Փաստ ինֆո

Հայրենի ոստիկանության և ԱԱԾ-ի վարքաբանության նոր փուլ է սկսվել: Դա սկսվեց նախ՝ կորոնավիրուսի դեմ պայքարում թավշյա մեթոդիկան կոշտ ու բռնի մեթոդներով փոխարինելու հանձնարարությամբ:

Ամեն իշխանություն իր պատկերով է կամենում տեսնել այս կառույցները:

Այն գործողություններն ու գործառույթները, որն այսօր ԱԱԾ-ին են վերագրվում, այս լրջագույն կառույցին նախկինում երբեք չեն վերագրվել: Գազալցակայանների ռեյդից մինչև ՀԴՄ-ների ստուգումներ և սատանաների հայտնաբերում, մարդկանց՝ իրենց համոզմունքների համար ասֆալտին փռելու, պատեպատ տալու ակցիաներ:

Այսօր ԱԱԾ-ի ցանկացած իրականացվող օպերատիվ գործողություն, թատերականացված ներկայացում է: Այդպիսին է հանձնարարությունը: Ցուցադրանք՝ ի տես և ի սարսափ հայրենակիցների: Այ, ի տես և ի սարսափ թշնամիների ակցիաներ երբեք չենք տեսնի: Այս համատեքստում որևէ գործողություն անգամ այսօր չի իրականացնում ԱԱԾ-ն: Այսինքն, իսպառ մոռացվել է, որ ԱԱԾ կարևոր գործառույթը պետության անվտանգությունն է, երկրում վխտացող լրտեսական ծառայությունների և լրտեսների հայտնաբերումը, էլ չենք խոսում տոտալիտար աղանդների և զանազան բարեգործական կազմակերպությունների դիմակով ՀՀ-ում հաստատված և անարգել իրենց գործունեությունն իրականացնող կազմակերպությունների մասին: Ասենք, ինչի մասին է խոսքը, երբ այսօր սորոսականներն են մեր պետության և պետականաշինության մերձավորները:

Օրեր առաջ տեղեկություն հայտնվեց լրահոսում, թե՝ Գեղարքունիքի մարզում ադրբեջանցի է հայտնվել: Հետո՝ զգայացունց մի պատմություն գրվեց, թե՝ «Նա 26 տարեկան է, մայրն ուկրաինացի է, հայրը` ադրբեջանցի։ Ռուսերեն էլ է խոսում, ադրբեջաներեն էլ։ Մայրը թողել, փախել, գնացել է իր երկիր, հայրը երեխային հանձնել է մանկատուն, հետո հայրը մահացել է։ Մանկատանը 16 տարի ապրելուց հետո նրան ասել են` գնա, գլուխդ պահիր։ Գնացել է, այստեղ–այնտեղ չոբանություն է արել, ապրել է։ Հետո երեկ, ժամը յոթին իր ֆերմերի հետ վիճել է, ժամը 11-ին նա քնել է, սա էլ պոստի տակով շրջանցել, եկել է մինչև Ճամբարակ, այնտեղից լույսերը երևացել են, ճանապարհով եկել, հասել է Արեգունի։ Անունը չգիտեմ, բայց ազգանունը Ալիև է»:

Ինչ-որ շատ տարօրինակ բաներ են կատարվում Հայաստանում վերջին շրջանում: Մեկ ոմն ինքնակոչ Արցախի ադրբեջանական համայնքի ղեկավար է հանդես գալիս և հայերենով դիմում է Արցախի քաղաքացիներին, հիմա էլ՝ այս տղան իր անհամոզիչ պատմությամբ: Ամեն լրտես ունի իր լեգենդը: Հարց է ծագում՝ մենք իսկական չոբան Ալիևի հետ գործ ունե՞նք, թե՞ ադրբեջանցի լրտեսի: Այս և այսօրինակ թեմաները որքանո՞վ են հանրության ուշադրության կենտրոնում…

«Նիչիստայա»՝ կասեր հայտնի ֆիլմի հայտնի կերպարը:

Բայց վերադառնանք այսօրվա իրադարձություններին, երբ ԲՀԿ նախագահ Գագիկ Ծառուկյանը իր ելույթն ԱԺ-ում ավարտելով հայտարարեց, թե ԱԱԾ պիտի գնա, թե՝ այնտեղ իրեն սպասում են և դուրս եկավ խորհրդարանից:

Նա, ըստ ամենայնի գիտեր, որ եթե 5 րոպե շուտ դուրս չգա, ԱԱԾ-ն իր հետևից կգա, վստահաբար, թատերականացված շոու իրականացնելու հանձնարարությամբ:
Սակայն, ինչպես ասում են, շոուն չստացվեց, քանի որ լրագրողների ներկայությամբ Ծառուկյանը հայտարարեց, որ ԱԺ-ում հայտարարելով, թե՝ ԱԱԾ է ուղևորվում դուրս է եկել: Եվ ԱԱԾ-ականներին մնում էր բարձր մակարդակով ուղեկցելը:

Հեղինակ՝ Աննա Աթանեսյան

Աղբյուր` Փաստինֆո