Փաստ ինֆո

Քաջարանցիների աղմկահարույց գործով Երևանի ընդհանուր իրավասության դատարանը՝ դատավոր Վաչե Մարգարյանի նախագահությամբ, բավարարել է Լևոն Համբարձումյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը։ Այս մասին «Փաստինֆո»-ին հայտնեց պաշտպան Հովսեփ Սարգսյանը։

Նշենք, որ Լևոն Համբարձումյանին մեղադրանք է առաջադրվել ՀՀ քրեական օրենսգրքի 131-րդ հոդվածի 2-րդ մասի 1-ին կետով՝ մի խումբ անձանց կողմից նախնական համաձայնությամբ անձին առևանգելու համար։ Նա իրեն առաջադրված մեղադրանքը չի ընդունում։ Պաշտպան Հովսեփ Սարգսյանը «Փաստինֆո»-ի հետ զրույցում ասաց, որ պատրաստվում են բողոքարկել դատարանի որոշումը։

«Իրավական և փաստական որևէ հիմնավորում չկա»,- ասաց փաստաբանը։

Ավելի վաղ «Փաստինֆո»-ն հայտնել էր, որ քաջարանցիների դեմ ցուցմունք տվող անձը հրաժարվել է իր նախնական ցուցմունքից և հայտարարել,որ դրանք տվել է ճնշման տակ եւ որ իրեն տուժող չի ճանաչում։

«Փաստինֆո»-ի հարցին՝ թե արդյո՞ք դատարանը հաշվի չի առել հանգամանքը, որ գործով տուժողը հրաժարվել է իր ցուցմունքներից, Սարգսյանն ասաց, որ տուժողը մայիսի 25-ին նախորդ ցուցմունքներից տարբերվող ցուցմունք է տվել, իրեն չհամարելով տուժող, նշելով անգամ, թե ինչ պայմաններում է վերցվել իրենից այդ ցուցմունքները, սակայն դատավորի համար դա նշանակություն չունեցավ, ոչ էլ այն որ օբյեկտիվ տվյալներով ներկայացված նյութերում բացակայում էր անգամ հիմնավոր կասկածը, որի մասին է օբյեկտիվորեն վկայում նաև դատարանի երեկվա հրապարակած որոշումը։

Նշենք, որ մայիսի 28-ին Երևանի ընդհանուր իրավասության դատարանը՝ դատավոր Արտուշ Գաբրիելյանի նախագահությամբ, մերժել էր քաջարանցիներից մեկին՝ Մարատ Ստեփանյանին կալանավորելու մասին քննիչի միջնորդությունը՝ հիմնավոր կասկածի բացակայության հիմքով։

Հիշեցնենք՝ մայիսի 24-ին Երեւանից հատուկ ջոկատայիններ են գործուղվել Սյունիք հատուկ գործողություններ իրականացնելու նպատակով: Վաղ առավոտյան սպեցնազն անցել է գործի եւ 4 անձ բերման է ենթարկվել։ Հետագայում՝ մեկ հոգին ազատ է արձակվել. Հայտարարվեց, թե
Նրան սխալմամբ էին բերման ենթարկել ու հենց նրա նկատմամբ էլ ոստիկանության բաժնում բռնություն է գործադրվել։ Համենայն դեպս՝ երեկ մամուլում տարածվել էր բռնության հետքերով լուսանկարները։ Ոստիկանության բաժնի մոտ հավաքվել էին մեծ թվով քաջարանցիներ՝ պահանջելով ազատություն ու արդարություն։ Նրանք բողոքի ակցիան դադարեցրին միայն այն բանից հետո, երբ Քաջարանի համայնքի ղեկավարը հայտարարեց, որ իրեն հավաստիացրել են, որ ոստիկանության բաժնում կիրառված բռնության դեպքի առթիվ պատշաճ քննություն կընթանա։
Ձերբակալվածները տեղափոխվել էին Երեւան, եւս այստեղ փաստաբանները բողոք էին ներկայացրել նրանց ձերբակալելու որոշումների դեմ։ Դատարանը բոլոր երեք դեպքում էլ ձերբակալությունը համարել էր ոչ իրավաչափ ու ազատել արգելանքից՝ գտնելով, որ բացակայում է հիմնավոր կասկածը։

Հեղինակ՝ Իզաբել Սահակյան

Աղբյուր` Փաստինֆո