Փաստ ինֆո

Կորոնավիրուսի համավարակով պայմանավորված սահմանափակումներից հետո շտապօգնության կանչերի թիվն առանձնապես փոփոխության չի ենթարկվել, փոխարենը աճել է հոսպիտալացման թիվը։

«Փաստինֆո»-ի հետ զրույցում «Շտապօգնություն» ՓԲԸ տնօրեն Թագուհի Ստեփանյանն ասաց, որ ավելացել են հիվանդանոցից մյուս հիվանդանոց, տնից հիվանդանոց տեղափոխությունները. «Օրական կարող ենք ունենալ 650 կանչ։ Եղել է նաև, որ 700-ի են հասել կանչերը, բայց միջինում 650 կանչ է, որի դեպքում միջինում ունենում ենք 200 հոսպիտալիզացիա»,-ասաց Թագուհի Ստեփանյանը՝ հավելելով՝ ծանրաբեռնվածություն կա, բայց անձնակազմն ամբողջությամբ է աշխատում է։

Ինչպես նախկինում, այնպես էլ հիմա մարդիկ տարբեր խնդիրներով են կանչ գրանցում։ Շտապօգնության առաջնային կանչերից են սիրտ-անոթային, սուր շնչառական, վնասվածքների հետ կապված խնդիրներով կանչերը։ Դիտարկմանը՝ երբեմն մարդիկ չնայած վատ ինքնազգացողությանը՝ վախենում են շտապօգնությանը դիմել կորոնավիրուսով պայմանավորված, Թագուհի Ստեփանյանն ասաց. «Շատ վախ չենք նկատել, որովհետև յուրաքանչյուր մարդ, եթե ունի խնդիր դիմում է և բնականաբար տեղափոխվում հիվանդանոցներ, որտեղ կարող են օգնություն ստանալ։ Բոլոր խնդիրներով էլ կանչ գրանցում են, իհարկե շատերը կոնկրետ կորոնավիրուսի կասկածով են հիվանդանոց տեղափոխվում»,-ասաց «Շտապօգնություն» ՓԲԸ-ի տնօրենը։

Շտապօգնության աշխատակիցների շրջանում կորոնավիրուսի հաստատված դեպքեր կան, սակայն տնօրենը ստույգ թիվ չկարողացավ ասել։ Հարցին՝ թիրախային խմբում գտնվող մարդիկ շարունակու՞մ են աշխատել, թե՞ արձակուրդում են գտնվում, Թագուհի Ստեփանյանն ասաց, որ այն աշխատակիցները, որոնք ցանկանում են արձակուրդ գնալ, ձևակերպվում է նրանց արձակուրդը. «Ով ուզում է շարունակել աշխատել, հանգիստ աշխատում է՝ ապահովելով համապատասխան անվտանգության բոլոր կանոնները»,-նշեց Թագուհի Ստեփանյանը։

Հավելենք, որ «Փաստինֆո»-ի խմբագրություն ահազանգել են քաղաքացիներ, որոնք բողոքել են շտապօգնության կանչերին ուշ արձագանքելուն։ Նրանցից շատերը նշում էին, որ լինում են դեպքեր, երբ շտապօգնությունը կանչից մի քանի ժամ հետո է միայն գալիս։

Աղբյուր` Փաստինֆո