Փաստ ինֆո

ՀՀ-ում ոստիկանությունը չէր կարող կանխատեսել, որ կորոնավիրուսի համաճարակ կարող էր լինել, և այդ պայմաններում ոստիկանության ուժերն ու միջոցները մնացել են նույնը: Այս մասին ասուլիսին ասել է ՀՀ փոխոստիկանապետ Հայկ Մհրյանը: Բացի այդ՝ Մհրյանն արձանագրեց, որ ոստիկանությունը բացի իր բուն գործառույթներն ու խնդիրները կատարելուց այժմ կատարում է նաև հսկայածավալ աշխատանք՝ կապված պարետի բոլոր ցուցումների հետ:

Հարցին, թե ինչով է պայմանավորված Երևանի փողոցներում մարդկանց թվի զգալի աճը, դրան զուգահեռ ոստիկանների թվի պակասը, Մհրյանն արձագանքեց, որ այո, քաղաքացիների թվաքանակը մայրաքաղաքում ավելացել է: Նրա խոսքով՝ դա պայմանավորված է նրանով, որ պարետի որոշումներով որոշ տնտեսվարող սուբյեկտների գործունեության ծավալը մեծացել է և, բնականաբար, քաղաքացիները պետք է հաճախեն աշխատանքի:

Ինչ վերաբերում է բանկերի մոտ խստացված հսկողությանը, Մհրյանն ասաց, որ բանկերում շարժը որոշակիորեն մեծացել է՝ կապված կառավարության որոշումների հետ:

«Այսինքն՝ քաղաքացիները ֆինանսական օգնություն ստանալու իրավունք են ստացել, դա հաշվի առնելով, ոստիկանության պետի հանձնարարությամբ մենք մեր ուշադրությունն ավելի շատ ուղղորդել ենք բանկերի և ընդհանրապես այն վայրերի նկատմամբ, որտեղ քաղաքացիների կուտակումները կարող են մեծ լինել»,- նշեց նա:

Ի դեպ, փոխոստիկանապետը նշեց, որ ոստիկանության ծառայողներն արդեն ստացել են հավելավճարը:

Աղբյուր` Փաստինֆո