Փաստ ինֆո

Երևանի ընդհանուր իրավասության դատարանը՝ դատավոր Էդուարդ Ամալյանի նախագահությամբ, վերադարձրել է ԱԺ փոխնախագահ Ալեն Սիմոնյանի հայցադիմումն ընդդեմ քաղաքագետ, «Այլընտրանք» ՀԿ համանախագահ Գարեգին Պետրոսյանի։ 

Ավելի վաղ «Փաստինֆո»-ն հայտնել է , որ Ալեն Սիմոնյանը մայիսի 12-ին հայց էր ներկայացրել ընդդեմ Գարեգին Պետրոսյանի՝ պահանջելով վերականգնել իր պատիվն ու արժանապատվությունը։

Նույն օրն այն մակագրվել է Երևանի ընդհանուր իրավասության դատարանի դատավոր Էդ. Ամալյանին։ «Փաստինֆո»-ն տեղեկացավ, որ մայիսի 20-ին դատարանը որոշում է կայացրել ներկայացված հայցադիմումը վերադարձնելու մասին՝ նշելով, որ այն ընդդատյա չէ Երեւանի ընդհանուր իրավասության դատարանին։

Խնդիրն այն է, որ ԱԺ փոխնախագահի կողմից ներկայացված հայցադիմումում պատասխանողի հասցեն նշված է Սյունիքի մարզում, հետևաբար՝ հայցն ընդդատյա է Սյունիքի մարզի ընդհանուր իրավասության դատարանին։

Հիշեցնեն, որ Պետրոսյանն ապրիլի 19-ին ֆեյսբուքյան գրառում էր կատարել, որում նշել էր, թե Ալեն Սիմոնյանի վարքագիծը հիշեցնում է սակավամիտ ու ծեծ ուտել ցանկացող մարդու անեկդոտը։

«Ալեն Սիմոնյանի վարքագիծը հիշեցնում է սակավամիտ ու ծեծ ուտել ցանկացող մարդու անեկդոտը ։ Մեկը մտնում ա բուքմեյքերական ընկերություն և առանց խաղադրույք կատարելու իրա համար նստում ու ֆուտբոլ ա նայում։ Այսպես, մի քանի ժամ։ Համբերությունը հատած աշխատակիցն հարցնում ա չես ուզու՞մ մի բան ասես «խփեմ» (նկատի ունենալով խաղադրույքը), էս անասունս էլ տանում բերում՝ քֆուր ա անում։ Հիմա էս մեր տկարամիտն ա՝ որ էդ ա պաշտոնական դիրքի գիտակցումդ, գորիսեցիների ասած, խի՞ ես ռեխդ ծռել հասել ԱԺ։ Ակվարիումից դուրս գայիր, ծեծ ուտեիր, հետ մտնեիր...)»,- գրել էր Պետրոսյանը։

Աղբյուր` Փաստինֆո