Փաստ ինֆո

Քաջարանը հանգիստ քաղաք է, երբևիցե ոչ մի ցույցի չի մասնակցել։ Մարդիկ փոքրուց ցույց, երևի, հեռուստացույցով են տեսել միայն։ Բայց այսօր քաջարանցին հասկանում է, որ պետք է հարկ եղած դեպքում բարձրացնի իր բողոքի ձայնը։ «Փաստինֆո»-ի հետ զրույցում այս մասին ասաց Քաջարանի բնակիչ Հովհաննես Հարությունյանը, ով երեկվա բողոքի ակցիայի մասնակիցներից է։

Հիշեցնենք, որ երեկ Կապանում լարված իրավիճակ էր։ Մարդիկ հավաքվել էին ոստիկանության շենքի դիմաց՝ պահանջելով ազատ արձակել Քաջարանի երեք բնակիչներին, որոնց ոստիկանները ձերբակալել էին վաղ առավոտյան։ Նրանք պնդում էին, որ տղաներին ձերբակալել են առանց ծանուցման և իրավական որևէ հիմքի։

Հովհաննես Հարությունյանը պատմեց՝ դեպքը տեղի է ունեցել մայիսի 24-ին՝ վաղ առավոտյան։ Քաջարանի երեք բնակիչները մեքենայով աշխատանքի էին գնում, երբ ոստիկանները նրանց բերման են ենթարկել. «Ինչպես միշտ ասֆալտին փռելով, շոուներով կազմակերպեցին, առանց ծանուցման, առանց որևէ բանի ուղղակի բերման ենթարկեցին։ Հետո մեկին բաց թողեցին՝ հիմնավորելով, որ սխալվել են, բայց նրան արդեն խոշտանգել էին»,-ասաց մեր զրուցակիցը։

Թե ինչ նախապատմություն ուներ դեպքը, քաղաքացին այդ մասին չխոսեց։ Անդրադառնալով Քննչական կոմիտեի տարածած հաղորդագրությանը, որտեղ Քաջարանի համայնքապետ Մանվել Փարամազյանի անունը շոշափվում էր առևանգման, ծեծի ու թմրանյութի հետ կապված քրեական գործի հետ, Հովհաննես Հարությունյանն ասաց. «Համայնքապետը չի կարող նման քրեական գործերում լինի։ Նա լուրջ մարդ է և նման քրեական գործերով նրա անունը տալն անիմաստ է։ Այսօր այնպես է ստացվել, որ եթե իրենց նշանակածը չէ, կարելի է ամեն ինչ ասել ու փնովել»։

Հարցին՝ արդյոք քաղաքական ենթատեքստ է տեսնում այստեղ, Հովհաննես Հարությունյանն ասաց՝ որոշ «ականջներ» են երևում, որի մասին հետո կխոսի. «Ինձ համար շատ բան հասկանալի է, քանի որ որոշակի գործընթացներում մասնակից եմ եղել հեղափոխության և այլն, շատ մարդկանց եմ ճանաչում, ով ում բարեկամն է։ Որոշակի բաներ տեսնում եմ, առայժմ դրա մասին լռում եմ, կխոսեմ ավելի ուշ՝ պարզելուց հետո»։

Նշենք, որ մամուլում շրջանառվում էր տեղեկություն, որ այս ձերբակալման հիմնական նպատակը հետագայում Քաջարանի համայնքապետ Մանվել Փարամազյանի դեմ ցուցմունքներ կորզելն է։ Հովհաննես Հարությունյանը, սակայն, զերծ մնաց նման խոսակցություններին անդրադառնալուց։ Վերջինս ընդգծեց՝ համայնքապետին իրենք են ընտրել։ Նա 95 տոկոս ձայն է ստացել և պետք չէ այդ մարդու հետ նման լեզվով խոսել. «Քաղաքական իշխանություններին կհորդորեի նման քայլերի չգնալ։ Համայնքապետը երկու տարվա մեջ համայնքը կառուցեց, մինչև այսօր էլ սարքում է։ 2017 թվականից համայնքապետ է ու պետք է տեսնեք՝ ինչպես է բարեկարգել, ժողովուրդը ոնց են իրար հետ։ Եթե մեկը մի հատ վարդի քոլա դնում ինչ-որ մի տեղ, նկարում, ասում ա վայ էս թուփը տնկեցի, ինքն իրան գովազդումա։ Եթե էդ մարդն այդ գովազդը չի անում, նշանակում է ոչ մի բան չի անում հա՞։ Այսօրվա իրավիճակն այսպես եմ հասկանում»,-ասաց Հովհաննես Հարությունյանը՝ հավելելով, որ համայնքապետը ՀՔԾ պետի հետ պայմանավորվածություն է ձեռք բերել և առայժմ կսպասեն իրադարձությունների զարգացման հետագա ընթացքին։

Աղբյուր` Փաստինֆո