Փաստ ինֆո

Ցավալիորեն այդպիսի դատավորներ էլ կան Վերաքննիչ դատարանում, որոնք համարում են, որ այս իրավիճակում մարդը խախտված իրավունքի պաշտպանության միջոց չպետք է ունենա: Այս մասին «Փաստինֆո»-ի հետ զրույցում ասաց ՀՀ երկրորդ նախագահ Ռոբերտ Քոչարյանի պաշտպանական խմբի անդամ Հայկ Ալումյանը։ Մինչդեռ, ինչպես արձանագրեց փաստաբանը, Եվրոպական կոնվենցիայի 13-րդ հոդվածի համաձայն՝ եթե Կոնվենցիայով երաշխավորված որևէ իրավունք է խախտվում կամ անձն է կարծում, որ խախտվել է, նա պետք է կարողանա այդ խախտումը բողոքարկել, պետք է ունենա արդյունավետ պաշտպանության միջոց։

Ավելի վաղ տեղեկացրել ենք, որ մարտի 16-ին Ռոբերտ Քոչարյանի պաշտպանները միջնորդություն են ներկայացրել՝ երկրորդ նախագահին անձնական երաշխավորությամբ ազատ արձակելու մասին, սակայն մարտի 17-ին նշանակված դատական նիստը հետաձգվել է ու առ այսօր չի քննարկվել։ Դատավոր Աննա Դանիբեկյանը նախ ժամանակավոր անաշխատունակության թերթիկ էր ներկայացրել՝ քթի վիրահատության համար, իսկ հետո էլ հերթական արձակուրդի գնացել։

Ռոբերտ Քոչարյանի պաշտպանական խմբի անդամ Հայկ Ալումյանը վերաքննիչ բողոք է ներկայացրել ՝ պահանջելով Ռոբերտ Քոչարյանին անձնական երաշխավորությամբ ազատ արձակելու մասին միջնորդությունը դատարանի կողմից չքննելը, դրա քննությունն անորոշ ժամկետով հետաձգելը ճանաչել ոչ իրավաչափ, սակայն Վերաքննիչ քրեական դատարանը՝ նախագահությամբ դատավոր Արմեն Բեկթաշյանի, մերժել է վարույթ ընդունել այն՝ նշելով, որ պաշտպանի կողմից փաստացի բողոքարկվել է առաջին ատյանի դատարանի անգործությունը, ինչը ՀՀ քրեական դատավարության օրենսգրքի 376.1-րդ հոդվածի լույսի ներքո բողոքարկման ենթակա չէ:

Հ.Ալումյանն արձանագրեց, որ կա խախտում, որի արդյունավետ պաշտպանության միջոցը կարող է լինել միայն վերաքննիչ դատարանը և այլ ատյան, որը կարող է որոշել՝ Առաջին ատյանի դատարանն իրավունք ունի այսքան ձգձգել, թե ոչ՝ գոյություն չունի:

«Մենք փորձեցինք Վերաքննիչ դատարան բողոքարկելու միջոցով դուրս գալ փակուղուց: Վերաքննիչ դատարանում էլ դատավոր գտնվեց, ով ասում է, որ դա բողոքարկման ենթակա չէ »,- նշեց Ալումյանը:

Նրա խոսքով՝ Վերաքննիչ դատարանի այս որոշումը բողոքարկման ենթակա է, բայց, հաշվի առնելով Վճռաբեկ դատարանի առանձնահատկությունները, շատ քիչ է հավանականությունը, որ Վճռաբեկ դատարանը վարույթ կընդունի:

«Օրենքով շատ մեծ լիազորություններ ունի՝ որևիցե վճռաբեկ բողոքը վարույթ ընդունել կամ չընդունել և, օգտվելով իր այդ լիազորություններից, այս իրավիճակներում, երբ այս բնույթի գործեր են, աշխատում է ինչքան հնարավոր է հեռու պահել իրեն այս գործերից: Շատ քիչ հավանականություն եմ տեսնում, որ Վճռաբեկ դատարանը վարույթ կընդունի: Մենք չենք սպասի՝ Վճռաբեկ դատարանի կողմից վարույթ ընդունելուն, ՄԻԵԴ բողոք ամեն դեպքում կուղարկենք: Մի օր մեր հարկատուներն այս բոլոր խախտումների համար իրենց գրպաններից, կարծում եմ, վճարելու են: Այս քմահաճույքների համար, որ վարչապետը թելադրում է դատարաններին և դատարաններն էլ իրականացնում են, որոշ ժամանակ անց բյուջեն կվճարի»,- ասաց Ալումյանը:
Նրա գնահատմամբ՝ Վերաքննիչ դատարանի դատավորը պարզապես փորձել է խուսափել ավելորդ խնդիրներից:

«Բոլորի համար հասկանալի է, թե այս գործի ետևում ինչ խնդիրներ կան, բոլորին հասկանալի է, թե ինչու էր վարչապետը դատարանների մուտքերը փակում և դրանով ինչ էր հասկացնում դատավորներին: Դատավորներն էլ հասկացել են այդ մեսիջները: Աշխատում են հնարավորինս հեռու մնալ այս գործից: Վարչապետի քմահաճույքները իրականացնելու համար ստիպված են լինում ամենակոպիտ ձևով օրենք խախտել: Օրենքն էլ, եթե կիրառեն, այս անգամ պարզ չէ՝ դատարանները կփակի, թե կորոշի հրկիզել դատարանները, թե էլ ինչ էքսցենտրիկ բան կանի, դրա համար ով կարողանում է այս գործի հետ չառնչվել, աշխատում է չառնչվել: Ով էլ չի կարողանում չառնչվել, կանգնում է շատ ծանր ընտրության առաջ»,- նշեց Ալումյանը:

Ինչ վերաբերում է ԲԴԽ-ին, որն անգործություն է ցուցաբերում՝ կալանքի տակ գտնվող անձի իրավունքների բացահայտ խախտման առնչությամբ, մինչդեռ արձագանքում է դատավոր Աննա Դանիբեկյանի քթի վիրահատության մասին տեղեկատվությանն ու դատախազությանը դիմում քրեաիրավական գնահատական տալու համար՝ Ալումյանը արձագանքեց. «պետք է հաշվի առնել, որ այդ մարդիկ վախեցած են և շատ խիստ պետք չէ դատել»:

Հեղինակ՝ Իզաբել Սահակյան

Աղբյուր` Փաստինֆո