Փաստ ինֆո

Երբ Նիկոլ Փաշինյանն ընդդիմադիր պատգամավոր էր, նրա ելույթները և հարցազրույցները հիմնականում մուննաթի ժանրի մեջ էին: Բոլորի վրա մուննաթ էր գալիս՝ վերևից՝ ներքև, աջից՝ ձախ: Այսօր, երբ Փաշինյանը երկրի վարչապետի պաշտոնն է զբաղեցնում, որն, ըստ էության խորհրդարանական հանրապետության թիվ մեկ պաշտոնյան է, ժանրը, որով նա հարաբերվում է մարդկանց հետ, բազմաժանր է դարձել: Հատկապես նրանց, ում հետ հարաբերվում էր մուննաթի ժանրում, այսօր հաթաթայի ժանրով է դիմում: Հաթաթա է տալիս աջ ու ձախ, հաթաթա է տալիս, երբ տեսնում է, որ իր հանդեպ վստահությունը գնալով նվազում է, երբ զգում է, որ «ռեյտինգը» անկում է ապրում, և ոտքերի տակից հողը փախչում է, ձեռաց հիշում է նախկիններին, նրանց հետ է կռիվ տալիս:

Ընդ որում, հետաքրքիրն այն է, որ նրա հաթաթան շատ անգամ տարածվում է ոչ միայն նախկին պաշտոնյաների վրա, որոնց մի հատված այսօր էլ շարունակում է պաշտոնավարել, այլև՝ նախորդ 20 տարիների ընթացքում պետհամակարգում աշխատած, և այսօր էլ աշխատող, բարձր, միջին և կրտսեր պաշտոններ զբաղեցնող պետծառայողների վրա: Այսինքն, նա հաթաթա է տալիս այն մասնագետներին, որոնք տարբեր գերատեսչություններում անում են ոլորտային բուն գործը՝ հաճախ՝ իրենց ուսերին կրելով գերատեսչության հիմնական բեռը:

Ի դեպ, այդ աշխատակիցները բնավ նրանք չեն, ովքեր ճոխ պարգևավճարներ են ստանում, ստացողները հիմնականում նորերն են՝ ղեկավարների տեղակալներ, հայեցողական պաշտոն զբաղեցնող օգնական-խորհրդական-մամլո խոսնակները:

Հիմա, Փաշինյանն ու՞մ է հաթաթա տալիս՝ այն նախկիններին, որոնք պաշտոնաթող լինելով անգամ իրենց խորհուրդներով, իրենց հրապարակումներով և հանրային խոսքով փորձում են օգնել ու աջակցել իշխանությա՞նը, մյուսների՞ն, որ չհեռացան ու մնացին և այսօր էլ ղեկավար պաշտոններ են զբաղեցնում, թե՞ նաև բոլոր այն անձանց, որոնք անցած 20 տարիներին աշխատել են պետհամակարգում՝ կատարելով իրենց գործառույթները և այսօր էլ շարունակում են նույն կերպ կատարել: Ասենք, երբ մարդկանց անվանում է թափթփուկներ, Սերժի մնացորդներ և այլն, չի՞ հասկանու՞մ, որ եթե պետծառայողները վիրավորվեն ու հեռանան համակարգից, ուղղակի համակարգեր կփլուզվեն: Կամ՝ այդ խոսքերն ասելուց հետո նա կառավարության նիստերի ժամանակ ո՞նց է նայելու Տոնոյանի, Ցոլակյանի, Անանյանի, Ջանջուղազյանի, գլխավոր դատախազ Դավթյանի, ՀՔԾ պետ Սասուն Խաչատրյանի, Ղուլարյանի և այսօր էլ պաշտոնավարումը շարունակող ոլորտային ղեկավարների երեսին:

Ի վերջո, պետական համակարգից բացարձակ անտեղյակ իր էլեկտորատին միայն նա կարող է զարմացնել, թե ներկա կառավարությունը նոր ծրագրեր է իրականացնում: Բոլոր ծրագրերը, որ տարբեր ոլորտներում իրականացվում են, նախորդ իշխանության, հաճախ նաև՝ ավարտական փուլում գտնվող ծրագրերն են, որոնք Փաշինյանը ներկայացնում է որպես իր կառավարության ծրագրեր:

Ի վերջո, Փաշինյանը ոչ առաջին, ոչ էլ վերջին անգամն է հաթաթա տալիս, հաթաթաները որպես կանոն, գործի չեն վերածվում, այդ ժանրի մեջ էլ մնում են: Այլ հարց, որ հաթաթայի համատեքստում նա առաջիկայում կազատվի թեկուզ պրոֆեսիոնալ, բայց ի՛ր համար անցանկալի կադրերից: Ինչպես այսօր ԼԿ նախագահ Էդմոն Մարությանն ասաց՝ «Հրամանի թուղթն էլ է ձեր ձեռքը, գրիչն էլ, ստորագրեք, ազատեք»: 

Գիշերվա լայվից հետո արդյոք «Սերժի մնացորդներից» գլխավոր դատախազն ու ՀՔԾ պետը դուրս կնետվեն պետական կառավարման համակարգից:

Նկատենք, որ ոչ պրոֆեսիոնալ՝ ձեռքի հետ, ֆեյսբուքյան լայքերի, ստատուսների ու լայվերի մոտիվներով՝ փողոցի տրամաբանությամբ, օրենքներից ու իրավական ակտերից մղոններով հեռու փախչելով աշխատողները հենց իր թիմում են:

Ի վերջո, անկեղծ լինենք՝ շաբաթօրյա ուղերձի ո՛չ ցուցադրված, ո՛չ էլ հում նյութը, առանձնապես նոր բան չէր պարունակում:

Հեղինակ՝ Մ. Մինասյան

Աղբյուր` Փաստինֆո