Փաստ ինֆո

Ապրիլի 8-ին իրականացրել ենք 236 թեստ, որից 28-ն է դրական: Այս մասին այսօր կառավարության նիստի մեկնարկին ասաց ՀՀ վարչապետ Նիկոլ Փաշինյանը նկատելով, որ շարունակում ենք պահպանել շաբաթվա սկզբում արձանագրված զգուշավոր լավատեսությունը: Վարչապետը հավելեց առաջիկայում սպասում են բուժվածների թվի որոշակի աճ:

«Վաղը պարետատանը կքննարկենք մեր հետագա անելիքները, թե երկուշաբթի օրվանից ինչ կարգավորումներ պետք է գործեն: Այս պահին մեր ամենամեծ մարտահրավերը հետևյալն է, որ մենք վաղվանից արդեն պետք է ստեղծենք օրը 1000 թեստի հնարավորություն: Այսօր առավոտյան խորհրդակցություն ենք ունեցել, և նախարարը պարզաբանել է այս համատեքստում ինչ պետք է անենք: Առաջին փուլում հնարավոր է, որ այդ թեստերի թիվը 1000-ի չհասնի, որովհետև այնուամենայնիվ քննարկումների արդյունքում եկանք այն եզրակացության, որ պետք է ցուցում լինի: Այսինքն` ուղղակի մարդկանց առանց որևէ չափանիշի հրավիրել և թեստավորել, դա ուղղակի ժամանակի և ռեսուրսի անիմաստ կորուստ կլինի: Վաղվանից ցուցումով մարդկանց, մասնավորապես բոլոր բուժաշխատողներին, հանրապետությունում թոքաբորբով հիվանդ բոլոր քաղաքացիներին, այլ վիրուսային հիվանդություններ ունեցող քաղաքացիներին պարտադիր կթեստավորենք և արդյունքներով ավելի ամբողջական պատկերացում կկազմենք ընթացիկ իրավիճակի մասին»,-ասաց վարչապետը` հավելելով, որ ընդհանուր առմամբ իրավիճակին տիրապետում են և պարզ է, թե ինչ է կատարվում:

Վարչապետը կորոնավիրուսի հաստատված դեպքերի հետ կապված ճշտում կատարեց: Վերջին մեկ շաբաթվա ընթացքում այս թեմային վերաբերող ամբողջ տեղեկատվությունն ինտեգրել և ստեղծել են թվային համակարգ, որտեղ օնլայն ռեժիմով թարմացվում են տվյալները և այս ճշգրտումների ընթացքում հայտնաբերել են 12 անճշտություն. «Եվս մեկ անգամ կստուգվի այդ անճշտությունը, հետևաբար ընդհանուր թվի հաշվառման առումով պետք է արձանագրենք, որ վարակի մեկնարկից ի վեր Հայաստանում արձանագրվել է կորոնավիրուսի 921 դեպք, առանց այդ 12-ի հաշվառման կլիներ 909 դեպք: Այսպիսի անճշտությունները հնարավոր են, որովհետև դա երբեմն կապված է լինում հիվանդին մի հիվանդանոցից մյուսը տեղափոխելու հետ: Սա իհարկե տվյալների մեջ մեծ բան չի փոխում, բայց եթե այսպիսի անճշտություններ լինեն, ժամանակ առ ժամանակ կուղղենք»,-հավելեց վարչապետը:

Աղբյուր` Փաստինֆո