Փաստ ինֆո

Աշխարհում կորոնավիրուսով վարակված հայերի թիվը շատ ավելի մեծ է, քան պատկերացնում ենք: Նման կարծիք այսօր մամուլի ասուլիսի ժամանակ հայտնեց ՀՀ սփյուռքի գործերի գլխավոր հանձնակատար Զարեհ Սինանյանը:

«Մի պահ մոնիթորինգ էինք անում, բայց հասկացանք, որ անիմաստ է, որովհետև թիվն այնքան մեծ է և իրավիճակն էլ այնքան հեղհեղուկ, որ ամեն օր դրան հետևել աշխարհի բոլոր պետություններում անիմաստ է: Վարակվածների թիվը ենթադրում եմ ավելի մեծ է,քան պատկերացնում ենք»,-ասաց Զարեհ Սինանյանը:

Վերջինիս խոսքով հստակ վիճակագրություն չկա, սակայն եթե նախկինում ամենամեծ թվով հայերն Իրանում էին, ապա հիմա Ռուսաստանում կարող են լինել:

Անդրադառնալով հարցին, որ աշխարհի տարբեր երկրներից բազմաթիվ հայեր ցանկանում են կարանտինը Հայաստանում անցկացնել, Զարեհ Սինանյանը նկատեց՝ երկու խնդիր կա: Առաջինը ինչպես այդ մարդկանց Հայաստան հասցնել, իսկ երկրորդը Հայաստան հասցնելուց հետո պետք է պատրաստ լինեն նման հոսքեր ընդունել:

«Աշխարհի բոլոր պետությունների նման Հայաստանի հնարավորությունները նույնպես սահմանափակ չեն: ՌԴ-ում գտնվող և կարանտինը Հայաստանում անցկացնել ցանկացող մեր հայրենակիցների խնդիրը պետությունը փորձում է լուծել այնքանով, որքան ռեսուրսներն ու հնարավորություններն են թույլ տալիս: Նրանց մի մասն առանց աշխատանքի և գումարի է ու բառիս բուն իմաստով դրսում է հայտնվել: Խնդիրը լուրջ է: ԱԺ որոշ պատգմավորներ ինչպես նաև մենք նրանց համար կացարան ենք փնտրում: Բայց հնարավոր է` շատերը վարակված լինեն, իսկ շատ տեղերում ոչ քաղաքացիներին բժշկական ծառայություններ չեն մատուցում: Այսինքն նույնիսկ կացարան գտնելու դեպքում նրանց վարակված լինել-չլինելու հարցն իրոք խնդրահարույց է»,-հավելեց Զարեհ Սինանյանը:

Աղբյուր` Փաստինֆո