Փաստ ինֆո

Ռեստորանների հայկական միությունը նախաձեռնել է հռչակագիր, որով վարձատուներին առաջարկվում է առաջիկա մեկ տարվա համար վերանայել վարձակալության պայմանագրերը։

«Փաստինֆո»-ի հետ զրույցում Ռեստորանների հայկական միության նախագահ Վահե Գևորգյանն ասաց, որ հռչակագիրն առաջին հերթին ստորագրել են միության անդամ ռեստորանները և սրճարանները, որոնց թիվը 200-ից ավել է, սակայն հռչակագիրը բաց է և հանրային սննդի ոլորտի այլ տնտեսվարողներ նույնպես կարող են այն ստորագրել։ Վահե Գևորգյանի խոսքով երեկվա դրությամբ երկու տասնյակից ավել ռեստորան ու սրճարան միացել է հռչակագրին։

«Հռչակագրով նախ առաջարկում ենք վարձատուներին առաջիկա մեկ տարվա համար վերանայել վարձակալության պայմանագրերը։ Ակնհայտ է, որ բազմաթիվ խնդիրներ կան՝ սկսած շրջանառության և այցելուների պակասից, հետևաբար մեկ տարի ժամկետով առաջարկել ենք մինչև 50 տոկոս վերանայել վարձավճարները։ Ողջամիտ սահմանը համարել ենք մինչև 50 տոկոսը և արդեն թողել ենք կողմերին։ Ամեն բիզնես իր պայմաններն ունի և հնարավոր է, որ ինչ-որ փոխզիջման գան դրա շրջանակներում։ Բացի այդ այլ ռեստորաններին առաջարկում ենք 1.5 տարվա ընթացքում իրար հանդեպ վարձակալության հետ կապված ագրեսիվ քայլեր չիրականացնեն։ Այսինքն կոպիտ ասած չփորձեն մեկի դժվարության հաշվին մեկ ուրիշը տարածքը վերցնի։ Դա նաև վարձատուին է ուղերձ, որ վերջինս այդ ընթացքում այլ ռեստորանի հետ չբանակցի իրենց գործընկերների զբաղեցրած տարածքների վարձակալության հարցով»,-ասաց Վահե Գևորգյանը։

Անդրադառնալով հարցին՝ արդյոք այս շրջանում եղել են ռեստորաններ ու սրճարաններ, որոնք վարձավճարի հետ կապված խնդիր են ունեցել, Վահե Գևորգյանն ասաց, որ վարձատուների զգալի մասը հիմնականում ընդառաջել է և փոխզիջումների է գնացել. «Այսինքն ինչ-որ տոկոս են զիջել կամ եղել է նաև, որ փակ շրջանի համար վարձ չեն վերցրել։ Սակայն եղել են նաև հակառակ դեպքեր, երբ վարձատուն որևէ կերպ չէր համաձայնվում փոխզիջումների գնալ»,-ասաց Ռեստորանների միության նախագահը։

Հարցին՝ արդյոք առաջիկա մեկ տարվա ընթացքում հանրային սննդի ոլորտին կհաջողվի վերականգնել շահույթի մի մասը, Վահե Գևորգյանը նկատեց՝ դա բազմաթիվ գործոններից է կախված, բայց բիզնեսը, իհարկե, կփորձի ելքեր գտնել. «Դա կլինի և՛ առաքման ծառայություններն ավելի աշխուժացնելով, և՛ ներքին տուրիզմն աշխուժացնելով։ Ակնհայտ է, որ մի քանի ամիս Հայաստան զբոսաշրջիկների հոսք չի լինի, լինելու դեպքում էլ քիչ կլինի։ Հետևաբար առաջին հերթին պետք է ներքին հաճախորդների այցելությունը խթանել։ Ներքին սպառումը խթանելու հետ կապված ծրագիր ենք քննարկում, որի մասին, հավանաբար, հաջորդ շաբաթ կհրապարակենք։ Ակնկալում ենք նաև պետության աջակցությունը այն առումով, որ լինեն երկարաժամկետ զարգացման ծրագրեր և նրանք փորձեն ոլորտին աջակցել»,-ասաց Վահե Գևորգյանը՝ համաձայնելով, որ ծանր վիճակ է և լավագույն դեպքում ակնկալում են, որ մյուս տարի նախաճգնաժամային շրջանառության 60 տոկոսին նոր կհասնեն։

Աղբյուր` Փաստինֆո