Փաստ ինֆո

Հասարակությանը հերթական անգամ մոլորեցնում են՝ ներկայացնելով հարցն այնպես, իբր, այդ պարկուճները ենթադրաբար փոխարինելու, վերացնելու, բնաջնջնելու պատճառով «Մարտի 1»-ի սպանությունները չեն կարողանում բացահայտել։ Այս մասին «Փաստինֆո»-ի հետ զրույցում ասաց ՀՀ երկրորդ նախագահ Ռոբերտ Քոչարյանի պաշտպանական խմբի անդամ Հայկ Ալումյանը։

Հիշեցնենք, որ մայիսի 16-ին վարչապետ Նիկոլ Փաշինյանը մամուլի ասուլիսի ժամանակ հայտարարել էր, որ 2008թ մարտի 1-ի իրադարձությունների ժամանակ կրակված պարկուճները փոխվել են, ինչը նշանակում է, որ կրակված իսկական պարկուճները չկան և այսօր հնարավորություն չունեն պարկուճների միջոցով նույնականացնել ու գտնել զենքերը։

Մինչդեռ՝ Հայկ Ալումյանը, անդրադառնալով զենքի նույնականացման գործընթացին, արձանագրեց, որ սպանվածի կամ վիրավորում ստացած անձի մարմնից վերցնում են հրազենային վնասվածք պատճառած գնդակը, վերցնում են զենքերը, որոնք այդ ժամանակ գտնվել են այնտեղ և կարող էին գործադրված լինել, ապա բոլոր զենքերից փորձնական կրակոցներ են արձակում, հետո յուրաքանչյուր զենքից փորձնական կրակված գնդակը համեմատում են մարմնից հանված գնդակի հետ։

«Նույն զենքը թողնում է նույնանման հետքեր գնդակների վրա։ Համեմատում են բոլոր զենքերից փորձնական կրակված գնդակների վրայի հետքերը՝ տվյալ անձի մարմնից հանած գնդակի հետքերի հետ և այդպես պարզում են այն հրազենը, որից արձակվել է այդ գնդակը։ Այս ամբողջ գործընթացի մեջ գոյություն չունի մի փուլ, որտեղ պարկուճն ունի նշանակություն։ Պարկուճն այն մասն է, որը զենքից դուրս է թռնում, մարդուն պարկուճով չեն սպանում։ Այսինքն՝ այս գործընթացի մեջ կարևորը գնդակն է և այն զենքերը, որոնք հնարավոր է, որ գործադրված լինեն կամ գործադրվել են »,- ասաց Ալումյանը։
Նրա խոսքով՝ հասարակության մեջ քիչ մարդ կա, որոնք լավ են պատկերացնում այս դետալները, մեծամասնությունը հարցի այս կողմի հետ չի առնչվել և այդ պատճառով վարչապետի խոսքերն ընդունում են որպես ճշմարտություն։

«Սա հերթական կոպիտ մանիպուլյցիան է, հերթական միֆն է գործի շուրջ ստեղծված, իբրև՝ չեն կարողանում բացահայտել, որովհետև պարկուճները փոխարինվել են։ Ընդ որում՝ ըստ մեղադրանքի՝ պարկուճները փոխարինվել են 2008թ երկրորդ կեսին։ Հետո դա կհաստատվի, թե ոչ՝ ցույց կտա այդ անձանց դատավճիռը, բայց բոլոր դեպքերում այդ պարկուճները փոխված լինեն, թե ոչ, դա սպանությունը բացահայտելու հետ որևէ կապ չունի։ Եթե վարչապետը ծառայած լիներ բանակում, զենքի հետ մեկ անգամ շփված լիներ կամ որևէ մասնագետի հետ խորհրդակցած լիներ, տարրական մակարդակի այդ ուղղությամբ մի բան ուսումնասիրած լիներ՝ նախքան նման բան ասելը, ապա, հավանաբար, ընդհանրապես նման բան չէր ասի »,- նշեց Ալումյանը՝ չբացառելով նաև, որ մի գուցե այդ ամենն իմանալով հանդերձ է վարչապետը մարդկանց գցում մոլորության մեջ։

Վարչապետը մայիսի 16-ի ասուլիսում նաեւ հայտարարել էր, թե պարզվել է ովքեր են մարտի 1-ի իրադարձությունների ժամանակ ապօրինի զինված խմբավորումներ ձևավորել ու մտցրել ժողովրդի մեջ, այսօր արդեն քրեական գործերը հարուցված են, մի մասն ուղարկված է դատարան՝ «Փաստինֆո»-ի հետ զրույցում Ալումյանն ասաց, որ չգիտի, թե վարչապետն ում նկատի ունի, ինչ գործեր նկատի ունի։

«Եթե նա անուններ չի տալիս։ Այստեղ արդեն անմեղության կանխավարկածի մասին չի խոսքը։ Եթե նա ասում է՝ մենք արդեն պարզել ենք, ոչ թե՝ ասում է՝ մեղադրում ենք կամ կասկածում ենք ինչ- որ մարդկանց, թող ասի՝ այդ ինչ են պարզել, որ քրեական գործի մասին է խոսքը, ապօրինի զինված խմբավորումների ներգրավումն ում է մեղսագրված։ Ես դեռ այդպիսի փաստ չունեմ, ես այդպիսի բան չեմ տեսել »,- ասաց Ալումյանը՝ հավելելով, որ չգիտի, թե ինչ տվյալների հիման վրա է վարչապետը դա ասում։

Ալումյանը հիշեցրեց, որ վարչապետը հենց ինքը 2018թ օգոստոսի 17-ին՝ իր պաշտոնավարման 100-րդ օրվա հետ կապված հանրահավաքին հայտարարել էր, որ «Մարտի 1»-ի գործն ամբողջությամբ բացահայտված է։

«Այս պայմաններում, եթե վարչապետն ասում է, որ մենք արդեն ամբողջությամբ բացահայտել ենք «Մարտի 1»-ի գործը՝ ընդ որում 1.5 տարի առաջ, նշանակում է, որ վարչապետի համար այդ գործում միայն մի բան նշանակություն ունի՝ Ռոբերտ Քոչարյանին մեղադրանք առաջադրել և կալանավորել։ Իրեն այլ տեսանկյուններից այդ գործը չի հետաքրքրում»,- ասաց Ալումյանը։

Ինչ վերաբերում է սահմանադրական կարգի տապալման գործում տուժողների մասնակցությանը, Ալումյանն ասաց, որ այդ հարցը դատավարության համապատասխան փուլում կբարձրացվի։

«Ընդհանրապես տրամաբանությունը հետևյալն է՝ ուզում են այնպես լինի, որ ոչ միայն մեղադրողները գան և մեղադրեն, այլև՝ տուժողները գան և մյուս կողմից հանդես գան որպես մեղադրող կողմ, բայց սպանությունների վերաբերյալ քրեական գործն առանձնացված է և հիմա գտնվում է ՀՔԾ-ում՝ նախաքննության փուլում, իսկ ավելի տրամաբանական կլիներ, եթե տուժողների իրավահաջորդներն այնտեղ մասնակցեին դատավարությանը, ոչ թե՝ այստեղ»,- նշեց Ալումյանը։

Հեղինակ՝ Իզաբել Սահակյան

Աղբյուր` Փաստինֆո