Փաստ ինֆո

Վանաձորի «Գլորիա» կարի ֆաբրիկան Էկոնոմիկայի նախարարությանը աշխատանքները վերսկսելու պատրաստակամություն հայտնել է եւ սպասում են համապատասխան որոշմանը:

«Փաստինֆո»-ի հետ զրույցում «Գլորիա» կարի ֆաբրիկայի տնօրեն Բագրատ Դարբինյանն ասաց, որ պայմանավորվածությունն ի սկզբանե այնպես էր, որ ապրիլի 20-ից թեթև արդյունաբերության ոլորտը պետք է վերսկսեր իր աշխատանքը, սակայն ապրիլի 17-ին Էկոնոմիկայի նախարարի և թեթև արդյունաբերության ոլորտի ներկայացուցիչների հետ հանդիպման ժամանակ ձեռք է բերվել նոր պայմանավորվածություն. «Ոլորտի բոլոր ընկերությունների տնօրենները հանդիպմանը ներկա էին և հիմնական մասը համաձայն էր աշխատանքներն ապրիլի 20-ից վերսկսել, բայց կային մարդիկ, որ նպատակահարմար չգտան, քանի որ եթե բացվեին ու չաշխատեին, ապա պետք է երկու երրորդով վճարեին: Արդյունքում որոշվեց ոչ թե ամբողջ ոլորտը բացել, այլ միայն այն ընկերություններն աշխատել, որոնք պատրաստականություն կհայտնեն»:

Ըստ պայմանավորվածության՝ այն ընկերությունը, որը ցանկություն կունենա և կկարողանա աշխատել, պետք է նամակ գրի նախարարությանը, հայտնի աշխատելու իր ցանկությունը՝ նշելով աշխատակիցների թիվը: Ընդ որում՝ հնարավորություն էր տրվել նաեւ գրել, թե օրինակ քանի օրով են ուզում աշխատել: Բ.Դարբինյանի փոխանցմամբ՝ ընկերություններից մեկի ներկայացուցիչն ասաց, որ ընդամենը փաթեթավորման խնդիր ունեն և իրենց պետք է 5 օր և 10 աշխատակից: «Մենք էլ պատվերներով խեղդված ենք, ամբողջ Եվրոպայից սպասում են, բացի այդ էլ աշխատակիցները նույնպես աշխատանքը վերսկսելու ցանկություն հայտնեցին: Քանի որ աշխատակիցների 95 տոկոսը համաձայնությունը հայտնեց, նախարարությանը նամակ գրեցի, որ ֆաբրիկայի երկու մասնաճյուղերը ընդհանուր 2630 մարդ, ցանկանում ենք վերաբացել՝ պահպանելով սանիտարահիգիենիկ պայմանները»,-ասաց Բագրատ Դարբինյանը:

Վերջինիս տեղեկություններով՝ Էկոնոմիկայի նախարարն էլ Առողջապահության նախարարին պետք է դիմի և հնարավոր է այդ պատճառով է թույլտվությունն ուշանում: Տնօրենի խոսքով՝ ֆաբրիկան շատ պատվերներ ունի. «Հեռախոսս անջատել եմ, էլ.հասցես էլ չեմ նայում, ամաչում եմ: Լուրջ ընկերություններ են պատվիրատուները, դրանցից մեկն էլ Մոնկլերն է, ՆԱՏՕ-ի հագուստներն ենք արտադրում: Մեր ընկերությունը միջազգային ճանաչում ունի, հիմնադիրների 50 տոկոսն էլ իտալացիներ են: Այս ամսվա ընթացքում եղել են պատվերներ, որ կրճատվել են: Միայն «Մոնկլեր»-ի համար տարեկան 400 հազար պատվեր ենք արտադրում, 30 հազարը հանել է: Բացի այդ՝ ընկերությունը մեզ մոտ տեխնոլոգներ ունի, որոնք բարձր վարձատրվող մասնագետներ են: Հիմա գրել են, որ եթե երկուշաբթի օրվանից չաշխատենք, իրենց ինքնաթիռներից են ուղարկելու, որ այդ մասնագետներին հետ տանեն: Ընկերությունը վարկերով եմ սարքել ու ամեն օրն ինձ համար պրոբլեմ է: Ես էլ եմ հասկանում, որ վտանգավոր իրավիճակ է, բայց հստակ պատասխան պետք է լինի: Եթե օրինակ երկու ամիս չենք բացվելու, ուրեմն թող ասեն, որ պատվիրատուներին տեղյակ պահենք: Թե հիմա որը համբերատար կլինի, կսպասի, որը ոչ, ինչ կարող ենք անել»,-նշեց Բագրատ Դարբինյանը:

Ֆինանսական վնասից բացի Բագրատ Դարբինյանին մտահոգում է նաև եվրոպացի գործընկերների հետ բարեխիղճ աշխատանքի շնորհիվ ձեռք բերած համագործակցությունը, ինչպես նաև ընկերության հեղինակությունը, որը չի ուզում կորցնել: Ինչ վերաբերում է ընկերության աշխատակիցներին, ապա տնօրենը նշեց, որ մարտ ամսին ինչ-որ չափով աշխատել են և աշխատակիցները մարտ ամսվա աշխատավարձերը ստացել են. «Ապրիլի աշխատավարձը պետք է մայիսի 15-ին տանք, բայց եթե հնարավորություն լինի կտանք, եթե չէ ինչպես տանք: Որոշել էինք, որ գոնե ապրիլի 10 օրը կաշխատենք, մայիսից էլ 10 օր և կես ամսվա աշխատավարձ գոնե կվճարեինք ապրիլի համար: Չգիտեմ՝ կարող է մի փոքր վարկ վերցնեմ, բայց դե այդքան հնարավորություն չկա»,-նշեց Բագրատ Դարբինյանը հավելելով, որ աշխատակիցներից հատուկենտ մարդիկ են օգտվում պետական աջակցության ծրագրերից:

Հիշեցնենք, որ երեկ Վանաձորի «Գլորիա» կարի ֆաբրիկայի մի շարք աշխատակիցներ ապրիլի գնացել էին գործարան աշխատանքի և երբ տեղեկացել էին, որ այն դեռ չի վերաբացվում, բողոքի ակցիա էին իրականացրել: Աշխատակիցները տեղյակ չէին եղել, որ պետք է սպասեն պարետի որոշմանը, ընդ որում ֆաբրիկայի տնօրենի խոսքով նրանցից ոմանք գործարան էին գնացել մարտ ամսվա աշխատավարձը ստանալու նպատակով: Արդյունքում ֆաբրիկայի աշխատակիցներից մի քանիսը տուգանվել է: Այսօր ԱԺ «Լուսավոր Հայաստան» խմբակցության ղեկավար Էդմոն Մարուքյանը կոչ է արել չեղյալ համարել ֆաբրիկայի աշխատակիցների նկատմամբ կազմված վարչական արձանագրությունները: Վերջինս ստեղծված իրավիճակը քաոսային է գնահատել. «Կամ որոշեք, ասեք չեն աշխատում, կամ էլ ասեք աշխատում են, որ իմանան աշխատում են: Եթե հայտարարվում է, որ պետք է աշխատեն, հետո ինչու են տուգանում»,-նշել էր Էդմոն Մարուքյանը:

Հեղինակ՝ Հասմիկ Կոշկարյան

Աղբյուր` Փաստինֆո