Փաստ ինֆո

Այս նախագիծը օրակարգ բերելով Արդարադատության նախարարությունն ու Կառավարությունը փաստացին, որ մեկ ամիս առաջ մենք ճիշտ էինք, երբ ասում էինք, որ օրենքի մակարդակով մանրամասն կարգավորում է պետք: Շնորհակալ եմ, որ ընդունել եք մեր ճշմարտությունը, բայց մեկ ամիս անց: Այս մասին այսօր ԱԺ ամբիոնից ասաց «Լուսավոր Հայաստան» խմբակցության պատգամավոր Տարոն Սիմոնյանը՝ անդրադառնալով կառավարության կողմից ներկայացված Արտակարգ դրության իրավական ռեժիմի մասին» օրենքում փոփոխություններ եւ լրացումներ կատարելու մասին և «Նորմատիվ իրավական ակտերի մասին» օրենքում լրացում կատարելու մասին օրենքների նախագծերի փաթեթին:

Ըստ նրա՝ իշխանություններն իրենց արձանագրած բացթողումները մեկ ամիս առաջ անեին, հիմա խնդրի առաջ չէին կանգնի:

Սիմոնյանը հայտնեց, որ ԼՀԿ-ն առաջարկությունների փաթեթ է ներկայացրել, ապա հավելեց, որ վստահ է՝ ԱԺ դահլիճում նստած բոլոր իրավաբանները ազատության իրավունքի սահմանափակումը ճանաչում են, որ պետք է տեղի ունենա բացառապես օրենքով, որովհետև դա ՀՀ Սահմանադրության, Մարդու իրավունքների եվրոպական դատարանի և մի շարք այլ կառույցների պահանջն է:

«Չափանիշները պետք է սահմանվեն օրենքով, որոշակիությունը պետք է սահմանվի օրենքով, դատական ստուգման հնարավորություն պետք է տրամադրվի օրենքով: Սրանք իմ խոսքերը չեն, այլ Մարդու իրավունքների եվրոպական դատարանի խոսքերն են, որոնք վերաբերում են արտակարգ դրության ժամանակ անգամ ազատության իրավունքի սահմանափակմանը»,-ասաց ԼՀԿ պատգամավորն ու հույս հայտնեց, որ իշխող խմբակցությունը մասնագիտական առաջարկները կընդունի:

Անդրադառնալով ԱԺ-ում տիրող թեժ մթնոլորտին, վիրավորական խոսքերին՝ Սիմոնյանն ասաց. «Ժողովուրդ ջան, մի հող ու ջրի մարդ ենք, մի միս ու արյուն ենք, կարիք չունենք իրար վիրավորելու: Երբ մեր խմբակցությունն առաջարկությամբ է հանդես գալիս դուք կարող եք ասել, որ դա լավ առաջարկ չէ, ընդունելի առաջարկ չէ, լավ, փիս առաջարկություն է, բայց երբ դուք մեր առաջարկություններին ի պատասխան վիրավորում եք մեր խմբակցության անդամներին, ինչքան էլ ես՝ համեստս, անգամ չփորձեմ որևէ հակադարձում կատարել, ամեն դեպքում անգամ իմ նման չափված և կոռեկտ արտահայտվող մարդիկ երբեմն ստիպված են լինում նաև պատասխանել դրանց: Այնպես որ մեր անկարգությունը գալիս է ձեր անկարգությունից:

Աղբյուր` Փաստինֆո