Փաստ ինֆո

Ազգային ժողովը առաջին ընթերցմամբ ընդունել է «Բարգավաճ Հայաստան» խմբակցության պատգամավոր Միքայել Մելքումյանի կողմից ներկայացված Հայաստանի Հանրապետության հարկային օրենսգրքում փոփոխություն եւ լրացում կատարելու մասին նախագիծը:

Մելքումյանը հայտնեց, որ նախագծով առաջարկվում է հարկային պարտավորությունների չկատարման դեպքում տույժերի կրկնակի նվազեցում:

«Գիտենք, որ ամենօրյա հաշվարկի ժամանակ հարկային որոշակի պարտավորություն չիրականացնելու դիմաց վճարվում է հարկային պարտավորության 0,0075 տոկոսը, հիմա առաջարկում ենք դրա գրեթե կրկնակի իջեցում՝ 0,004 տոկոս: Այսինքն` առաջին դեպքում տարեկան կտրվածքով եթե 27 տոկոսից ավելի էր, ապա հիմա այս թիվն իջեցվում է գրեթե 14,6 տոկոսի»,-ասաց Մելքումյանը:

Նա ընդգծեց, որ այն հարկային պարտավորությունները, որոնք չեն վճարվել կամ կորոնավիրուսային իրավիճակից հետո ճգնաժամային իրավիճակով պայմանավորված վճարելու հնարավորություն չի լինելու, դրա համար տույժերն ավելի փոքր ծավալով կլինեն:

«Գործող օրենքում նաև կարգավորում կա, որ եթե տնտեսավարողը 500 հազար դրամից ավելի հարկային պարտավորություն է կուտակում, ապա հարկային մարմնի ղեկավարը կարող է արգելանք դնել: Ըստ վիճակագրության, 9813 տնտեսվարող նման արգելանքի տակ է եղել վերջին 2-2,5 տարիների ընթացքում: Հիմա մենք առաջարկում են, որ այս շեմը դառնա 1,5 մլն»,-ասաց ԲՀԿ պատգամավորը:

Նա բացատրեց, որ այս կերպ փոքր ու միջին ձեռնարկություններին հնարավորություն կտրվի շատ չտուժել:

Աղբյուր` Փաստինֆո