Փաստ ինֆո

Երբ մենք հայտարարեցին, որ փոփոխություններ ենք կատարելու «Հեռուստատեսության և ռադիոյի մասին» օրենքում և ամիսներ առաջ էլ «Գովազդի մասին» օրենքում փոփոխություններ կատարեցինք ինձ համար զարմանալի կերպով «ֆեյսբուքում» կրկին սկսվեցին ֆեյքերը արձագանքել դրանց։ Իսկ «Տեսալսողական մեդիայի մասին» օրենքի նախագծի շրջանառության մեջ դնելուց հետո ավելի մեծ ալիք եկավ ֆեյքերի կողմից դեպի իմ «ֆեյսբուքյան» էջ, որից հետո երեկ ստիպված եղա դիտել մի մեծահարուստ երիտասարդի տեսաուղերձ, որում տեղադրված էր նաև իմ լուսանկարը։ Այս մասին այսօր ԱԺ-ում ասաց «Իմ քայլը» խմբակցության խմբակցության պատգամավոր Մխիթար Հայրապետյանը։

Նա նշեց, որ երկար ժամանակ փորձել է հասկանալ, թե ինչպես է արժանացել այդ պատվին, որ լուսանկարը հայտնվել է տեսանյութում, սակայն քննարկումներից հետո հասկացել է, որ անհնար է պատահական ընտրված լիներ նաև իր լուսանկարը։

«Այս կոնտեքստում կուզենայի մի պատմություն պատմել։ Մի անգամ Մարկ Տվենը հոդված է գրում, որտեղ ասվում է, որ միստր «էս»-ը արժանի չէ, որ մենք նույնիսկ թքենք իր վրա, միստր «էս»-ը, որը խմբագիրն էր, դատի է տալիս արժանապատվությունը վիրավորելու համար, դատավորը պարտադրում է, որպեսզի Մարկ Տվենը ներողություն խնդրի, նա էլ ասում է, որ ընդունում է իր մեղքը, ներողություն է խնդրում ու պնդում է ճիշտ հակառակը»,-ասաց Հայրապետյանը։

Նա շեշտեց՝ կառավարության ձեռքբերումներից է, որ միֆականացված որոշ գործիչներ սկսել են բաց շփում ունենալ հանրության հետ։

«Հիմա ամեն կերպ փորձում են ամեն կերպ ստիպել, որ Նիկոլ Փաշինյանը անդրադառնա, Արարատ Միրզոյանը անդրադառնա, հիմա փաստորեն ես խայծը կերա ու պետք է անդրադառնամ։ Ուզում եմ հավատացնել, որ այն բարեփոխումները, որոնք մեդիայի ոլորտում տեղի են ունենում ուղղված չեն անձերի դեմ, դա ուղղակի հակասում է մեր արժեքներին, այդ բարեփոխումները միտված են ոլորտը, բնագավառն առողջացնելուն։ Հիմա ինձ մի բան ասեք, ես մեղավո՞ր եմ, որ հանրային շահը ուղիղ հակասության մեջ է անձի կամ որոշ անհատների սեփական շահին»,-ասաց պատգամավորը։

Նրա խոսքով, խաղի նոր կանոններ պետք է լինեն, որոնց պետք է հետևեն դաշտում գործող խաղացողները՝ մեծից փոքր, և այդ խաղի կանոններն արդար են ու հավասար բոլորի համար։

«Նախկինում արտոնյալ կարգավիճակում գտնվող և դեռևս այս պահին իներցիայով այդ կարգավիճակից օգտվող հեռուստաընկերությունների համար այս կանոնները հավասար են։ Երեկ խոսում էր, թե Կառավարությունը մանիպուլյացիաների է գնում ու նաև խոսվում էր մեր արժանիքների մասին։ Ես ուզում եմ ասել, որ մեր արժանիքների մասին միայն կարող է խոսել ժողովուրդը, մեր արժանիքների մասին չի կարող խոսել այն անհատը, այն մարդը, որի կյանքի կարևորագույն արժանիքներից մեկը, ըստ երևույթին, տվյալ ժամանակահատվածում աներոջ հարցում ճիշտ կողմնորոշվելն էր»,-ընդգծեց Հայրապետյանը։

Աղբյուր` Փաստինֆո