Փաստ ինֆո

ՀՀ վարչապետ Նիկոլ Փաշինյանի ապրիլի 19-ի ուշ երեկոյան ֆեյսբուքով ուղիղ եթեր է մտել, սակայն այս անգամ ոչ թե խոսել կորոնավիրուսի, այլ իրեն ուղղված քննադատությունների մասին։

Ըստ նրա՝ այս ընթացքում եղել են մարդիկ, և ես տեսնում եմ, որ կան մարդիկ, որոնք թավիշի ու վենդետայի բացակայության մեր գաղափարախոսությունից օգտվել են ու դա չարաշահել են՝ նշելով, որ նման մարդիկ պետք է դուրս նետվեն պետական կառավարման համակարգից:

Նա շեշտեց, որ այսօր հիասթափված են մարդիկ, ովքեր սպասում էին, որ «փայ» պետք է ստանան, չպիտի կորցնեն իրենց «փայը», ապա ավելացրեց, որ «փայերի բաժանում» չկա:

«Բազմաթիվ մարդիկ՝ գործարարներ, երբ ինձ հարցնում են ինչով կարող են օգտակար լինել, ես ասում եմ աշխատեք, հաջողություն ունեցեք, հարկերը վճարեք, սակայն այս խոսքերից հետո նրանց աչքերում հիասթափություն եմ տեսնում, իրենք ուզում են հասկանալ ես ձեռք եմ առնում իրենց թե ոչ, երբ ես պատասխանում եմ, որ ձեռք չեմ առնում, ավելի մեծ հիասթափություն են ապրում»,-ասաց Փաշինյանը:

Անդրադառնալով սոցցանցերում իր հասցեին հնչող հայհոյանքներին՝ նա ասաց, որ 2018թ-ից առաջ նման բան գոյություն չի ունեցել, որովհետև հայհոյողը մտածել է, որ կարող է իրեն խփեն, կրակեն, սպանեն:

«Այս երկիրը հոկտեմբերի 27 է տեսել, քաղաքական սպանություններ է տեսել, սպանություններ է տեսել և բոլորն իմացել են, թե ով է արել, ինչի համար, սակայն ոչինչ չի բացահայտվել...Բոլորը գիտեն, որ այսօր իշխանությունը ո՛չ խփող է, ո՛չ ծեծող է ու լկտիացել են, որովհետև ուզում են իշխանությանը հունից հանեն, ուզում են, որ մենք սկսենք ծեծել, խփել կամ էլ առնվազն այնպես անել, որ ժողովուրդը մտածի թե ով է այս թուլամորթ, անինքնասեր իշխանությունը»,-ասաց վարչապետը:

Նա շեշտեց, որ լրատվամիջոցների 99 տոկոսը և լրագրողների 70 տոկոսը իշխանությունից կոնկրետ գումար է ստացել, իսկ հիմա չի ստանում այդ գումարը.

«Հիմա ամբողջ լրատվական դաշտը կատաղած է, որ առաջ փող էին ստանում, հիմա չեն ստանում, եթե ուրիշ տեղից էլ ստանում են դա վախվխելով է լինում, որ կարող է ինչ-որ տեղ ինչ-որ բան բացահայտվի»:

Մանրամասները՝ տեսանյութում:

Աղբյուր` Փաստինֆո