Փաստ ինֆո

«Իմ քայլը» խմբակցության նիստում քննարկվեց կորոնավիրուսը Հայաստանում և կորոնավիրուսի ազդեցությունը քաղաքական դաշտի վրա։ Այս մասին լրագրողների հետ ճեպազրույցում ասաց ԱԺ փոխնախագահ Ալեն Սիմոնյանը՝ նշելով, որ օրակարգում կա 3-4 հարց։ Ալեն Սիմոնյանն ասաց, որ քննարկվել է նաև ԲՀԿ առաջնորդ Գագիկ Ծառուկյանի երեկվա հայտարարությունը։

Անդրադառնալով Գագիկ Ծառուկյանի հայտարարությանն այն մասին, որ կառավարությունը 100 տոկոսով պետք է փոխվի՝ Ալեն Սիմոնյանն ասաց. «ՀՀ-ում իշխանությունը, կառավարությունը փոխում է մի սուբյեկտ և դա ՀՀ քաղաքացին է։ Ոչ թե գործարար, ոչ թե աշխատատու, ոչ թե մի խումբ մարդիկ, այլ փոխում է ժողովուրդը։ Գագիկ Ծառուկյանի անձնական կարծիքն է, որը կարծում եմ հիմնված է նախկին հիշողության վրա, երբ ինքը համագործակցում էր ՀՀԿ-ի հետ և նման հայտարարություններով գուցե ինչ-որ սակարկումների, խոսակցությունների սկիզբ էր դնում, այս պարագայում սա այդ դեպքը չի։ Մնացածի հետ կապված կարծում եմ շատ շուտով կտեսնենք՝ ինչ կլինի քաղաքական դաշտում, ինչ կլինի համացանցում տեղ գտած լուրերի և ասեկոսեների հետ կապված»,-ասաց Ալեն Սիմոնյանը։

Վերջինս նշեց, որ Գագիկ Ծառուկյանի հայտարարությունն ինչ-որ չափով ուրախալի էր, որովհետև այն, ինչ տեղի է ունենում ըստ Ալեն Սիմոնյանի՝ կարելի է կոչել կորդինատների ճշտում քաղաքական դաշտում. «Հեղափոխությունը բոլորին հնարավորություն է տվել զրոյական կետից սկսել, ովքեր կօգտվեն, կօգտվեն, ովքեր ոչ, ոչ։ Մենք միշտ իմացել ենք, որ մեր միակ և հուսալի դաշնակիցը դա ՀՀ քաղաքացիներն են։ Երբևիցե իրենց չենք դավաճանել, չենք դավաճանելու ու շարունակելու ենք իրենց հետ մեր աշխատանքը։ Մնացածը ճաշակների և քաղաքական հիշողության ինստիկտի հարց է»,-ասաց ԱԺ փոխնախագահը։

Մանրամասները՝ տեսանյութում

Աղբյուր` Փաստինֆո