հայտարարություն անել։ Խմբակցությունում քննարկումներ ընթանում են, պարզապես խնդիրն այստեղ այն է, որ 1/5-ը կազմում է 27 պատգամավոր, իսկ «Բարգավաճ Հայաստան»-ն ունի 25 ձայն։ Այսինքն` ևս երկու ձայն պետք է, ինչն ակնկալվում է ընդդիմադիր մյուս ուժից։ Պետք է գոնե այդ երկու ձայնն ունենանք, հակառակ դեպքում չենք կարող ՍԴ դիմել»,-ասաց Գևորգ Պետրոսյանը՝ հավելելով, որ տեղյակ չէ խմբակցությունը դիմել է ընդդիմադիր մյուս՝ «Լուսավոր Հայաստան» խմբակցությանը, թե ոչ։

Գևորգ Պետրոսյանի դիտարկմամբ այս նախագիծն իրավական տեսանկյունից խայտառակության գագաթնակետն է. «Բացի նախագծի հակասահմանադրական լինելուց ԱԺ-ն հիմա զբաղված է խայտառակ գործունեությամբ։ Այսինքն այս մարդիկ՝ իմ քայլ արածները, երկրի խնդիրները թողած ՍԴ-ի հետևից են ընկել։ Սա դավաճանություն է իրենց ձայն տված ժողովրդին, որովհետև ժողովուրդը ոչ թե իրենց ձայն է տվել, որ ՍԴ դատավորների հետևից ընկնեն ապօրինաբար, այլ իր կյանքը բարեկարգի։ Այսօր ժողովրդի կյանքի հարցերը լուծված չեն, ավելի են ապականված։ Ժողովրդին հարց տվեք՝ քա՞նի տոկոսին է այսօր հետաքրքրում իրենց հացի, աշխատանքի խնդիրը և քա՞նի տոկոսին է հետաքրքրում ՍԴ-ն լուծարելու և ինչ-որ նոր պարապ-սարապ մարդկանցով, Վահե Գրիգորյաններով համալրելու խնդիրը։Անթույլատրելի է սեփական քաղաքական շահերից ելնելով այսպես թքած ունենալ երկրի ոստիկանության, ազգային անվտանգության, քննչական կոմիտեի հեղինակության վրա»,-ասաց պատգամավորը։

Վերջինս նկատեց՝ երբ ՀՀ վարչապետ Նիկոլ Փաշինյանն իշխանության էր գալիս, ասում էր, որ ամեն ինչ ժողովուրդն է որոշելու։ Պատգամավորին հետաքրքրում է՝ արդյոք այսօր Նիկոլ Փաշինյանը ժողովրդի հետ քննարկե՞լ է ինչով է զբաղված. «Ժողովուրդը նման մանդատ տվե՞լ է, որ հացի խնդիրը թողած ընկնի ՍԴ անդամների հետևից, մի հատ էլ անգործ, անպիտան մեկին կարգի, որ մի քանի մլն դրամ աշխատավարձ ստանա։ Նիկոլ Փաշինյանը հիմա դուրս է եկել ժողովրդի դեմ հեղափոխության անվան տակ»,-ասաց պատգամավորը։

Ինչ վերաբերում է Սահմանադրության փոփոխության նախագիծը ՍԴ վիճարկելու, Գևորգ Պետրոսյանն ասաց, որ խմբակցությունը կքննարկի և որոշումը կլինի հրապարակային։

Աղբյուր` Փաստինֆո