Փաստ ինֆո

Պարոն Մարուքյանն այս երկու տարիների ընթացքում ամեն ինչ արել է, որպեսզի իրեն հարվածեն, նա դա արել է «Բարգավաճ Հայաստան» կուսակցության հետ, «Իմ քայլի» հետ, իր նպատակը դա է եղել։ Այս մասին այսօր լրագրողների հետ ճեպազրույցում ասաց ԱԺ «Իմ քայլը» խմբակցության պատգամավոր, ԱԺ փոխնախագահ Ալեն Սիմոնյանը։

Նա ԱԺ-ում տեղի ունեցած ծեծկռտուքը կրկին սադրանք որակեց ու շեշտեց, որ իշխանությունը միանշանակ չպետք է տրվեր սադրանքների։
ԱԺ «Լուսավոր Հայաստան» խմբակցության ղեկավար Էդմոն Մարուքյանն էլ ասաց, թե փաստորեն ազատ խոսքը սադրանք է համարվում։

«Ցավդ տանեմ, ազատ խոսքն ու վիրավորանքը տարբերի»,-դիմելով Մարուքյանին ասաց Ալեն Սիմոնյանը։ Մարուքյանն էլ իր հերթին ասաց. «Դուք այսօր ժողովրդի տված քվեն և ձեր վստահությունը մսխում եք»։

Սիմոնյանը Մարուքյանին պատասխանեց, թե նա գործ չունի իշխանության վստահության հետ. «Մենք ձեզ շանս ենք տվել, մենք ձեզ բազմիցս շանս ենք տվել, ցավոք սրտի, դուք այդ շանսից չօգտվեցիք»։

Մարուքյանը պատասխանեց. «Դու՞ք եք մեզ շանս տվել։ Այ այն, որ խնդրում էիք ձեզ հետ ցույցերին մասնակցեինք...»։ Մարուքյանը չէր ավարտել խոսքը, երբ Սիմոնյանն ասաց, որ այո, շատ էին խնդրում, որ Սերժ Սարգսյանի նկատմամբ այդքան ուշադրություն չդարձնեն։

«Սերժ Սարգսյանը ձեր Սերժ Սարգսյանն է։ Եթե ձերը չէ, բա ինչի՞ նստած չէ։ Բա ասում էիք կնստացնենք»,-ասաց Մարուքյանը։ Ալեն Սիմոնյանն էլ Մարուքյանին կոչ արեց չշտապել ու ասաց. «Կարող է տենց բան էլ լինի, ով իմանա։ Հլը այնքա՜ն մարդ կարող է նստի, բայց դուք կգաք այստեղ այլ կարծիք կասեք և կպաշտպանեք նրանց, վստահ եմ»։

Աղբյուր` Փաստինֆո