Փաստ ինֆո

ՀՀ հաշվեքննիչ պալատից և ՀՀ պետական վերահսկողական ծառայությունից ստացված փաստաթղթերի հիման վրա ՀՀ գլխավոր դատախազության պետական շահերի պաշտպանության վարչությունում իրականացված ուսումնասիրությունների արդյունքում ՀՀ քաղաքացիական ավիացիայի կոմիտեի ծառայողների առնչությամբ հարուցվել է 2 քրեական գործ: Այս մասին «Փաստինֆո»-ին հայտնեց Դատախազության հանրային կապերի բաժնի պետ Արևիկ Խաչատրյանը:

Նրա փոխանցմամբ՝ քրեական գործերից մեկը հարուցվել է ՀՀ քրեական օրենսգրքի 214-րդ հոդվածի 2-րդ մասի, 308-րդ հոդվածի 2-րդ մասի հատկանիշներով՝ ՀՀ քաղաքացիական ավիացիայի գլխավոր վարչության պատասխանատու պաշտոնատար անձանց կողմից իրենց պաշտոնեական դիրքը ծառայության շահերին հակառակ օգտագործելու, օդանավի վարձակալության համար գումարներ հատկացնելու, իսկ «Ավիաուսումնական կենտրոն» ՓԲԸ ծառայողների կողմից իրենց կարգադրիչ կամ այլ լիազորություններն այդ կազմակերպության շահերին հակառակ և իր կամ ուրիշ անձանց օգտին օգտագործելով խախտումներով գնումների գործընթաց կազմակերպելու, անհիմն վարձակալության գներ սահմանելու, օդանավի վարձակալության անհիմն ծախսեր կատարելու հետևանքով պետությանն առանձնապես խոշոր չափերի վնաս պատճառելու դեպքի առթիվ:

Անդրադառնալով երկրորդ քրեական գործին՝ Խաչատրյանը նշեց, որ այն հարուցվել է ՀՀ քրեական օրենսգրքի 314-րդ հոդվածով՝ Կոմիտեի համապատասխան պաշտոնատար անձանց կողմից 2016-2019 թվականների ընթացքում պաշտոնական փաստաթղթերում՝ տեսչական ստուգումների վերաբերյալ փաստաթղթերում, համապատասխան ստուգաթերթերում իրականությանը չհամապատասխանող ակնհայտ կեղծ տեղեկություններ կամ գրառումներ մտցնելու, կեղծ փաստաթղթեր կազմելու դեպքի առթիվ:

«Երկու քրեական գործով իրականացվում են դեպքերի լիարժեք բացահայտմանն ուղղված ակտիվ քննչական, այլ դատավարական և օպերատիվ-հետախուզական ակտիվ միջոցառումներ, որոնց շրջանակներում միջոցներ են ձեռնարկվում ստուգելու նաև այլ երկրների տարածքում հայկական ավիափոխադրողների կողմից ապօրինի գործընթացներում ներգրավված լինելու հնարավոր հանգամանքները»,- նշեց Խաչատրյանը:

Հիշեցնենք, որ ապրիլի 6-ին վարչապետ Նիկոլ Փաշինյանն իր ֆեյսբուքյան էջում ասել էր, որ կան նախկին պաշտոնյաների, որոնց գործունության վերաբերյալ հարուցվել է քրեական գործ:

Նրա խոսքով՝ հայաստանյան ինքնաթիռները երկար տարիներ աֆրիկյան երկրներում ներգրավված են եղել ապօրինի գործունեության և զենքերի վաճառքի մեջ: Նա նաև տեղեկացրել է, որ քաղավիացիայի պաշտոնյաները ենթադրելի կոռուպցիոն պատճառներով դրանք թաքցրել են քաղաքացիական ավիացիայի կոմիտեի ղեկավար Տաթևիկ Ռևազյանից և կառավարությունից:

Երեկ հայտնի դարձավ, որ աշխատանքից ազատվել է ՀՀ վարչապետ Նիկոլ Փաշինյանի ավիացիոն գծով նախկին խորհրդական Հակոբ Ճաղարյանը։

Վերջինս հայտարարել է, որ դիմումը գրել էր դեռ մեկ շաբաթ առաջ ու նշել, որ իր որոշման հիմքերը հանդիսանում են քաղաքացիական ավիացիայի հանդեպ ցուցաբերվող կործանիչ, քայքայիչ և ապապետական մոտեցումները:

«Նախորդ Շաբաթ օրը՝ ապրիլի 4-ին, ես վարչապետին գրել եմ իմ վերջին զեկույցը, որտեղ հերթական և վերջին անգամ բացատրել եմ հայկական քաղավիացիայի ԻՐԱԿԱՆ իրավիճակը, առանց ստերի և իրականության աղավաղման, հերթական անգամ պարզաբանել եմ այս վիճակում հայտնվելու իրական պատճառները և նշել եմ այս ճգնաժամից դուրս գալու ուղիները»,- ֆեյսբուքում գրել էր Հ.Ճաղարյանը։ Իսկ այսօր հայտնի դարձավ, որ նա հրավիրվել է ԱԱԾ, որտեղ, ինչպես Հ.Ճաղարյանն է ներկայացրել, երկրի անվտանգության ոլորտի պատասխանատուներին ներկայացրել է երկրի քաղաքացիական ավիացիայի ոլորտում տիրող իրավիճակի վերաբերյալ իր վերաբերմունքն ու խորհրդատվական կարծիքը:

Աղբյուր` Փաստինֆո