Փաստ ինֆո

«Իրավիճակը սարսափելի է, այն պատճառով, որ կանխարգելիչ մեթոդները մեր կառավարությունը սկսեց շատ ուշ, ես բազմիցս ասել եմ՝ արդեն գնացքը գնացել էր եւ կառավարությունը վազում էր գնացքի հետեւից, իսկ այն, ինչ հիմա անում են՝ ուզեն, թե չուզեն, պետք է անեն, այլ ճանապարհ չունեն»,-«Փաստինֆո»-ի հետ զրույցում ասաց բժշկագիտության դոկտոր, պրոֆեսոր, ՀՀ նախկին գլխավոր պաթանատոմ Գարիկ Աղաբեկյանը՝ անդրադառնալով կորոնավիրուսով պայմանավորված առողջապահական իրավիճակին:

Գարիկ Աղաբեկյանի շեշտում է՝ անշուշտ, հասարակությունը պետք է պահի սանիտարական նորմերը եւ կատարի պարետի հրամանները, բայց եւ հավելում, որ դեղատներում վաճառվող դիմակները ոչ թե վիրուսից, այլ բակտերիայից պաշտպանվելու համար են, ինչի մասին գրված է նաեւ դիմակի տուփի վրա եւ , փաստորեն, եթե մենք վիրուսի դեմ ենք պայքարում, ապա սովորական դիմակը դրա դեմ պաշտպանիչ միջոց չէ: Վիրուսից պաշտպանվելու համար հատուկ դիմակներ կան:

«Եթե կառավարությունն ասում է, որ բոլորը պետք է դիմակ կրեն, բանուկ վայրերում մի քանի տեղ կարելի է տեղադրել ապարատներից, որոնք անվճար դիմակ կտրամադրեն բնակչին եւ բնակիչը կարիք չի ունենա գումար ծախսել, առավել եւս, եթե այդ դիմակը 3-4 ժամ կյանք ունի, իսկ այն, որ վարչապետն ասում է, թե կարող եք՝ տանը դիմակ պատրաստել, ուղղակի ծիծաղելի է: Ի՞նչ է, պետք է թաշկինակ վերցնել, պահե՞լ: Մենք խա՞ղ ենք խաղում, թե՞, իսկապես ուզում ենք ժողովրդին հեռու պահել վիրուսից»,-ասաց մասնագետը:

Գարիկ Աղաբեկյանի խոսքով, Հայաստանում դիմակի արտադրությունը , որը, ըստ էության մոտ 20 դրամ է արժենում արտադրողի համար, ուշ սկսվեց, բայց դրանով հանդերձ, կառավարությունը պետբյուջեի միջոցներով կարող է գնել եւ անվճար փողոցներում հատուկ սարքի միջոցով բնակչությանը տրամադրել:

Հարցին, արդյո՞ք հիմա Հայաստանը գտնվում է վարակի տարածման երկրորդ ալիքի փուլում, ինչպես հայտարարում էր վարչապետ Փաշինյանը, Գարիկ Աղաբեկյանը պատասխանեց. «Այս հիվանդությունը չուսումնասիրված է, եւ ասել՝ առաջին ալիք, երկրորդ ալիք, երրորդ ալիք, ուղղակի անհեթեթություն է: Դա վիրուս է, որը կվերանա, երբ ժողովրդի իմուն համակարգը կկարողանա պայքարել դրա դեմ»:

Ինչ վերաբերում է կորոնավիրուսի դեպքերի վիճակագրությանը՝ Գարիկ Աղաբաբյանը շեշտեց, որ որոշելու համար, թե հիվանդությունն ինչպես է ախտահարում մարդու օրգանիզմը եւ որն է մահվան պատճառը, պետք է կատարել դիահերձում, առանց որի մահվան պատճառը հնարավոր չէ նշել:

«Այն բանից հետո, երբ այս մասին մամուլով ելույթ ունեցա, իշխանությունը սկսեց ասել, որ մահացածը վիրուսով հիվանդ էր , բայց ուներ նաեւ լրացուցիչ հիվանդություններ: Բնական է, որ լրացուցիչ հիվանդություններ ունեցող մարդու մոտ իր հիվանդությունները պետք է սրվեն եւ մարդը մահանում է շնչառական անբավարարությունից, թոքերի այտուցից. շաքարային դիաբետից, սիրտ-թոքային անբավարարությունից»:

Գարիկ Աղաբեկյանն ասաց, որ ՀՀ նախկին գլխավոր պաթանատոմ եղած տարիներին մահերի թվաքանակը գրանցում էր: Նրա խոսքով, միայն Երեւանում օրական 25-30 մահ էր արձանագրվում : «Կարծեմ երեկ ասացին, որ 15 մարդ է մահացել, այսօր ավելի քիչ: Դիահերձեք մահացածներին: ԱՀԿ-ն պարտադրե՞լ, ասել է որ չհերձե՞ն, մեզ մոտ էլ ենթարկվում են, իսկ Իտալիան եւ Ռուսաստանը արհամարհեցին եւ սկսեցին դիահերձել»,-ասաց մասնագետը՝ հավելելով, որ կորոնավիրուսի խնդիրն, ի վերջո իր ավարտին կհասնի, բայց աշխարհի մակարդակով դեռ խնդիրներ կան:

Ինչ վերաբերում է կորոնավիրուսի դեմ պայքարը փաստացի ձախողելուն, Գարիկ Աղաբեկյանն ասաց՝ ձախողեցինք, որովհետեւ ուշացրեցինք: «Ես մի քիչ կասկածում եմ, առողջապահության նախարարն ընդհանրապես , բժշկական գիտելիքներ ունի՞, թե ոչ: Իհարկե, նա չգիտեր, թե ինչ է այս հիվանդությունը, բայց դրանով հանդերձ, նա իրավունք չուներ նման կերպ արտահայտվել: Դուք, երևի, հիշում եք, որ լրագրողներին ասաց՝ ձեզ կվարակեմ: Չի կարելի, երբ մարդը կառավարության անդամ է, գոնե մի քիչ պետք է իր խոսքերին ուշադրություն դարձնի, պետք է մտածի նոր խոսի, ոչ թե կարծիք դուրս տա, նոր մտածի»:

Բժշկական բոլոր խնդիրներով, ըստ մասնագետի, պետք է զբաղվի ու կարծիք հայտնի բացառապես առողջապահության նախարարը, մինչդեռ ցանկացած նախարար իրեն իրավունք է վերապահում կարծիք հայտնել ու առաջարկներ անել եւ դա է պատճառը, որ ունենք այս իրավիճակը:

Գարիկ Աղաբեկյանը տարակուսելի համարեց նաեւ Արսեն Թորոսյանի հայտարարությունը, որով նախարարը կասկածի տակ դրեց Վրաստանում կորոնավիրուսային իրավիճակը:

Սա, ըստ մասնագետի, ուղղակի անթույլատրելի է: «Դուք պատկերացնո՞ւմ եք, ինչ իրավիճակ է: Ես, որպես քաղաքացի, իմ հրապարակային հայտարարություններում խնդրել եմ վարչապետին եւ ասել՝ պարոն վարչապետ Ձեր առողջապահության նախարարն իր տեղում չէ, երկու տարի անց՝ էլ նա չի պատկերացնում, թե ինչ աթոռի վրա է նստում: Ցավոք, ձայն բարբառո հանապատի: Նախարար ոնց նստած է, այնպես էլ նստած է, ոնց առողջապահության ոլորտը գլորվում է դեպի անդունդը, այն էլ այս ծանր իրավիճակում, այդպես էլ գլորվելու է, մինչեւ այս հարցերը չշտկվեն»,-եզրափակեց մասնագետը:

Աղբյուր` Փաստինֆո