Փաստ ինֆո

Իրավապահ մարմինները դժվարին խնդրի առաջ են կանգնել` կամ պետք է քրեական գործ հարուցեն ԱԺ փոխնախագահ Ալեն Սիմոնյանի նկատմամբ` հանրային վայրում բռնություն գործադրելու համար, կամ պետք է ապացույցներ կեղծեն:

Ինչպես արդեն տեղեկացրել ենք` այսօր Երեւանի կենտրոնում Ալեն Սիմոնյանը բռնություն է գործադրել Արթուր Դանիելյանի նկատմամբ, որի հետեւանքով վերջինս ստացել է քթի կոտրվածք ու տեղափողվել է հիվանդանց: «Փաստինֆո»-ն ավելի վաղ հայտնել է, որ Ա.Դանիելյանը կատարվածի մասին հաղորդում է ներկայացրել: Կատարված հանցագործության դեպքի առթիվ քրեական գործ հարուցելու դեպքում` կառաջանա Ալեն Սիմոնյանին պատգամավորական անձեռնմխելիությունից զրկելու հարց, ինչը խառնել է գործադիր իշխանության ծրագրերը ու խնդիր է դրվել Ալեն Սիմոնյանին` «ջրից չոր դուրս բերել»: Մինչդեռ` կատարվածի վերաբերյալ կա նաեւ տեսաձայնագրություն ու արդեն կասկածներ կան, որ ոստիկանությունը այն պետք է ոչնչացնի կամ մոնտաժի:

Փաստաբան Ռուբեն Մելիքյանի փոխանցմամբ` Երևանի կենտրոնում Ալեն Սիմոնյանի և Արթուր Դանիելյանի միջև տեղի ունեցած միջադեպը տեսագրվել է մասնավոր կազմակերպության պատկանող անվտանգության տեսախցիկներով։ «Մեր փաստաբանական հարցմանն ի պատասխան՝ մեզ տեղեկացրել են, որ տեսագրություններն առգրավվել են իրավապահ մարմինների կողմից», - նշել է փաստաբանն ու ավելացրել«Հաշվի առնելով միջադեպի բնույթը և մեծ հանրային հնչեղությունը՝ պահանջում եմ անմիջապես ամբողջությամբ հրապարակել տեսագրությունը։ «Նախաքննության գաղտնիքի» պատրվակով հրապարակման ուշացումը համարելու ենք ոչ իրավաչափ, քանի որ հակակշիռ իրավաչափ շահը՝ ճշմարտությունն իմանալու հանրության իրավունքը, այս դեպքում բացարձակ գերակա է»։

Այսպիոսվ` ոստիկանությունը դժվարին խնդրի առաջ է կանգնել` հանուն Ալեն Սիմոնյանի վերացնեն հանցագործության հետքերն ու կեղծեն ապացույցները, թե, այդուհանդերձ, գործեն օրենքով: Առաջինի դեպքում` իրենք կդառնան հանցագործության կատարողներ ու վաղը դատվելու վտանգի առաջ կկանգնեն, իսկ օրենքով առաջնորդվելու դեպքում կարժանան Նիկոլ Փաշինյանի զայրույթին:

Աղբյուր` Փաստինֆո