Փաստ ինֆո

Հանրակրթական ուսումնական հաստատություններում 4-րդ և 9-րդ դասարանի աշակերտներն ուստարվա ավարտին քննություններ չեն հանձնի։ Այս մասին այսօր ֆեյսբուքյան ուղիղ եթերում ասաց ՀՀ Կրթության, գիտության, մշակույթի և սպորտի նախարար Արայիկ Հարությունյանը՝ նշելով, որ նրանց տարեկան գնահատականները կամփոփվեն մինչև մարտի 13-ն ունեցած և էլեկտրոնային մատյան փոխանցած գնահատականների հիման վրա:

Նա հայտնեց, որ քննություններ չեն իրականացվի նաև ավագ դպրոցների 10-րդ և 11-րդ դասարաններում:
«Այսինքն` մինչև մարտի 13-ն ընկած ժամանակահատվածի գնահատականներով կամփոփվեն ու մենք կունենանք կիսամյակային գնահատականներ, այնուհետև տարեկան գնահատականներ»,-ասաց Հարությունյանը:

Անդրադառնալով դպրոցներում, քոլեջներում, բուհերում և ուսումնարաններում ավարտական քննություններին, նախարարն ասաց, որ դպրոցներում ավարտական՝ 12-րդ դասարանի, քննություններ չեն իրականացվի, ամփոփումը տեղի կունենա նույն կերպ, ինչպես 4-րդ և 9-րդ դասարանների դեպքում է:

«Հաշվի առնելով, որ աշակերտների մի մասն ավարտական քննությունները հանձնել է նախորդ տարվա դեկտեմբերին, վերջիններիս հնարավորություն է տրում ընտրել՝ կամ պահպանել քննության արդյունքը, կամ ընտրել տարեկան գնահատականը՝ որպես ատեստատում քննական գնահատական, ամփոփումը կատարվում է և ատեստատները կտրվեն մինչև մայիսի 25-ը: Բոլոր նրանք, ովքեր նախորդ տարի քննություն են հանձնել, և դրա արդյունքից գոհ չեն, մենք նրանց հնարավորություն ենք տալու այս կիսամյակային քննության տրամաբանությամբ ընտրություն կատարել»,-ասաց Հարությունյանը:

Նա նաև հայտնեց, որ քոլեջների, ուսումնարանների դիպլոմային աշխատանքների պաշտպանություն և քննություն չի լինելու, ամփոփումը լինելու է արդեն նշված տարբերակով, իսկ եթե սովորողը գնահատական չունի երկրորդ կիսամյակում, ապա տարեկան նշանակվելու է ուսումնական տարվա առաջին կիսամյակի արդյունքով, իսկ դիպլոմները կտրվեն մինչև հունիսի սկիզբը:

«Ավարտականների դեպքում մենք շատ կարևոր անվտանգային խնդիր ունենք, որը զորակոչի խնդիրն է, և մեր գործողություններում մենք ելնում ենք նաև նրանից, որ որևէ կերպ զորակոչի առումով խնդիրներ չստեղծենք»,-ասաց ԳԿՄՍՆ-ն:
Խոսելով բուհերում ավարտական քննությունների մասին, նա շեշտեց, որ դրա իրականացման ձևն ընտրում են առանձին բուհերը՝ իրենց ինքնավարության սահմաններում:

Աղբյուր` Փաստինֆո