Փաստ ինֆո

ԱԺ Պետաիրավական հարցերի մշտական հանձնաժողովը քննարկում է Քաղաքացիական դատավարության օրենսգրքում լրացումներ կատարելու մասին օրենքի նախագիծը։

Հիմնական զեկուցող Գևորգ Պետրոսյանն ասաց, որ ստեղծված ատելության մթնոլորտում անհամեմատ շատացել են քաղաքական, անձնական և այլ հայացքներից ելնելով փոխադարձ վիրավորանքներն ու միմյանց արժանապատվությունը նսեմացնելու միջոցով խնդիրները լուծելու մոտեցումը։

«Այդ մոտեցումը սանձելու, դրա դեմ պայքարելու միջոցներից մեկը խախտված կամ վիճարկվող իրավունքի դատական պաշտպանության գործընթացն արագացնելն է։ Եթե մարդիկ միմյանց վիրավորում են, օրինակ` ասում են թափթփուկ, տականք, կամ ավելի մոդայիկ տարբերակը՝ շնաբարո դուրսպրծուկ, ապա, եթե տվյալ անձը չի նախընտրում գլխով հարվածելու ու բռունցքներին անցնելու տարբերակը, նրան միայն մնում է դատական պաշտպանության տարբերակը որպես հիմնական միջոց»,-ասաց Գևորգ Պետրոսյանն ու շեշտեց, որ դատական պաշտպանությունը եղել է և շարունակում է մնալ քաղաքացու օրինական շահերի պաշտպանության հիմնական միջոցը։

Նա շեշտեց, որ դատարանները գործող օրենսդրությամբ պատվի, արժանապատվության ու գործարար համբավի վնասների հատուցման գործերը քննում են ընդհանուր կարգով ու ընդհանուր ժամկետներով, ուստի վիրավորական ու զրպարտչական տեղեկատվությունը տարիներ շարունակ թարմացվում է դատական նիստերը հետաձգելու արդյունքում։

«Եթե ասենք այդ վիրավորանքի մասին լսել է 5 մարդ, ապա այս դեպքում մարդը տարիներ շարունակ գտնվում է ԶԼՄ-ների ուշադրության կենտրոնում»,-ասաց ԲՀԿ պատգամավորը։

Պետրոսյանը հայտնեց, որ հարցմամբ դիմել է ՀՀ դատական դեպարտամենտ ու որոշակի վիճակագրական տվյալներ ստացել, ըստ որոնց՝ դատական համակարգ տեղեկատվական համակարգչային ծրագրում առկա տվյալների 2018-2019թթ ընթացքում առաջին ատյանի ընդհանուր իրավասության դատարաններում պատվին, արժանապատվությանն ու գործարար համբավին պատճառված վնասի հատուցման պահանջի վերաբերյալ քննված ու համապատասխան որոշում կայացված գործերի քննության նվազագույն տևողության ժամկետը 30 օր է, առավելագույնը՝ 517, իսկ նշված գործերի ընդհանուր թվի քննության միջին տևողությունը 278 օր է։

«Մեր քաղաքացիները ուղղակի չեն նախընտրում դատարան դիմել, ասում են դատարան դիմելու դեպքում գործը տարիներով քննվելու է, ամբողջ լրատվամիջոցներով խայտառակ են լինելու՝ ինչ է թե վերջում 1մլն դրամի փոխհատուցում լինի»,-ասաց հիմնական զեկուցողը։

Նա հայտնեց, որ այս խնդրի լուծման համար նախագծով առաջարկվում է ժամկետները սեղմել, որպեսզի մարդն իմանա, որ դատարան դիմելու արդյունքում առավելագույնը 6-7 ամսում իր գործով վերջնական դատական ակտ կլինի։

Անդրադառնալով նախագծի վերաբերյալ Կառավարության դիտարկմանը, թե դատարանների ծանրաբեռնվածության խնդիր կա, Պետրոսյանն ասաց, որ մարդուն չպետք է հետաքրքրի, թե պետությունն ինչպես է կազմակերպում դատական ապարատի աշխատանքը. «Մարդը մեղավոր չէ, որ պետությունն այնպես չի կարողանում կազմակերպել դատական համակարգի գործունեությունը, որ կարողանա ժամանակին, արագ քննել անձի հետ անբաժանելիորեն կապված իրավունքի հարցերը։ 10 ձևի վերահսկիչ, հսկիչ մարմիններ կան, սակայն կարծես այդ հիմնարկների գործունեության մասին մեծ տեղեկատվություն չկա, թող այդ տեսչությունները կրճատեն, դատավորի մի քանի հաստիք ավելացնեն ու լուծեն մարդկանց վեճերը։ Ինչքա՞ն կարելի է մարդու արժանապատվությունը դարձնել ծածմվելու առարկա»։

Աղբյուր` Փաստինֆո