Փաստ ինֆո

Ոստիկանի նկատմամբ բռնություն գործադրելու մեջ մեղադրվող Հարություն Խազիկյանն գրավի դիմաց ազատ արձակելու մասին դատարանի որոշման դեմ դատախազությունը վերաքննիչ բողոք է ներկայացրել: Այս մասին «Փաստինֆո»-ի հետ զրույցում ասաց փաստաբան Էրիկ Ալեքսանյանը:

Նա նաև տեղեկացրեց, որ պաշտպանական կողմը ևս մասնակի բողոքարկել է դատական ակտը, մասնավորապես՝ կալանավորման պայման հիմնավոր կասկածի և հիմքերի մասով: Փաստաբանի խոսքով՝ անհասկանալի է, թե ինչու է դատախազությունը բողոքարկել անձին գրավի դիմաց ազատ արձակելու մասին որոշումը՝ հաշվի առնելով, որ տարբեր գործերով դատախազունն սեփական նախաձեռնությամբ միջնորդություններ է ներկայացրել դատարան՝ կորոնավիրուսի համավարակով պայմանավորված անազատության մեջ գտնվող անձանց խափանման միջոցները փոփոխելու համար:

«Փաստինֆո»-ն ավելի վաղ տեղեկացրել է մարտի 26-ին Բագրատունյաց փողոցում տեղի ունեցած միջադեպի մասին:
Ըստ նախաքննական մարմնի՝ 26.03.2020թ. ժամը 13:00-ի սահմաններում, իր ծառայողական պարտականությունները կատարելու ընթացքում, հայտարարված արտակարգ դրության ժամանակահատվածում քաղաքացիների տեղաշարժման թերթիկն ստուգելու նպատակով, ՀՀ ոստիկանության ՊՊԾ գնդի 5-րդ վաշտի ոստիկան Հակոբ Կարապետյանը Բագրատունյաց պողոտայում մոտեցել է քաղաքացուն, պահանջել անձնագիրը և վերոհիշյալ թերթիկը։ Վերջինս մոտեցել է նշված հատվածում կայանված «Տոյոտա Քեմրի» մակնիշի ավտոմեքենային, բացելով ավտոմեքենայի դուռը՝ նստել է վարորդի նստատեղին, ինչի ընթացքում ոստիկանը, իբր, տեսել է գոտկատեղին ամրացված ատրճանակը ու պահանջել է նաև այն կրելու թույլտվության փաստաթուղթը։ Քննչական մարմնի վարկածով՝ քաղաքացին չի ենթարկվել իշխանության ներկայացուցիչ հանդիսացող ոստիկանության աշխատակցի օրինական պահանջներին, ավտոմեքենան գործարկել է ու վարել, իսկ ոստիկանն էլ փորձելով կանգնեցնել ավտոմեքենան, բռնվել է վարորդի կիսաբաց դռնից, սակայն վերջինս շարունակել է ավտոմեքենան վարել, որի արդյունքում ոստիկանն ընկել է գետնին՝ ստանալով մարմնական վնասվածք:

Խազիկյանին մեղադրանք է առաջադրվել ՀՀ քրեական օրենսգրքի 316-րդ հոդվածի 2-րդ մասի հատկանիշներով՝ իշխանության ներկայացուցչի նկատմամբ բռնություն գործադրելու համար, որը կապված է նրանց կողմից իրենց ծառայողական պարտականությունները կատարելու հետ: Քննիչը միջնորդություն էր ներկայացրել դատարան՝ նրա նկատմամբ կալանավորումը որպես խափանման միջոց ընտրելու մասին, ինչը բավարարվել էր, բայց նաեւ գրավի կիրառումը թույլատրելի համարվել։ Խազիկյանն ազատ է արձակվել 5 մլն դրամ գրավի դիմաց:

Հեղինակ՝ Իզաբել Սահակյան

Աղբյուր` Փաստինֆո