Փաստ ինֆո

Փոքր և միջին շատ ձեռնարկություններ կարող են սնանկանալ կամ հայտնվել վատ պայմաններում: «Փաստինֆո»-ի հետ զրույցում այս մասին ասաց Հայաստանի գործատուների միության նախագահ Գագիկ Մակարյանը: 

Ամենախոցելին տուրիզմի, սպասարկման ոլորտն է, ինչպես նաև փոքր արտադրությունները: Տնտեսագետը նկատեց ՓՄՁ-ների մասին խոսելիս չպետք է մոռանանք նաև միկրոբիզնեսին, որը չի կարող օգտվել կառավարության աջակցության երրորդ միջոցառումից, քանի որ ծրագիրը վերաբերում է 24 մլն դրամից ավել շրջանառություն ունեցող բիզնեսին. «Միկրոբիզնեսի մեծ մասը կսնանկանա, կդառնա ուղղակի աղքատ: Առանց այդ էլ դեռ նախորդ տարվա ցուցանիշներով եկամտաբերության առումով լավ վիճակում չէին: Եվ դա մեծ թիվ կարող է կազմել: Ենթադրենք միկրոբիզնեսը, փոքր ու միջին բիզնեսը միասին 70 հազար են, ապա դրանից մոտ 40-50 հազարը միկրոբիզնեսն է և եթե նրանց նույնիսկ 10 տոկոսը սնանկանա, աղքատանա, կնշանակի 5000 ընտանիք կամ անհատ ձեռնարկատեր կսնանկանա: Դրանք հիմնականում ընտանեկան բիզնեսի կոնտեքստում են»,-ասաց Գագիկ Մակարյանը:

Վերջինս հավելեց գործատուների հետ զրույցների, քննարկումների արդյունքում պարզ է դառնում, որ օր օրի Հայաստանի տնտեսության վիճակը վատանում է: Նույնիսկ ուժեղ ընկերություններն են աստիճանաբար թուլանում, քանի որ շարունակում են հարկերը վճարել, միաժամանակ աշխատողների մեծ մասին վարձատրել. «Այսօր շատ կարևոր է, թե ՀՀ կառավարությունն ինչ քայլեր է կատարում:Աջակցության առաջին, երկրորդ, երրորդ միջոցառումներն առանձնապես լուրջ ազդեցություն չեն թողնում, քանի որ իրավիճակը դեռ կարգավորված չէ, կանխատեսումներն անորոշ են: Բացի այդ ֆիլտրացման մեխանիզմներում խնդիր կա: Այսօր շատ ընկերություններ կան, որ դիմում են բանկերին և մերժվում են»,-ասաց տնտեսագետը:

Գագիկ Մակարյանը նկատեց մեր տնտեսության վիճակն ուղղակիորեն կապված է աշխարհում ընթացող իրադարձությունների հետ, քանի որ Հայաստանն արտաքին առևտրի մեջ է գտնվում շատ երկրների հետ, հետևաբար Հայաստանի տնտեսության վիճակը պայմանավորված է նաև մյուս երկրների տնտեսության վիճակով. «Հատկապես պետք է դիտարկենք այն երկրները, որոնք որոշիչ նշանակություն ունեն Հայաստանի համար, այդ թվում Չինաստանը և Իրանը, նաև եվրոպական երկրները, քանի որ մետաղներն արտահանվում են հիմնականում եվրոպական երկրներ: Սննդամթերքի, գինիների, կոնյակի հիմնական մեր գործընկերը ՌԴ-ն է: Չինաստանն ու Իրանն էլ Հայաստանի համար կարևոր մատակարար երկրներ են»,-հավելեց Գագիկ Մակարյանը:

Հեղինակ՝ Հասմիկ Կոշկարյան

Աղբյուր` Փաստինֆո