Փաստ ինֆո

Պարենային ապրանքների քանակի հետ կապված խնդիր չունենք: Այս մասին այսօր մամուլի ասուլիսի ժամանակ ասաց ՏՄՊՊՀ նախագահ Գեղամ Գևորգյանը:

Ինչ վերաբերում է գների դինամիկային, Գեղամ Գևորգյանը նկատեց վերջին երկու օրերի ընթացքում գների նվազման մոտեցում կա. «Գների պիկը սկսել է անկում ապրել: Օրինակ կարագը, որը հանդիսանում է ամենաշատն օգտագործվող ապրանքներից մեկը, փետրվարի 26-ին եղել է 3730 դրամ, պիկը եղել է մարտի 27-ից 30-ն ընկած ժամանակահատվածում 3870 դրամ: Այսօր կարագի մանրածախ գինը 3790 դրամ է: Բուսական յուղն ուսումնասիրվող ժամանակահատվածում 705 դրամ է եղել, պիկը եղել է 735 դրամ, ապրիլի 8-ի դրությամբ 710 դրամ է»,-ասաց ՏՄՊՊՀ նախագահը:

Վերջինս հավելեց, որ գների բարձրացման դինամիկա են նկատում որոշակի ցիտրուսային մրգերի շրջանակում, մասնավորապես նարինջը, մինչդեռ մանդարինի գինը մոտ 60 դրամով նվազել է: Անդրադառնալով ալյուրի գնին Գեղամ Գևորգյանն ասաց, որ ապրիլի 8-ի դրությամբ 5 դրամի նվազում կա. «Երևանի առևտրային խոշոր ցանցերում հացի գինը չի փոխվել: Գների բարձրացումը միանգամից տեղի չի ունեցել, ինչը ևս վկայում է այն մասին, որ գները բարձրացել են ոչ թե անմիջապես կորոնավիրուսի համաճարակի հետևանքով, այլ որոշակի ժամանակ անց: Օրինակ ալյուրի գինը թանկացել է մարտի 14-ից սկսած, այնուհետև գինը պահպանվել է մինչև մարտի 26-ը: Սա կարող է կապված լինել թե' արտարժույթի շուկայի, թե' բեռնափոխադրումների հետ կապված խնդիրների հետ»,-նշեց Գեղամ Գևորգյանը:

Անդրադառնալով Վանաձորում հացի գնի բարձրացմանը ՏՄՊՊՀ նախագահն ասաց, որ հանդիպել են Վանաձորի հաց արտադրողների հետ, և հանձնաժողովի ուսումնասիրությունները ցույց են տվել, որ Վանաձորի հացը հանրապետությունում ամենաէժանն է. «Գործում է 40-ից ավել տնտեսվարող սուբյեկտներ, ինչը նշանակում է դաշտը մրցակցային է: Չկան խոշոր սուբյեկտներ, որոնք այս պահին ունեն գերիշխող դիրք: Հացի թանկացման խնդիրը կապված է եղել մի շարք փաստերի հետ, որոնք այս պահին ուսումնասիրում ենք: Մի փոքր հատված կապված է եղել ալյուրի գնի հետ, մի փոքր հատված կապված է եղել հացի փաթեթավորման հետ: Այս օրերին առավել պաշտպանված փաթեթավորում են օգտագործել, բայց հիմնական պատճառը կապված է եղել սպառման ծավալների նվազման հետ: Հաշվի առնելով նաև դպրոցների և մանկապարտեզների փակ լինելը հաց արտադրողները չեն կարողացել իրացնել հացաբուլկեղենի այլ տեսակները: Գնի փոփոխություն տեղի է ունեցել միայն մեկ-երկու տեսակ մատնաքաշ հացի տեսակի հետ»,-հավելեց Գեղամ Գևորգյանը:

Վերջինս նկատեց` միակ մտահոգիչ հանգամանքն այն է, որ հացի գների նվազումը և բարձրացումը տեղի է ունեցել համատարած, այսինքն` տնտեսվարող սուբյեկտները որոշակի համագործակցության եզրեր են ցույց տվել, ինչը ՏՄՊՊՀ նախագահի խոսքով մտահոգիչ է:

Աղբյուր` Փաստինֆո